សំណើបន្តរក្សានូវគំរូមហាវិទ្យាល័យសហគមន៍
- សេចក្ដីលម្អិត
- ជំពូក៖ ព័ត៌មាន
- ចេញផ្សាយនា 06 មេសា 2022
- ចុចដង៖ 411
មហាសន្និបាតនៃសមាគមមហាវិទ្យាល័យសហគមន៍វៀតណាម អាណត្តិ ២០២១-២០២៦
នារសៀលថ្ងៃទី៣១ ខែមីនា នៅមហាវិទ្យាល័យសហគមន៍ Ha Tay (ស្រុក Chuong My ទីក្រុងហាណូយ) សមាគមមហាវិទ្យាល័យសហគមន៍វៀតណាមបានចាត់តាំងនូវមហាសន្និបាតសមាគមមហាវិទ្យាល័យសហគមន៍វៀតណាមអាណត្តិ ២០២១-២០២៦។ ក្នុងអាណត្តិកាលថ្មីនេះ សមាគមមហាវិទ្យាល័យសហគមន៍វៀតណាមស្នើឱ្យបន្តរក្សានូវគំរូ «មហាវិទ្យាល័យសហគមន៍» នាពេលខាងមុខ។
យោងតាមពត៌មានពីគណៈចាត់តាំង បន្ទាប់ពីអស់រយៈពេល២១ ឆ្នាំនៃការអនុវត្តគំរូ «មហាវិទ្យាល័យសហគមន៍» និងអស់រយៈពេល១៥ ឆ្នាំនៃការកកើតនិងអភិវឌ្ឍន៍ ជាពិសេសគឺក្នុងអាណត្តិចុងក្រោយ ២០១៦-២០២១ គណៈប្រតិបត្តិការនៃសមាគមមហាវិទ្យាល័យសហគមន៍វៀតណាម រួមជាមួយនឹងបណ្ដាអង្គភាពជាសមាជិកបានសម្រេចនូវជោគជ័យសំខាន់ៗជាច្រើន។
កាលដើមឡើយ សមាគមមហាវិទ្យាល័យសហគមន៍វៀតណាមរួមមានសមាជិកចំនួន១១ ហើយគិតមកដល់បច្ចុប្បន្ននេះគឺមានសមាជិកជាង៨០។ ប្រការនេះឱ្យឃើញថា អង្គការ និងគំរូប្រតិបត្តិការរបស់សមាគមបានទាក់ទាញការយកចិត្តទុកដាក់យ៉ាងខ្លាំងពីបណ្ដាសាកលវិទ្យាល័យ មហាវិទ្យាល័យ សាលាមធ្យមសិក្សា អ្នកជំនាញ និងគ្រូបង្រៀនឆ្នើមនៅទូទាំងប្រទេស។
ចំនួនដៃគូអន្តរជាតិដែលចុះហត្ថលេខាលើកិច្ចព្រមព្រៀងសហប្រតិបត្តិការ និងចូលរួមក្នុងសកម្មភាពជាមួយសមាគមកំពុងកើនឡើងជារៀងរាល់ឆ្នាំ។ តួយ៉ាងដូចជានៅក្នុងឆ្នាំ២០០៦ សមាគមមានទំនាក់ទំនងសហប្រតិបត្តិការជាមួយអង្គការអន្តរជាតិត្រឹមតែ៦ប៉ុណ្ណោះ រហូតមកដល់ចុងឆ្នាំ២០២១ ចំនួនអង្គការអន្តរជាតិដែលក្លាយជាដៃគូ និងអនុវត្តសកម្មភាពសហប្រតិបត្តិការជាមួយសមាគម និងអង្គភាពសមាជិកគឺកើនឡើងដល់៧៨អង្គភាព (កើន១២ដង)។ សមាគមរៀបចំសកម្មភាពកិច្ចសហប្រតិបត្តិការអន្តរជាតិជាច្រើន កិច្ចសហប្រតិបត្តិការរវាងសមាជិកមានប្រសិទ្ធភាពខ្ពស់ ជួយតភ្ជាប់ និងបង្កើតលក្ខណៈងាយស្រួលសម្រាប់សមាជិកដើម្បីអភិវឌ្ឍរួមគ្នា។
ក្នុងអាណត្តិឆ្នាំ២០១៦-២០២១ សមាគមបានធ្វើសេនាធិការ និងលើកឡើងនូវរបប និងគោលនយោបាយដល់ក្រសួង មន្ទីរ និងសាខានានា អំពីបញ្ហាពាក់ព័ន្ធទៅនឹងគោលនយោបាយអភិវឌ្ឍន៍វិស័យឧត្តមសិក្សា ការអប់រំវិជ្ជាជីវៈជាដើម ដែលក្នុងនោះមានបញ្ហាទាក់ទងដោយផ្ទាល់ទៅនឹងការអភិវឌ្ឍន៍គំរូមហាវិទ្យាល័យសហគមន៍។
តាមប្រសាសន៍នៃសាស្ត្រាចារ្យរង បណ្ឌិត Pham Tiet Khanh ដែលជាប្រធានសមាគមមហាវិទ្យាល័យសហគមន៍វៀតណាមគឺ បន្ទាប់ពីធ្វើដំណើរការអស់រយៈពេល១៥ឆ្នាំ ដោយគោលបំណងដើម្បីផលប្រយោជន៍រួម និងការរីកចម្រើនរបស់សមាជិកនិងសមាគម សមាគមមហាវិទ្យាល័យសហគមន៍វៀតណាមតែងតែឆ្ពោះទៅរក និងបន្តអភិវឌ្ឍគំរូសិក្សាពេញមួយជីវិត រួមចំណែកយ៉ាងសកម្មដល់ការអភិវឌ្ឍន៍សេដ្ឋកិច្ចសង្គមរបស់វៀតណាម និងបុគ្គលម្នាក់ៗក្នុងសហគមន៍ លើកកម្ពស់ការយល់ដឹងនៃសហគមន៏ដើម្បីយល់ដឹងឱ្យបានត្រឹមត្រូវអំពីតួនាទីរបស់គំរូមហាវិទ្យាល័យសហគមន៍ក្នុងការអភិវឌ្ឍន៍ធនធានមនុស្ស និងសេដ្ឋកិច្ច សង្គមកិច្ចរបស់ប្រទេសជាតិ។
ទិដ្ឋភាពអង្គសន្និបាត
មហាសន្និបាតអាណត្តិ២០២១-២០២៦ បានធ្វើឡើងក្នុងបរិបទដែលវិស័យអប់រំ និងបណ្តុះបណ្តាលទូទាំងប្រទេសកំពុងរងផលប៉ះពាល់យ៉ាងខ្លាំងពីជំងឺកូវិដ-១៩។ សកម្មភាពជាច្រើនរបស់សមាគម ជាពិសេសសកម្មភាពសហប្រតិបត្តិការអន្តរជាតិ និងជំរុញអភិវឌ្ឍន៍គម្រោងការបានជួបប្រទះការលំបាកយ៉ាងច្រើន។ ទោះជាយ៉ាងណាក៏ដោយ សមាគម និងអង្គភាពជាសមាជិកតែងតែព្យាយាម និងសម្របខ្លួនដើម្បីជម្នះការលំបាក និងរក្សាបន្តអនុវត្តសកម្មភាពរបស់អង្គភាពរបស់ខ្លួន។
អង្គសន្និបាតរបស់សមាគមលើកនេះមានភារកិច្ចក្នុងការបូកសរុប និងវាយតម្លៃគ្រប់ជ្រុងជ្រោយនូវលទ្ធផលដែលសម្រេចបាន ក៏ដូចជាចំណុចខ្វះខាតផងដែរ ហើយឆ្លងតាមរយៈនោះអាចនឹងរៀនសូត្របាននូវបទពិសោធន៍ពីការអនុវត្តសេចក្តីសម្រេចចិត្តនៃមហាសន្និបាតអាណត្តិ២០១៦-២០២១ របស់សមាគម។ ទន្ទឹមនឹងនោះគឺធ្វើការកែប្រែ បំពេញបន្ថែមប្រការមួយចំនួននៅក្នុងលក្ខន្តិកៈនៃសមាគម ក៏ដូចជាដាក់ចេញនូវទិសដៅ ភារកិច្ចសម្រាប់ការអភិវឌ្ឍន៍សមាគមក្នុងដំណាក់កាលឆ្នាំ២០២១-២០២៦។
នៅក្នុងអាណត្តិឆ្នាំ២០១៦-២០២១ ក្នុងនិន្នាការនៃការសម្រួលដើម្បីបង្កើនប្រសិទ្ធភាពប្រតិបត្តិការ មូលដ្ឋានមួយចំនួនបានអនុវត្តដើម្បីប្រមូលផ្តុំគ្រឹះស្ថានអប់រំវិជ្ជាជីវៈរួមគ្នាតែមួយដើម្បីក្លាយជាមហាវិទ្យាល័យបង្រួបបង្រួមតែមួយគត់។ សាលាមួយចំនួនបន្ទាប់ពីការបញ្ចូលគ្នានៅតែរក្សាឈ្មោះចាស់ដដែលរួមមាន៖ មហាវិទ្យាល័យសហគមន៍ Dong Thap មហាវិទ្យាល័យសហគមន៍ Ca Mau សាលាខ្លះដែលធ្វើការប្តូរឈ្មោះ ប៉ុន្តែទស្សនវិជ្ជានៃការអប់រំ និងគំរូប្រតិបត្តិការនៃមហាវិទ្យាល័យសហគមន៍គឺនៅតែរក្សាដដែល។
ដោយឈរលើមូលដ្ឋានគឺបន្តការរក្សានិងអភិវឌ្ឍនូវគំរូ «មហាវិទ្យាល័យសហគមន៍» ក៏ដូចជាបង្កើតលក្ខណៈងាយស្រួលសម្រាប់គំរូឱ្យកាន់តែអភិវឌ្ឍន៍ជាងទៀត សមាគមមហាវិទ្យាល័យសហគមន៍វៀតណាមស្នើឱ្យបន្តរក្សាគំរូ និងរក្សាម៉ាកយីហោ «មហាវិទ្យាល័យសហគមន៍» សម្រាប់មហាវិទ្យាល័យសហគមន៍ ហើយនឹងបង្កើតសាលាមួយចំនួនទៀតតាមគំរូប្រតិបត្តិការនៃមហាវិទ្យាល័យសហគមន៍នាពេលខាងមុខ។ ទន្ទឹមនឹងនោះ ការសាកល្បងបង្កើតក្រុមប្រឹក្សាវាយតម្លៃកម្មវិធីសិក្សាដោយឈរលើមូលដ្ឋាននៃការប្រមូលផ្តុំអ្នកវិទ្យាសាស្ត្រ និងសាស្ត្រាចារ្យដែលមានសមត្ថភាពពីសាកលវិទ្យាល័យជាសមាជិក ដើម្បីបើកមុខជំនាញថ្មីពីកម្រិតមធ្យមសិក្សាដល់កម្រិតបរិញ្ញា។
ជាពិសេស មហាសន្និបាតលើកនេះនឹងបោះឆ្នោតជ្រើសរើសក្រុមប្រឹក្សាភិបាលថ្មី ដែលជាគ្រូបង្រៀនឆ្នើម និង អស់ពីចិត្តក្នុងការងារដើម្បីបន្តការកសាង និងអភិវឌ្ឍសមាគម និងគំរូមហាវិទ្យាល័យសហគមន៍នៅវៀតណាម។
ប្រភពអត្ថបទ៖ https://nhandan.vn/tin-tuc-gia000o-duc/de-xuat-tiep-tuc-duy-tri-mo-hinh-truong-cao-dang-cong-dong-691478/
ប្រែសម្រួលដោយ៖ Seha Thach