ប្រអប់បាយអាចរលួយដោយខ្លួនឯង ជាផលិតផលដែលផលិតចេញពីកញ្ជាក់អំពៅ
- សេចក្ដីលម្អិត
- ជំពូក៖ ព័ត៌មាន
- ចេញផ្សាយនា 07 វិច្ឆិកា 2021
- ចុចដង៖ 448
គំនិតផ្ដួចផ្ដើម «ផលិតប្រអប់បាយដែលអាចរលួយដោយខ្លួនឯង» របស់ Nguyen Minh Chanh និង Huynh Phat Tai ជានិស្សិតផ្នែកបសុពេទ្យវគ្គឆ្នាំ២០២០ត្រូវបានជាប់លេខ២ក្នុងសម័យប្រឡង «គំ និតកែច្នៃបៃតង» របស់ខេត្តត្រាវិញឆ្នាំ២០២១ ហើយការផ្ដួចផ្ដើមនេះផងដែរក៏បានរួមចំណែកក្នុងការដោះស្រាយបញ្ហាកខ្វក់បរិស្ថាននាពេលបច្ចុប្បន្ន។
ប្រើប្រាស់វត្ថុធាតុដើមដែលមានស្រាប់ដើម្បីការពារបរិស្ថាន
ផលិតផលនេះត្រូវបានផលិតចេញពីកញ្ជាក់អំពៅ ហើយវាក៏អាចរលួយក្នុងដីដោយខ្លួនឯង ដោយមិនជះឥទ្ធិពលទៅលើសត្វ និងសុខភាពរបស់មនុស្ស។ ផលិតផលនេះអាចការពារការកើតឡើងរបស់ពពួកបាក់តេរី និងមិនដុះផ្សិតដែលជាកត្តាធានានូវគុណភាព និងសុវត្ថិភាពសម្រាប់អ្នកប្រើប្រាស់។
គំនិតកែច្នៃនេះត្រូវបានបង្កើតឡើងក្នុងគោលបំណងដើម្បីកាត់បន្ថយនូវការបោះចោលសំរាម ក៏ដូចជាដើម្បីការពារបរិស្ថាន ការពារសុខភាពមនុស្ស និងជាប្រភពផ្ដល់នូវជីជាតិឱ្យរុក្ខជាតិទៀតផង។ ជាងនេះទៅទៀត ការផលិតនេះគឺអាចប្រើប្រាស់វត្ថុធាតុដើមដែលមានស្រាប់ និងដ៏សម្បូរពីតំបន់ជិតខាង។ ប្រការនេះអាចនឹងដោះស្រាយនូវបញ្ហាការងារ និងសេដ្ឋកិច្ចសម្រាប់ប្រជាជន។
ដោយហេតុថាផលិតផលនេះត្រូវបានផលិតចេញពីវត្ថុធាតុដើមជាកាកសំណល់ និងពីធម្មជាតិសុទ្ធសាធ ហេតុដូច្នេះហើយអាចនឹងដោះស្រាយបាននូវបញ្ហាកខ្វក់បរិស្ថាន។ ប្រសិនបើពពួកសត្វស៊ីចូលទៅក្នុងពោះក៏មិនមានឥទ្ធិពលអ្វីដែរ ហើយក្រោយពេលដែលប្រើប្រាស់រួចយើងក៏អាចកប់ទៅក្នុងដីដើម្បីបង្កើតបានជាជីជាតិសម្រាប់រុក្ខជាតិទៀតផង។
ផលិតផលនេះប្រកបដោយភាពច្នៃប្រឌិតនិងអាចធ្វើទៅបាន
ប្អូន Nguyen Minh Chanh ជាប្រធាននៃគំនិតច្នៃប្រឌិតនេះបានឱ្យដឹងថា៖ បច្ចុប្បន្ន ការកើនឡើងនូវនគរូបនីយកម្មមួយថ្ងៃកាន់តែខ្លាំងនៅតាមទីក្រុងធំៗ។ ជាមួយនេះផងដែរគឺជាការកើនឡើងនៃមធ្យោបាយធ្វើដំណើរឯកជនបានធ្វើឱ្យបរិស្ថានមួយថ្ងៃកាន់តែកខ្វក់ខ្លាំងឡើងៗ ពិសេសគឺនៅតំបន់ទីក្រុងធំៗ។
ក្រុមអ្នកផ្ដួចផ្ដើមគំនិតនេះបានឱ្យដឹងថា៖ ទម្លាប់ប្រើប្រាស់របស់ដែលផលិតពីប្លាស្ទិកបានធ្វើឱ្យកខ្វក់បរិស្ថានមួយថ្ងៃកាន់តែធ្ងន់ធ្ងរ អ៊ីចឹងទេយើងគប្បីផ្លាស់ប្តូរទម្លាប់ប្រើប្រាស់ដោយយកវត្ថុធាតុដើមដែលសុវត្ថិភាពមកប្រើជំនួសវិញ ហើយបច្ចុប្បន្ននេះ ផលិតផលដែលមានគុណភាព ល្អសម្រាប់សុខភាព និងមានលក្ខណៈ «បៃតង» បានក្លាយជានិន្នាការមួយរបស់មនុស្សគ្រប់រូប។ ពិសេសគឺក្នុងពេលដែលមនុស្សទូទាំងពិភពលោកអំពាវនាវឱ្យកាត់បន្ថយក្នុងការប្រើប្រាស់ថង់ប្លាស្ទិក ហើយនេះក៏ជាផលិតផលដែលល្អសម្រាប់បរិស្ថានដែលទទួលបានការចាប់អារម្មណ៍យ៉ាងខ្លាំងពីអ្នកគ្រប់គ្នា។ ដូច្នេះហើយគំនិតនេះក៏បានផ្តួចផ្ដើមឡើងដោយមានគោលបំណងការពារសុខភាព ការពារបរិស្ថាន និងធម្មជាតិ។
អំពីរបៀបនៃការផលិត ប្អូន Huynh Tan Tai បានឱ្យដឹងថា៖ ការផលិតបានប្រើប្រាស់បច្ចេកវិទ្យា និងឧបករណ៍ផលិតឯកទេសដើម្បីកាត់បន្ថយហានិភ័យ និងងាយស្រួលក្នុងការផ្តួចផ្ដើមគំនិត។
ក្រោយពេលដែលគាបយកទឹក កញ្ជាក់អំពៅនឹងត្រូវបានប្រមូលនិងកែច្នៃជាលើកដំបូង រួចមកនឹងត្រូវបានត្រួតពិនិត្យអំពីគុណភាពរបស់កញ្ជាក់អំពៅដើម្បីធានាបានគុណភាពសម្រាប់ការផលិតដែលក្នុងនោះកញ្ជាក់អំពៅមិនត្រូវមានការកកើតរបស់ពពួកអតិសុខុមប្រាណនាំឲ្យបំផ្លាញកញ្ជាក់អំពៅ។
កញ្ជាក់អំពៅនៅពេលដែលបានពិនិត្យរួចរាល់នឹងកិនឱ្យហ្មត់ រួចមករម្ងាប់មេរោគក្នុងសីតុណ្ហភាព និងសម្ពាធខ្ពស់។ បន្ទាប់មកកញ្ជាក់អំពៅនឹងត្រូវបានធ្វើសាប៊ូកម្មដើម្បីបំបែកទៅជាសរសៃ ប្រការនេះនឹងធ្វើឱ្យការតភ្ជាប់របស់សរសៃកញ្ជាក់អំពៅកាន់តែខ្លាំងឡើង។ បន្ទាប់មកទៀតនឹងបន្ថែមវត្ថុធាតុផ្សំផ្សេងៗទៀតដើម្បីការពារកុំឱ្យជ្រាបទឹក រូចផ្លាស់ប្តូរអត្រាជាតិសំណើមដើម្បីងាយស្រួលក្នុងការផលិតជាប្រអប់។
ដំណាក់កាលចុងក្រោយគឺគាបទៅជាប្រអប់ នេះគឺជាដំណាក់កាលសំខាន់បំផុតព្រោះវានឹងបញ្ចេញចោលនូវជាតិទឹក៩០%ពីផលិតផលដោយគួបផ្សំជាមួយការប្រើកម្ដៅដើម្បីបង្កើតជាផលិតផលចុងក្រោយ។ បន្ទាប់មកទៀតគឺការត្រួតពិនិត្យចុងក្រោយ និងបែងចែកទៅជាប្រភេទផលិតផលខុសៗគ្នា ដែលក្នុងនោះគឺពិនិត្យរកជាតិដែកដើម្បីធានាសុវត្ថិភាពអាហារនៅពេលក្រោយ ក្រោយមកទៀតគឺវេចខ្ចប់និងនាំចេញទៅទីផ្សារ។
ចំណុចពិសេសរបស់ផលិតផលនេះគឺផលិតពីវត្ថុធាតុដើមមកពីធម្មជាតិ ល្អសម្រាប់សុខភាពមនុស្សនិងបរិស្ថាន។ ផលិតផលនេះត្រូវបានរំពឹងទុកថានឹងក្លាយជាផលិតផលពេញនិយមក្នុងថ្ងៃអនាគត៕
បកប្រែដោយ៖Seha Thach
