គណៈប្រតិភូសមាគមមិត្តភាពវៀតណាម- កម្ពុជា អញ្ជើញមកសួរសុខទុក្ខនិស្សិតកម្ពុជាសិក្សានៅសាកលវិទ្យាល័យត្រាវិញ
- សេចក្ដីលម្អិត
- ជំពូក៖ ព័ត៌មាន
- ចេញផ្សាយនា 19 មករា 2015
- ចុចដង៖ 1221
ត្រាវិញ ថ្ងៃទី ៧ មករា ២០១៥ កន្លងទៅ លោក គីម ហុង យ័ញ អនុប្រធាននៃគណជនជាតិខេត្តត្រាវិញ អនុប្រធានសមាគមមិត្តភាពវៀតណាម - កម្ពុជា ព្រមទាំងគណប្រតិភូបានអញ្ជើញមកសួរសុខទុក្ខនិងជូនអំណោយដល់និស្សិតកម្ពុជាដែលកំពុងសិក្សានៅសាកលវិទ្យាល័យត្រាវិញ។ លោក ស្រី ថាច់ ធី យ៉ឹន សាកលវិទ្យាធិការីរងទទួលស្វាគមន៍។
នៅអង្គជំនួប លោក គីម ហុង យ័ញ បានថ្លែងអំណរគុណដល់គណកម្មការសាកលវិទ្យាល័យត្រាវិញបានបង្កលក្ខណៈងាយស្រួលដល់សមាជិកបានជួបសំណេះសំណាលនិងជូនអំណោយដល់និស្សិតកម្ពុជា។
ឱកាសនេះ លោកថ្លែងនូវខ្លឹមសារថ្ងៃប្រវត្តិសាស្ត្រ ៧ មករា ដែលប្រជាជនកម្ពុជាក្រោកឈរប្រឆាំងរបបប្រល័យពូជសាសន៍ នាំមកពន្លឺរស្មីដល់ប្រទេសជាតិនិងសុភមង្គលដល់ប្រជាជនកម្ពុជា។
លោកគួសបញ្ជាក់ថាបើគ្មានថ្ងៃ ៧ មករា នឹងប្រទេសកម្ពុជាក៏មិនទាន់មានការរីកចំរើនដូចថ្ងៃនេះនិងពួកប្អូនៗនិស្សិតគ្មានឱកាសមកសិក្សានៅសាកលវិទ្យាល័យត្រាវិញដែរ។
មិត្ត សុខ សៀវ គីម និស្សិតកម្ពុជាសិក្សាឆ្នាំ២មានប្រសាសន៍ថា៖ ពួកខ្ញុំបានសិក្សានៅទីនេះគឺដោយការយកចិត្តទុកដាក់ពីរដ្ឋាភិបាលប្រទេសទាំងពីរ វៀតណាម - កម្ពុជា បង្កលក្ខណៈស្នាក់នៅ រៀនសូត្រក្នុងបរិស្ថានសិក្សាស្កឹមស្កៃ ទំនើប ផ្តល់ភាពងាយស្រួលក្នុងការសិក្សា យ៉ាងកក់ក្តៅដូចកំពុងសិក្សានៅឯស្រុកដែរ។
លោក ស្រី ថាច់ ធី យ៉ឹន ថ្លែងអំណរគុណដល់គណប្រតិភូបានចំណាយពេលវេលាមកសួរសុខទុក្ខនិងលើកទឹកចិត្តដល់ប្អូនៗ ក៏ដូចមានអនុសាសន៍ដល់ប្អូនៗនិស្សិតខិតខំរៀនសូត្រនិងលើកកម្ពស់ស្មារតីសាមគ្គីភាពរវាងនិស្សិតប្រទេសទាំងពីរ។ អនុវត្តល្អបទកំណត់ផ្ទៃក្នុងរបស់សាលា ព្យាយាមសិក្សាមិនឱ្យខកបំណងរបស់អាណាព្យាបាល លោកគ្រូអ្នកគ្រូ ដល់ ពេលចេញសាលាអនុវត្តល្អនូវចំណេះវិជ្ជាដែលបានសិក្សាចូលទៅក្នុងសកម្មភាពការងារជាក់ស្តែងបម្រើបុព្វហេតុអភិវឌ្ឍសេដ្ឋកិច្ចជាតិ។
ឱកាសនេះគណប្រតិភូបានជូនអំណោយដល់និស្សិតកម្ពុជាមានលទ្ធផលសិក្សាពូកែចំនួនទឹកប្រាក់ ៥00 ពាន់ដុងក្នុងនិស្សិតម្នាក់ៗ។