សន្និសីទស្ដីពីកិច្ចការវាយតម្លៃដើម្បីទទួលស្គាល់អំពីគុណភាពកម្មវិធីសិក្សាស្របតាមស្តង់ដារអន្តរជាតិ ABET
- សេចក្ដីលម្អិត
- ជំពូក៖ ព័ត៌មាន
- ចេញផ្សាយនា 21 ធ្នូ 2022
- ចុចដង៖ 208
(TVU) – ថ្មីៗនេះមហាវិទ្យាល័យវិស្វកម្ម និងបច្ចេកវិទ្យានៃសាកលវិទ្យាល័យត្រាវិញបានរៀបចំសន្និសីទស្តីពីការវាយតម្លៃដើម្បីទទួលស្គាល់អំពីគុណភាពកម្មវិធីសិក្សាតាមស្តង់ដារអន្តរជាតិ ABET ក្នុងគោលបំណងដើម្បីនឹងដាក់ឱ្យវាយតម្លៃកម្មវិធីសិក្សាដទៃទៀតរបស់មហាវិទ្យាល័យស្របតាមស្ដង់ដារនេះ។
អ្នកចូលរួមថតរូបអនុស្សាវរីយ៍
គោលការណ៍គឺនៅក្នុងឆ្នាំសិក្សា២០២២ - ២០២៣នេះ មហាវិទ្យាល័យវិស្វកម្ម និងបច្ចេកវិទ្យានឹងដាក់ឱ្យវាយតម្លៃនូវកម្មវិធីសិក្សាចំនួន៤ស្របតាមស្តង់ដារ ABET ដែលរួមមាន៖ វិស្វកម្មអគ្គិសនី-អេឡិចត្រូនិច វិស្វកម្មមេកានិច វិស្វកម្មរថយន្ត និងវិស្វកម្មសំណង់។
នៅក្នុងអង្គសន្និសីទនេះផងដែរ មានគ្រូបង្រៀន និងអ្នកឯកទេសជាច្រើនបានធ្វើបទបង្ហាញ និងចូលរួមពិភាក្សាដោយមានប្រធានបទដូចជា៖ «តើឆ្លើយតបនឹងគុណភាព ឬជាប់អំពីគុណភាព» ដោយលោកបណ្ឌិត Dang Diep Minh Tan ជាប្រធានការិយាល័យធានាគុណភាព; «បញ្ហាទូទៅមួយចំនួនអំពីការវាយតម្លៃទទួលស្គាល់គុណភាពកម្មវិធីសិក្សាតាមស្ដង់ដារ ABET» ដោយលោកបណ្ឌិត Vo Phuoc Hung ជាព្រឹទ្ធបុរសរងនៃមហាវិទ្យាល័យវិស្វកម្ម និងបច្ចេកវិទ្យា; «អំពីលក្ខខណ្ឌទី៤៖ ការកែលម្អជាប្រចាំ» ដោយអនុបណ្ឌិត Phan Thi Phuong Nam ជាគ្រូបង្រៀនដេប៉ាតឺម៉ង់បច្ចេកវិទ្យាពត៌មាន; «អំពីលក្ខខណ្ឌទី៦៖ អំពីមហាវិទ្យាល័យនិងសំណួរមួយចំនួនអំពីគណៈកម្មការធ្វើសម្ភាស» ដោយអនុបណ្ឌិត Nguyen Ba Nhiem ជាអនុប្រធានដេប៉ាតឺម៉ង់បច្ចេកវិទ្យាពត៌មាន។
អង្គសន្និសីទទាំងមូលបានទទួលយោបល់ពីប្រតិភូ និងអ្នកឯកទេសអំពីកិច្ចការវាយតម្លៃគុណភាពរបស់សាលា ហើយអង្គសន្និសីទទាំងមូលក៏បានពិភាក្សាទៅលើបញ្ហាលើកកម្ពស់គុណភាពកងជួរអ្នកបង្ហាត់បង្រៀន និងអ្នកគ្រប់គ្រង; ការស្រាវជ្រាវវិទ្យាសាស្ត្រ និងរៀបចំចងក្រងឯកសារ និងសម្ភារៈឧបទេសជាដើម ដើម្បីត្រៀមសម្រាប់ការវាយតម្លៃពីគណៈកម្មការវាយតម្លៃនាពេលខាងមុខនេះ។
ឆ្លងតាមរយៈអង្គសន្និសីទនេះ ដែលជាមូលដ្ឋានគ្រឹះសម្រាប់មហាវិទ្យាល័យវិស្វកម្មនិងបច្ចេកវិទ្យាដើម្បីនឹងធ្វើការកែលម្អនូវគោលដៅបណ្តុះបណ្ដាល លទ្ធផលនៃការសិក្សារំពឹងទុក ក៏ដូចជាលើកកម្ពស់គុណភាពធនធាននានាដោយគ្រប់ជ្រុងជ្រោយ ដើម្បីធ្វើដំណើរការនូវរាល់កម្មវិធីសិក្សាឱ្យបានសមស្របតាមតម្រូវការរបស់សង្គម។
| ABET – (Accreditation Board for Engineering and Technology, Inc.) គឺជាអង្គការក្រៅ រដ្ឋាភិបាលមួយដែលមានឯកទេសក្នុងការវាយតម្លៃកម្មវិធីសិក្សាក្នុងវិស័យវិទ្យាសាស្ត្រអនុវត្ត កុំព្យូទ័រ វិស្វកម្ម និងបច្ចេកវិទ្យាជាដើម។
បច្ចុប្បន្ននេះ សាកលវិទ្យាល័យត្រាវិញមានកម្មវិធីសិក្សាចំនួន១៣ដែលសម្រេចបានលក្ខខណ្ឌស្របតាមស្តង់ដារអន្តរជាតិមួយចំនួនដូចជា AUN-QA, FIBAA និងABETដែលក្នុងនោះជំនាញឯកទេសខាងបច្ចេកវិទ្យាពត៌មានទើបសម្រេចបានលក្ខខណ្ឌស្របតាមស្ដង់ដារ ABET នៅក្នុងឆ្នាំ២០២២នេះ។ |
អត្ថបទដោយ៖ Duong Thi Chieu – Nguyen Thanh Cong
ប្រែសម្រួលដោយ៖ Seha Thach