សាកលវិទ្យាល័យត្រាវិញរួមសហការដើម្បីចាក់វ៉ាក់សាំងបង្ការជំងឺកូវីដ-១៩ ជូនបុគ្គលិក និងកម្មករ
- សេចក្ដីលម្អិត
- ជំពូក៖ ព័ត៌មាន
- ចេញផ្សាយនា 17 សីហា 2021
- ចុចដង៖ 429
សាកលវិទ្យាល័យត្រាវិញបានសហការជាមួយមជ្ឈមណ្ឌលសុខាភិបាលខេត្តត្រាវិញ និងមន្ទីរពេទ្យនៃសាកលវិទ្យាល័យត្រាវិញ ដើម្បីចាក់វ៉ាក់សាំងបង្ការជំងឺកូវីដ-១៩ ដល់បុគ្គលិក និងកម្មករខេត្តត្រាវិញ។
នៅថ្ងៃទី ៥ ទី ៦ និងទី ៧ ខែសីហាឆ្នាំ ២០២១ នៅទីតាំងចាក់វ៉ាក់សាំងការពារជំងឺកូវីដ-១៩ សាកលវិទ្យាល័យត្រាវិញបានចាក់វ៉ាក់សាំងការពារជំងឺកូវីដ-១៩ ដូសទី១ ជូនបុគ្គលិកជាង ២ ពាន់នាក់ដែលកំពុងបម្រើការងារនៅទីភ្នាក់ងារ អង្គភាពរដ្ឋបាលក្នុងខេត្ត និងចាក់ដូសទី២ ជាង១៤០០ នាក់ចាប់ពីថ្ងៃទី៩ ខែសីហា ឆ្នាំ២០២១ ដល់ថ្ងៃទី១១ ខែសីហាឆ្នាំ២០២១។
ទន្ទឹមនឹងនោះ ចាប់ពីថ្ងៃទី១១ ខែសីហាឆ្នាំ២០២១ ដល់ថ្ងៃទី២១ ខែសីហាឆ្នាំ២០២១ ការចាក់វ៉ាក់សាំងដូសទី១ នឹងបន្តផ្តល់ជូនដល់បុគ្គលិក គ្រូបង្រៀន និងកម្មករជាង ៨.០០០ នាក់នៅក្នុងខេត្ត។ ជាពិសេសនៅក្នុងថ្ងៃទី១២ និង១៣ ខែសីហា សាលាក៏បានពន្លឿនការចាក់វ៉ាក់សាំង និងចាក់សម្រេចបាន ៤.០០០នាក់។
សាកលវិទ្យាល័យបានប្រមូលផ្ដុំបុគ្គលិកនិងនិស្សិតជិត ៨០នាក់នៃមហាវិទ្យាល័យវេជ្ជសាស្ត្រ-ឱសថសាស្ត្រ និងមន្ទីរពេទ្យរបស់សាលាដើម្បីជំនួយ និងឧបត្ថម្ភដល់ការងារចាក់វ៉ាក់សាំងនៅសាលា។ ទីតាំងចាក់វ៉ាក់សាំងនៅសាកលវិទ្យាល័យត្រាវិញធានាអនុវត្តយ៉ាងម៉ឺងម៉ាត់តាមបទបញ្ជាស្តីពីការបង្ការ និងប្រឆាំងនឹងជំងឺកូវីដ-១៩។ ដំណើរការនៃការចាក់វ៉ាក់សាំងត្រូវបានអនុវត្តយ៉ាងតឹងរ៉ឹង។ សាកលវិទ្យាល័យត្រាវិញនឹងបន្តការចូលរួមក្នុងការចាក់វ៉ាក់សាំងជាបន្តបន្ទាប់ជូនប្រជាជន។
ក្នុងអំឡុងពេលនៃការចាក់វ៉ាក់សាំងនៅសាកលវិទ្យាល័យត្រាវិញ មន្ទីរពេទ្យនៃសាកលវិទ្យាល័យត្រាវិញបានរៀបចំសម្ភារៈ បរិក្ខារ ឧបករណ៍ ថ្នាំព្យាបាល ថ្នាំសង្គ្រោះបន្ទាន់ ឧបករណ៍វេជ្ជសាស្ត្រសម្រាប់សង្គ្រោះបន្ទាន់ ព្រមទាំងរថយន្តសង្គ្រោះបន្ទាន់ បុគ្គលិកសង្គ្រោះបន្ទាន់ប្រចាំការដើម្បីដោះស្រាយរាល់ការប្រតិកម្មក្រោយពេលដែលចាក់វ៉ាក់សាំង។ ទន្ទឹមជាមួយនេះផងដែរ សាកលវិទ្យាល័យត្រាវិញក៏បានចាត់បុគ្គលិកឱ្យចូលរួមដើម្បីធ្វើការពិនិត្យមុន ការចាក់វ៉ាក់សាំង និងការងារជំនួយផ្សេងៗទៀតផងដែរ។
ក្នុងរយៈពេលកន្លងមក សាកលវិទ្យាល័យបានអនុវត្តយ៉ាងម៉ឺងម៉ាត់នូវសារអប់រំ 5Kធានាបាននូវសុវត្ថិភាពដល់បុគ្គលិក គ្រូបង្រៀន និងនិស្សិតដែលកំពុងសិក្សានៅសាលា។ ក្នុងពេលជាមួយគ្នានេះ សាកលវិទ្យាល័យបានរក្សាល្អសកម្មភាពសិក្សាស្រាវជ្រាវ ការបណ្តុះបណ្តាល និងសកម្មភាពបង្រៀននិងរៀនតាមប្រព័ន្ធអនឡាញសម្រាប់និស្សិតផងដែរ។
ប្រែដោយ៖ Se Ha
