សាកលវិទ្យាល័យត្រាវិញ បើកពិធីដាក់ឱ្យពិនិត្យវាយតម្លៃគុណភាពកម្មវិធីសិក្សាតាមស្ដង់ដា ABET សម្រាប់បរិញ្ញាបត្របច្ចេកវិទ្យាព័ត៌មាន
- សេចក្ដីលម្អិត
- ជំពូក៖ ព័ត៌មាន
- ចេញផ្សាយនា 18 ធ្នូ 2021
- ចុចដង៖ 361
TVU – ថ្មីៗនេះ សាកលវិទ្យាល័យត្រាវិញបានរៀបចំបើកពិធីដាក់ឱ្យពិនិត្យវាយតម្លៃគុណភាពកម្មវិធីសិក្សាតាមស្ដង់ដា ABET (Accreditation Board for Engineering and Technology – អង្គការពិនិត្យវាយតម្លៃកម្មវិធីសិក្សាឯកទេសខាងវិស្វកម្ម និងបច្ចេកវិទ្យានៃសហរដ្ឋអាមេរិក)។ កម្មវិធីសិក្សាដែលត្រូវបានដាក់ឱ្យវាយតម្លៃគឺកម្មវិធីសិក្សាបរិញ្ញាបត្របច្ចេកវិទ្យាព័ត៌មាន(Information Technology)នៃមហាវិទ្យាល័យបច្ចេកវិទ្យា សាកលវិទ្យាល័យត្រាវិញ។
សម្រាប់ការវាយតម្លៃកម្មវិធីសិក្សានេះ អ្នកជំនាញការខាងពិនិត្យវាយតម្លៃរបស់ ABET រួមមាន បណ្ឌិត Jeffrey Alan Lasky, បណ្ឌិត Peter ChunYu Yau និង បណ្ឌិត Chia-Chi Teng បានចាប់ផ្ដើមកិច្ចការពិនិត្យនិងវាយតម្លៃពីភាគីខាងក្រៅ ពីថ្ងៃទី៥ដល់ថ្ងៃទី៩ ខែកញ្ញា ឆ្នាំ២០២១កន្លង។
កម្មវិធីសិក្សាថ្នាក់បរិញ្ញាបត្រ ផ្នែកបច្ចេកវិទ្យាព័ត៌មាននៃសាកលវិទ្យាល័យត្រាវិញត្រូវបានវាយតម្លៃទៅលើលក្ខណវិនិច្ឆ័យចំនួន៨ រួមមាន៖ អ្នកសិក្សា (Students), គោលដៅនៃកម្មវិធីសិក្សា (Program Educational Objectives), លទ្ធផលសិក្សាដែលរំពឹងទុក (Student Outcomes), ការកែលម្អជានិរន្ត (Continuous Improvement), កម្មវិធីសិក្សា (Curriculum), បុគ្គលិកបណ្ដុះបណ្ដាល (Faculty), សម្ភារៈបរិក្ខា (Facilities), ការគាំទ្រពីសាកលវិទ្យាល័យ (Institutional Support) និងលក្ខណវិនិច្ឆ័យផ្សេងៗទៀតនៃកម្មវិធីសិក្សា (Program Criteria)។
ABET ជាអង្គការពិនិត្យវាយតម្លៃកម្មវិធីសិក្សាឯកទេសខាងបច្ចេកទេស និងបច្ចេកវិទ្យានៃសហរដ្ឋអាមេរិក។ នេះគឺជាអង្គភាពពិនិត្យវាយតម្លៃកម្មវិធីសិក្សាមួយដ៏មានកិត្យានុភាពនៅលើពិភពលោកដែលត្រូវបានសហគមន៍ធុរកិច្ច និងសាកលវិទ្យាល័យនានា ឱ្យតម្លៃល្អក្រៃលែង។
អ្នកជំនាញឱ្យដឹងថា សាកលវិទ្យាល័យណាក៏ដោយ នៅពេលដែលកម្មវិធីសិក្សាណាមួយត្រូវបានទទួលស្គាល់ស្របតាមស្តង់ដា ABET គឺជាការទទួលស្គាល់ជាអន្តរជាតិសម្រាប់គុណភាពបណ្តុះបណ្តាលនៃកម្មវិធីដែលបានវាយតម្លៃ ដោយធានាបាននូវគុណភាពនៃសម្ភារៈបរិក្ខា បុគ្គលិកបណ្ដុះបណ្ដាល កម្មវិធីសិក្សាជឿនលឿន និងវិធីសាស្រ្តបង្រៀនសកម្ម ជួយសិស្សឱ្យអភិវឌ្ឍសមត្ថភាពផ្ទាល់ខ្លួន និងបំពេញតម្រូវការរបស់សិស្ស បង្កើនតម្រូវការជ្រើសរើសបុគ្គលិករបស់សហគ្រាស។
អាស្រ័យហេតុនេះហើយ និស្សិតសាកលវិទ្យាល័យត្រាវិញណា ដែលកំពុងសិក្សាមុខជំនាញដែលបានអង្គការABETទទួលស្គាល់នោះ នឹងមានអត្ថប្រយោជន៍ជាច្រើននៅពេល ស្វែងរកការងារធ្វើ ក៏ដូចជាធ្វើសមាហរណកម្មជាមួយទីផ្សារការងារអន្តរជាតិ និងអភិវឌ្ឍខ្លួនឯងបានល្អ។
នាពេលកន្លងមក សាកលវិទ្យាល័យត្រាវិញមានកម្មវិធីសិក្សាចំនួន ១១ ត្រូវបានការទទួលស្គាល់អំពីគុណភាពបណ្ដុះបណ្ដាលស្របតាមស្តង់ដាអន្តរជាតិដូច AUN-QA និង FIBAA។ ហើយនេះជាសាកលវិទ្យាល័យមួយក្នុងចំណោមសាកលវិទ្យាល័យឈានមុខនៅតំបន់វាលរាបទន្លេគឺវឡុង ដោយមានកម្មវិធីសិក្សាជាច្រើនដែលសម្រេចបានការទទួលស្គាល់គុណភាពបណ្ដុះបណ្ដាលតាមស្តង់ដាអន្តរជាតិ AUN-QA និង FIBAA។ ក្នុងនោះមានកម្មវិធីសិក្សាចំនួន៥ បានសម្រេចស្របតាមស្តង់ដានៃ AUN-QA គឺ បរិញ្ញាបត្រកសិកម្មបរិញ្ញាបត្រវារីវប្បកម្ម បសុពេទ្យ បរិញ្ញាបត្រគិលានុបដ្ឋាក និង បរិញ្ញាបត្រភាសាខ្មែរ។ ក្រៅពីនោះ មានកម្មវិធីសិក្សាចំនួន៦ ដែលសម្រេចបានស្របតាមស្តង់ដាគុណភាពបណ្ដុះបណ្ដាលនៃ FIBAA រួមមាន៖ បរិញ្ញាបត្រគ្រប់គ្រងធុរកិច្ច បរិញ្ញាបត្រសេដ្ឋកិច្ច បរិញ្ញាបត្រគណនេយ្យ និងបរិញ្ញាបត្រហិរញ្ញវត្ថុ-ធនាគារ ព្រមទាំងកម្មវិធីសិក្សាថ្នាក់អនុបណ្ឌិតគ្រប់គ្រងពាណិជ្ជកម្ម អនុបណ្ឌិតគ្រប់គ្រងសេដ្ឋកិច្ច។ ក្នុងរយៈកាលខាងមុខនេះ សាកលវិទ្យាល័យត្រាវិញនឹងបន្តការដាក់ឱ្យពិនិត្យវាយតម្លៃតាមស្ដង់ដា AUN-QA ចំពោះកម្មវិធី វិទ្យាសាស្ត្រសុខាភិបាល និងជាស្ដង់ដា ABET ចំពោះមុខជំនាញវិស្វកម្ម និងបច្ចេកវិទ្យានានា។
អត្ថបទដោយ៖ Tin Di, Van Khanh
ប្រែសម្រួលដោយ៖ Seha Thach