ពិធីចុះហត្ថលេខានិងបើកដំណើរការវិទ្យាស្ថានភាសានិងវប្បធម៌កូរ៉េ KING SEJONG-ត្រាវិញ នៅសាកលវិទ្យាល័យត្រាវិញ
- សេចក្ដីលម្អិត
- ជំពូក៖ ព័ត៌មាន
- ចេញផ្សាយនា 19 សីហា 2021
- ចុចដង៖ 516
(TVU) – នៅព្រឹកថ្ងៃទី១៦ ខែសីហា ឆ្នាំ២០២១ ពិធីចុះហត្ថលេខាតាមប្រព័ន្ធអនឡាញនិងបើកដំណើរការវិទ្យាស្ថានភាសានិងវប្បធម៌កូរ៉េKing Sejong-ត្រាវិញបានប្រព្រឹត្តទៅនៅសាកលវិទ្យាល័យត្រាវិញ។
ពិធីនេះបានប្រព្រឹត្តទៅក្នុងបរិយាកាសដ៏ឧឡារិកដោយមានវត្តមានរបស់លោក Le Van Han - ប្រធានគណៈកម្មាធិការប្រជាជនខេត្តត្រាវិញ និងជាអនុលេខាគណៈកម្មាធិការបក្សខេត្ត។ លោក Nguyen Van Dut - អនុប្រធានផ្នែកកិច្ចការបរទេសនៃការិយាល័យគណៈកម្មាធិការប្រជាជនខេត្ត និងប្រតិភូដែលត្រូវបានអញ្ជើញចូលរួមកិច្ចប្រជុំតាមប្រព័ន្ធអនឡាញដែលរួមមានដូចជា៖ សមាគមមហាវិទ្យាល័យសហគមន៍វៀតណាម បណ្ឌិតសាស្ត្រាចារ្យរង Trinh Sam - ប្រធានវិទ្យាស្ថាន King Sejong-ទីក្រុងហូជីមិញទី២ លោក Lee Jang Hyun - អ្នកគ្រប់គ្រងវិទ្យាស្ថានKing Sejong-ទីក្រុងហូជីមិញទី២ និងតំណាងដែលអញ្ជើញមកពីមន្ទីរ ស្ថាប័ននានារបស់ខេត្ត។
រីឯផ្នែកខាងសាកលវិទ្យាល័យត្រាវិញ អញ្ជើញចូលរួមនិងជាអធិបតីភាពមានបណ្ឌិតសាស្ត្រាចារ្យរង Pham Tiet Khanh សាកលវិទ្យាធិការនៃសាកលវិទ្យាល័យត្រាវិញ រួមជាមួយថ្នាក់ដឹកនាំនៃក្រុមប្រឹក្សា និងថ្នាក់ដឹកនាំនៃករិយាល័យនានានៃសាកលវិទ្យាល័យត្រាវិញក៏បានអញ្ជើញចូលរួមកិច្ចប្រជុំតាមប្រព័ន្ធអនឡាញនេះផងដែរ។
វិទ្យាស្ថានភាសានិងវប្បធម៌កូរ៉េ King Sejong-ត្រាវិញ (វិទ្យាស្ថាន King Sejong-ត្រាវិញ) គឺជាគម្រោងកិច្ចសហប្រតិបត្តិការទៅវិញទៅមករវាងសាកលវិទ្យាល័យត្រាវិញនិងសាកលវិទ្យាល័យSeojeong ប្រទេសកូរ៉េដែលឧបត្ថម្ភថវិកាដោយមូលនិធិនៃវិទ្យាស្ថាន King Sejong និងរដ្ឋាភិបាលកូរ៉េក្នុងគោលបំណងបង្រៀន ភាសានិងផ្សព្វផ្សាយនូវវប្បធម៌កូរ៉េដល់សហគមន៍។ បុគ្គលិកគ្រប់គ្រង និងគ្រូបង្រៀនត្រូវបំពេញតាមតម្រូវការផ្នែកវិជ្ជាជីវៈរបស់មូលនិធិវិទ្យាស្ថាន King Sejong ហើយថ្លៃសិក្សាសមរម្យក្នុងគោលបំណងគឺជំនួយដល់សហគមន៍។ វិទ្យាស្ថានមានកម្មវិធីបង្រៀនភាសាកូរ៉េខុសៗគ្នាជាច្រើនដូចជាការបង្រៀនតាមអនឡាញដែលបង្រៀនដោយគ្រូបង្រៀននៅសាកលវិទ្យាល័យ Seojeong ឬការរួមបញ្ចូលគ្នានៃការបង្រៀនតាមបែបអនឡាញនិងដោយផ្ទាល់ដែលបង្រៀនដោយគ្រូបង្រៀននៅវិទ្យាស្ថាន។ ថ្នាក់បង្រៀងផ្ទាល់ត្រូវបានរៀបចំឡើងនៅមជ្ឈមណ្ឌលព័ត៌មានវិទ្យានិងភាសាបរទេស Victory។ ក្រៅពីនោះ វិទ្យាស្ថានក៏មានកម្មវិធីសិក្សាដែលត្រូវបានធ្វើឡើងសម្រាប់និស្សិតនៃសាកលវិទ្យាល័យត្រាវិញដើម្បីរៀនភាសាកូរ៉េនិងអាចមានសមត្ថភាពប្រឡងទទួលបានវិញ្ញាបនបត្រ TOPIK កម្រិត៣ ហើយអាចគ្រប់លក្ខណៈដើម្បីបានទទួលស្គាល់ជាភាសាបរទេសដែលមិនមែនជាឯកទេស។
នៅក្នុងពិធីនេះផងដែរ បណ្ឌិតសាស្ត្រាចារ្យរង Pham Tiet Khanh សាកលវិទ្យាធិការនៃសាកលវិទ្យាល័យត្រាវិញបានប្រគល់សេចក្តីសម្រេចតែងតាំងបណ្ឌិត Chau Thi Hoang Hoa - អនុប្រធានការិយាល័យសហប្រតិបត្តិការអន្តរជាតិនៃសាកលវិទ្យាល័យត្រាវិញជាប្រធានវិទ្យាស្ថានKing Sejong។
បណ្ឌិតសាស្រ្តាចារ្យរង Pham Tiet Khanh បានមានប្រសាសន៍ថា «សាកលវិទ្យាល័យត្រាវិញសូមគោរពចំពោះការគាំទ្រនិងជំនួយពីសំណាក់ បណ្ឌិតសាស្រ្តាចារ្យរង Trinh Sam លោក Lee Jang Hyun សាស្ត្រាចារ្យនៃវិទ្យាស្ថាន King Sejong-ទីក្រុងហូជីមិញលេខ២ លោក Park Young Arm មូលនិធិវិទ្យាស្ថាន King Sejong រួមជាមួយការចូលរួមនិងការជឿទុកចិត្តពីសំណាក់ថ្នាក់ដឹកនាំខេត្ត ក៏ដូចជាពីអង្គការ ស្ថាប័ននានានិងសមាជិកនៃសមាគមមហាវិទ្យាល័យសហគមន៍វៀតណាមនិងការិយាល័យនានានៃសាកលវិទ្យាល័យត្រាវិញក្នុងការអនុវត្តគម្រោងនេះ ដើម្បីឱ្យវិទ្យាស្ថានអាចសម្រេចបាននូវបេសកកម្មរបស់ខ្លួនគឺបង្រៀននិងផ្លាស់ប្តូរវប្បធម៌ ហើយព្រមទាំងជាទីកន្លែងសម្រាប់តភ្ជាប់ ផ្លាស់ប្តូរវប្បធម៌វៀតណាម-កូរ៉េនៅខេត្តត្រាវិញនិងខេត្តជិតខាង។ ប្រការនេះបានរួមចំណែកជួយឱ្យសាកលវិទ្យាល័យត្រាវិញសម្រេចបានជោគជ័យក្នុងតួនាទីជាច្រកទ្វារនៃកិច្ចសហប្រតិបត្តិការអន្តរជាតិរបស់ខេត្តត្រាវិញ»។
លោក Le Van Han - ប្រធានគណៈកម្មាធិការប្រជាជនខេត្តត្រាវិញ និងជាអនុលេខាបក្សខេត្តបានមានប្រសាសន៍ថា៖ «ខេត្តត្រាវិញមានតម្រូវការនិងសក្តានុពលខ្លាំងសម្រាប់កិច្ចសហប្រតិបត្តិការអន្តរជាតិ។ បច្ចុប្បន្នសហគ្រាសកូរ៉េគឺជាដៃគូមួយក្នុងចំណោមដៃគូដែលមានទុនវិនិយោគធំនៅខេត្តត្រាវិញ។ ជាងនេះទៅទៀតនៅខេត្តត្រាវិញក៏មានយុវជនជាច្រើនដែលស្រឡាញ់នូវវប្បធម៌កូរ៉េហើយចង់ស្វែងរកឱកាសដើម្បីទៅសិក្សានិងធ្វើការនៅប្រទេសកូរ៉េផងដែរ។ ដូច្នេះ ការបង្កើតវិទ្យាស្ថាន Sejong-ត្រាវិញដែលជាទីកន្លែងបង្រៀននិងផ្លាស់ប្តូរវប្បធម៌ដូច្នេះគឺជាការចាំបាច់ណាស់។ ខ្ញុំសង្ឃឹមថាឆ្លងតាមរយៈគម្រោងនេះ ការបង្រៀននិងរៀនភាសាកូរ៉េនៅសាកលវិទ្យាល័យត្រាវិញនឹងមានការអភិវឌ្ឍប្រកបដោយស្ថិរភាពនិងរួមគ្នាជាមួយមន្ទីរអប់រំនិងបណ្តុះបណ្តាលដើម្បីបង្រៀនភាសាកូរ៉េនៅតាមគ្រឹះស្ថានអប់រំក្នុងនាមជាភាសាបរទេស។ វិទ្យាស្ថានគប្បីមានកម្មវិធីជាច្រើនដើម្បីជំនួយដល់អ្នកដែលកំពុងធ្វើការនៅតាមមណ្ឌលឧស្សាហកម្ម ពលករធ្វើការតាមរដូវកាលនៅប្រទេសកូរ៉េដោយសហការជាមួយមន្ទីរការងារយុទ្ធជនពិការនិងសង្គមកិច្ច ឬគ្រួសារដែលបានរៀបការមានទំនាក់ទំនងវៀតណាម-កូរ៉េ»។
ការបង្កើតវិទ្យាស្ថានភាសានិងវប្បធម៌កូរ៉េKing Sejong នៅសាកលវិទ្យាល័យត្រាវិញគឺជាឱកាសដ៏មានតម្លៃសម្រាប់សាកលវិទ្យាល័យក្នុងការជំរុញចលនានៃការរៀនភាសានិងវប្បធម៌កូរ៉េសម្រាប់និស្សិតនិងសម្រាប់សហគមន៍។ ទន្ទឹមនឹងនោះ ព្រឹត្តិការណ៍នេះគឺជារបត់ដ៏សំខាន់មួយសម្រាប់ទំនាក់ទំនងកិច្ចសហប្រតិបត្តិការដែលកំពុងតែរីកចម្រើនរបស់សាកលវិទ្យាល័យត្រាវិញជាមួយដៃគូដែលមកពីប្រទេសកូរ៉េផងដែរ៕
_____
ប្រែដោយ៖ Seha Thach
