សាកលវិទ្យាល័យត្រាវិញ - ក្តីប្រាថ្នាដើម្បីឆ្ពោះទៅកាន់ពិភពលោក
- សេចក្ដីលម្អិត
- ជំពូក៖ ព័ត៌មាន
- ចេញផ្សាយនា 19 ឧសភា 2022
- ចុចដង៖ 296
ឆ្លងកាត់រយៈកាលជាង២០ឆ្នាំនៃការបង្កើត និងអភិវឌ្ឍន៍ពីមហាវិទ្យាល័យសហគមន៍ត្រាវិញ និងការអនុវត្តដ៏ជោគជ័យនៃគម្រោងមហាវិទ្យាល័យសហគមន៍វៀតណាម-កាណាដា សាកលវិទ្យាល័យត្រាវិញ (TVU)ដើរទន្ទឹមជាមួយការកសាង និងការអភិវឌ្ឍរបស់ខេត្ត បន្តការបញ្ជាក់នូវគោលដៅ និងបេសកកម្មរបស់ខ្លួនក្នុងការបណ្តុះបណ្តាលធនធានមនុស្សប្រកបដោយគុណភាពខ្ពស់សម្រាប់ខេត្ត និងតំបន់។ សាកលវិទ្យាល័យត្រាវិញមានបេសកកម្ម និងសេចក្តីប្រាថ្នាដើម្បីឈានទៅដល់ពិភពលោកក្នុងការបណ្តុះបណ្តាលធនធានមនុស្ស និងស្រាវជ្រាវវិទ្យាសាស្ត្រ ក៏ដូចជាការផ្ទេរវិទ្យាសាស្ត្រ និងបច្ចេកវិទ្យាប្រកបដោយគុណភាពទៅកាន់ទីផ្សារក្នុងស្រុក និងអន្តរជាតិ។
សាកលវិទ្យាល័យ ស្ថិតនៅកណ្តាលទីក្រុង (រូបភាព៖ Dong Lam)
ខេត្តត្រាវិញមានឆ្នេរសមុទ្រប្រវែងជាង ៦៥គីឡូម៉ែត្រ ហ៊ុំព័ទ្ធដោយទន្លេ Tienនិងទន្លេ Hauដែលមានច្រកទ្វារចំនួន ២គឺ Co Chienនិង Cung Hau។ បន្ទាប់ពី ៣០ ឆ្នាំនៃការបង្កើតខេត្តឡើងវិញ ទន្ទឹមនឹងការឈានឡើងដ៏អស្ចារ្យគួបផ្សំជាមួយនឹងសេចក្តីប្រាថ្នា បានធ្វើឱ្យសេដ្ឋកិច្ច វប្បធម៌ និងសង្គមកិច្ចរបស់ខេត្តត្រាវិញបានផ្លាស់ប្តូរយ៉ាងច្រើន ជីវភាពរស់នៅរបស់ប្រជាជនត្រូវបានកែលម្អជាបន្តបន្ទាប់ជាមួយនឹងសមិទ្ធិផលធំៗជាច្រើន ដែលមានសារៈសំខាន់ជាប្រវត្តិសាស្ត្រ រឹងមាំ និងអភិវឌ្ឍយ៉ាងទូលំទូលាយ។ ជាពិសេស ប្រព័ន្ធអប់រំរបស់ខេត្តមានការអភិវឌ្ឍយ៉ាងខ្លាំង រួមចំណែកយ៉ាងសំខាន់ក្នុងការបណ្តុះបណ្តាលធនធានមនុស្ស បង្កើតកម្លាំងចលករដើម្បីពន្លឿនដំណើរការឧស្សាហូបនីយកម្ម និងទំនើបកម្មរបស់ខេត្ត របស់តំបន់វាលរាបទន្លេគឺវឡុង និងទូទាំងប្រទេស។
ចាប់តាំងពីបានកកើតមក សាកលវិទ្យាល័យត្រាវិញបានបន្តបេសកកម្មរបស់ខ្លួនក្នុងការបណ្តុះបណ្តាលធនធានមនុស្សប្រកបដោយគុណភាពខ្ពស់សម្រាប់ខេត្តត្រាវិញ និងសម្រាប់ទូទាំងតំបន់។ គ្រឹះស្ថានឧត្តមសិក្សាដែលមានបណ្តុះបណ្តាលច្រើនជំនាញ កម្រិតសិក្សានិងទម្រង់បណ្តុះបណ្តាលសម្បូរបែប ផ្តល់នូវកម្មវិធីសិក្សាប្រកបដោយគុណភាពខ្ពស់ និងសមាហរណកម្មអន្តរជាតិ។ ប៉ុន្មានឆ្នាំកន្លងមកនេះ សាកលវិទ្យាល័យត្រាវិញបានវិនិយោគបង្កើតមុខជំនាញជាច្រើនក្នុងទិសដៅនៃការធ្វើពិពិធកម្ម ទំនាក់ទំនងយ៉ាងជិតស្និទ្ធជាមួយសហគមន៍ធុរកិច្ច និងទាមទារធនធានមនុស្សគុណភាពខ្ពស់សម្រាប់ការអភិវឌ្ឍសេដ្ឋកិច្ច និងសង្គមកិច្ចរបស់ខេត្ត និងទូទាំងតំបន់។
ក្តីប្រាថ្នាដើម្បីឆ្ពោះទៅកាន់ពិភពលោក
ជំហររបស់សាកលវិទ្យាល័យត្រាវិញត្រូវបានលើកកម្ពស់ឥតឈប់ឈរតាមរយៈសកម្មភាពជាក់ស្តែងជាច្រើន មិនត្រឹមតែក្នុងប្រព័ន្ធអប់រំឧត្តមសិក្សានៅប្រទេសវៀតណាមតែប៉ុណ្ណោះទេ ថែមទាំងក្នុងឆាកអន្តរជាតិទៀតផង។ ប៉ុន្មានឆ្នាំកន្លងមកនេះ សាកលវិទ្យាល័យត្រាវិញសម្រេចបានសមិទ្ធិផលជាច្រើន មានការអភិវឌ្ឍយ៉ាងខ្លាំងហើយប្រការនេះបានរួមចំណែកដល់ការអភិវឌ្ឍខេត្ត។
សាកលវិទ្យាល័យត្រាវិញមានកិត្តិយសដែលបានទទួលនូវគ្រឿងឥស្សរិយយសថ្នាក់ទីពីរពីប្រធានរដ្ឋ។ សាកលវិទ្យាល័យត្រាវិញជាសាកលវិទ្យាល័យចំណុះខេត្តដំបូងគេក្នុងចំណោមសាកលវិទ្យាល័យទាំង ២៣ នៅទូទាំងប្រទេស ដែលត្រូវបាននាយករដ្ឋមន្ត្រីប្រគល់ភារកិច្ចសាកល្បងផ្លាស់ប្តូរយន្តការប្រតិបត្តិការនៅឆ្នាំ ២០១៧ ដោយមានគោលដៅអភិវឌ្ឍទៅជាសាកលវិទ្យាល័យដែលផ្តោតលើការអនុវត្តស្របតាមស្តង់ដារអន្តរជាតិ។
សាកលវិទ្យាល័យត្រាវិញកំពុងអភិវឌ្ឍឥតឈប់ឈរនូវគុណភាពនៃការបណ្តុះបណ្តាលធ្វើសមាហរណកម្មអន្តរជាតិ និងធានាគុណភាពនៃការអប់រំសម្រាប់មុខជំនាញជាច្រើន។ បច្ចុប្បន្ននេះ សាកលវិទ្យាល័យត្រាវិញគឺជាសាកលវិទ្យាល័យមួយក្នុងចំណោមសាកល
វិទ្យាល័យទាំង ៩ ដំបូងគេបង្អស់ដែលត្រូវបានទទួលស្គាល់ដោយយោងតាមស្តង់ដារថ្មីរបស់ក្រសួងអប់រំ និងបណ្តុះបណ្តាល។ មកទល់ពេលនេះ នៅក្នុងតំបន់វាលរាបទន្លេគឺវឡុង សាកលវិទ្យាល័យត្រាវិញគឺជាសាកលវិទ្យាល័យមួយក្នុងចំណោមសាកលវិទ្យាល័យដែលមានកម្មវិធីសិក្សាជាច្រើនទទួលបានការទទួលស្គាល់គុណភាពអប់រំអន្តរជាតិស្របតាមស្តង់ដារគុណភាពរបស់ AUN-QA, FIBAA, ABETដែលក្នុងនោះមាន ១៣ កម្មវិធីសិក្សា។ សាកលវិទ្យាល័យត្រាវិញអភិវឌ្ឍប្រកបដោយនិរន្តរភាព ជា«សាកលវិទ្យាល័យបៃតង» បន្ទាប់ពីការចុះហត្ថលេខាលើសេចក្តីប្រកាស Talloires រយៈពេល៩ឆ្នាំ; និងជាសាកលវិទ្យាល័យក្នុងចំណោមសាកលវិទ្យាល័យចំនួន ២ របស់ប្រទេសវៀតណាមជាប់លំដាប់ថ្នាក់ក្នុងក្រុម ២០០ សាកលវិទ្យាល័យនៅលើពិភពលោកអភិវឌ្ឍប្រកបដោយនិរន្តរភាពនិងមិនប៉ះពាល់ដល់បរិស្ថាន។ ជាប់ចំណាត់ថ្នាក់ទី ៧១ ក្នុងចំណោម ១០០ នៃ WURI Rankingឆ្នាំ្ ២០២១ (កើនឡើង ១៥ ថ្នាក់បើធៀបនឹងឆ្នាំ ២០២០)។
សាកលវិទ្យាល័យត្រាវិញបានពង្រីកកិច្ចសហប្រតិបត្តិការជាមួយដៃគូអន្តរជាតិជាង ៩០ វិទ្យាស្ថាន និងគ្រឹះស្ថានអប់រំក្នុងវិស័យជាច្រើនដូចជា៖ កិច្ចសហប្រតិបត្តិការបណ្តុះ
បណ្តាល ការផ្លាស់ប្តូរនិស្សិត ការផ្លាស់ប្តូរសាស្ត្រាចារ្យ សិស្ស និស្សិត អ្នកស្ម័គ្រចិត្ត អ្នកជំនាញអន្តរជាតិ និងកិច្ចព្រមព្រៀងសហប្រតិបត្តិការ ការអនុវត្តគម្រោងជំនួយ ការស្រាវជ្រាវអនុវត្តការលើកកម្ពស់គម្រោងជាច្រើនទាក់ទងនឹងការផ្តល់មូលនិធិ អាហារូបករណ៍រយៈពេលខ្លី និងរយៈពេលវែងសម្រាប់សាស្ត្រាចារ្យ និងនិស្សិត បង្កើតមន្ទីរពិសោធន៍ - កន្លែងច្នៃប្រឌិតសម្រាប់និស្សិត សាស្ត្រាចារ្យ បណ្តុះបណ្តាលអន្តរជាតិ។ បច្ចុប្បន្ននេះ TVU គឺជាសមាជិកនៃអង្គការ CDIO -ជាអង្គការដែលលើកកម្ពស់ក្របខ័ណ្ឌអប់រំដើម្បីលើកកម្ពស់គុណភាពនៃការបណ្តុះបណ្តាលនៅបណ្ដាសាកលវិទ្យាល័យជំនាញខាងបច្ចេកទេសលើពិភពលោក។ ជាងនេះទៅទៀតសាកលវិទ្យាល័យត្រាវិញគឺជាសមាជិកទី ១៥១ នៃសមាគមមហាវិទ្យាល័យ សហគមន៍ កាណាដា ដែលបច្ចុប្បន្នជាសមាគមមហាវិទ្យាល័យ និងវិទ្យាស្ថានកាណាដា (CICan)។
https://www.youtube.com/watch?v=4vufyZfzcuI
សាកលវិទ្យាល័យត្រាវិញត្រូវបានលោក Le Van Han -ប្រធានគណៈកម្មាធិការប្រជាជនខេត្តត្រាវិញបញ្ជាក់និងទទួលស្គាល់ចំពោះតួនាទីដ៏ធំធេងក្នុងការបង្កើតការផ្លាស់ប្តូរយ៉ាងខ្លាំងក្លាលើការលើកកម្ពស់កម្រិតបញ្ញា និងគុណភាពធនធានមនុស្សសម្រាប់ខេត្តត្រាវិញ និងតំបន់។
បេសកកម្ម «នាំមកនូវឱកាសសិក្សាមានគុណភាពសម្រាប់សហគមន៍»
TVU គឺជាកន្លែងបណ្ដុះគំនិតថ្មីក្នុងការស្រាវជ្រាវវិទ្យាសាស្ត្រ និងការបណ្ដុះធុរកិច្ចថ្មី «START UP»បង្កើតទំនាក់ទំនងរវាងសិស្ស សាលារៀន និងអាជីវកម្ម។ មន្ទីរពេទ្យសាកលវិទ្យាល័យត្រាវិញ គ្លីនិកទូទៅ គ្លីនិកធ្មេញ គឺជាកន្លែងថែទាំសុខភាពដ៏ល្អសម្រាប់និស្សិត និងសហគមន៍។
TVU មានគោលនយោបាយល្អៗជាច្រើនសម្រាប់អ្នកសិក្សាដូចជា៖ រៀនដោយឥតបង់ថ្លៃសិក្សាឬបង់មួយចំណែកថ្លៃសាលា អាហារូបករណ៍លើកទឹកចិត្តនិស្សិតនារីឱ្យសិក្សាផ្នែកវិស្វកម្ម និងបច្ចេកវិទ្យា និងប្រាក់កម្ចីសម្រាប់និស្សិតសម្រាប់ការបណ្ដុះធុរកិច្ចថ្មី។ល។ ប្រការទាំងនេះបានគាំទ្រដល់និស្សិតក្នុងការសិក្សា ស្រាវជ្រាវ បង្កើតគំនិត ស្រាវជ្រាវ និងបង្កើតផលិតផលដើម្បីបម្រើសហគមន៍។
មជ្ឈមណ្ឌលឯកសារសម្រាប់ការសិក្សារបស់សាលាមានទីធ្លាធំទូលាយ ស្អាត និងមានខ្យល់អាកាសល្អ ប្រភពសៀវភៅជាច្រើនដែលភ្ជាប់អ៊ីនធឺណិត និងបណ្ណាល័យអេឡិចត្រូនិក ឯកសារសិក្សាឌីជីថល សៀវភៅ និងទស្សនាវដ្តីក្នុងស្រុកនិងក្រៅស្រុក បម្រើសេវាកម្មឥតគិតថ្លៃ ២៤/៧ ដើម្បីជួយដល់ការសិក្សារបស់សិស្ស។ លើសពីនេះទៀត អន្តេវាសិកដ្ឋានទំនើបដែលមានទំហំធំសម្រាប់ស្នាក់នៅជូន ៣៥០០និស្សិត បំពាក់ដោយសម្ភារៈបរិក្ខារទំនើប។ បរិវេណសាលាគ្របដណ្តប់ដោយដើមឈើបៃតង និងកន្លែងសិក្សាដោយខ្លួនឯង កន្លែងកីឡា ដើម្បីជួយសម្រួលដល់សិស្សានុសិស្ស សម្រាកលំហែកាយបន្ទាប់ពីម៉ោងសិក្សា។
មណ្ឌលទី១នៃសាកលវិទ្យាល័យត្រាវិញ (រូបភាព៖ Dong Lam)
បច្ចុប្បន្ននេះ សាកលវិទ្យាល័យត្រាវិញមានបណ្តុះបណ្តាលកម្រិតបរិញ្ញាបត្រចំនួន ៥២មុខជំនាញ កម្រិតអនុបណ្ឌិត ចំនួន ២៧ មុខជំនាញ កម្រិតបណ្ឌិតចំនួន ១០ មុខជំនាញ និងកម្រិតវេជ្ជបណ្ឌិតឯកទេសកម្រិតទី ១ ចំនួន ៥ មុខជំនាញ៖ វេជ្ជសាស្រ្តផ្ទៃក្នុង វះកាត់ សម្ភពនិងរោគស្ត្រីវេជ្ជសាស្ត្រកុមារទន្តសាស្ត្រ។ លើសពីនេះ សាកលវិទ្យាល័យមានសាលាគរុកោសល្យអនុវត្ត មន្ទីរពេទ្យសាកលវិទ្យាល័យត្រាវិញ កន្លែងស្រាវជ្រាវ និងបណ្តុះបណ្តាល ដែលផ្តល់នូវប្រព័ន្ធសម្រាប់ការបណ្ដុះបណ្ដាលយ៉ាងពេញលេញសម្រាប់ខេត្តត្រាវិញ និងតំបន់។
សាកលវិទ្យាល័យត្រាវិញ (TVU)ផ្តោតលើការលើកកម្ពស់ការបណ្តុះបណ្តាលដែលទាក់ទងនឹងការស្រាវជ្រាវវិទ្យាសាស្ត្រ ការផ្ទេរបច្ចេកវិទ្យា សកម្មភាពឧបត្ថម្ភ គាំទ្រដល់
សហគមន៍ និងសហគ្រិនភាពរបស់និស្សិត។ សាលាបានខិតខំប្រឹងប្រែងដើម្បីបង្កើតទំនាក់ទំនងជាង៩០០ក្រុមហ៊ុនអាជីវកម្មក្នុងគោលបំណងភ្ជាប់សកម្មភាពធ្វើកម្មសិក្សា ក៏ដូចជា
បណ្តុះបណ្តាលនិស្សិតស្របតាមគោលដៅនៃតម្រូវការរបស់និយោជក ក៏ដូចជាពង្រីកកម្មវិធីបណ្តុះបណ្តាល Co-op(ការបណ្តុះបណ្តាលដែលផ្សារភ្ជាប់គ្រឹះស្ថានបណ្ដុះបណ្ដាល និងអាជីវកម្ម) – ទម្រង់បណ្តុះបណ្តាលមួយដ៏ពិសេសរបស់ TVU ដែលជួយឱ្យនិស្សិតទទួលបានបទពិសោធន៍វិជ្ជាជីវៈ ពង្រីកការរៀនសូត្រក្រៅថ្នាក់រៀន និងមានកម្រៃសម្រាប់សិក្សា ខណៈពេលដែលជួយអាជីវកម្មកាត់បន្ថយការចំណាយលើការបណ្តុះបណ្តាល និងពេលវេលាបណ្តុះបណ្ដាលបន្ទាប់ពីការជ្រើសរើសឱ្យចូលធ្វើការ រួមចំណែកដល់ការបង្កើតការងារសម្រាប់និស្សិតបន្ទាប់ពីបញ្ចប់ការសិក្សា។
លោកសាស្ត្រាចារ្យរង បណ្ឌិត Pham Tiet Khanhប្រធានក្រុមប្រឹក្សានៃសាកលវិទ្យាល័យត្រាវិញបានមានប្រសាសន៍ថា៖ អស់រយៈពេល២០ឆ្នាំនៃការបន្តបេសកកម្មរបស់សាកលវិទ្យាល័យគឺ២០ឆ្នាំនៃសេចក្តីប្រាថ្នា បង្កើតបាននូវសមិទ្ធផលដ៏ធំធេងស្របតាមមាគ៌ានៃការកសាង និងអភិវឌ្ឍន៍របស់ខេត្ត។ ឥឡូវនេះ ជំពូកថ្មីក្នុងប្រវត្តិសាស្រ្តនៃការអភិវឌ្ឍនៃសាកលវិទ្យាល័យត្រាវិញបានបន្តបើកជាមួយនឹងបំណងប្រាថ្នាដើម្បីឈានឡើង និងបង្កើតនូវសមិទ្ធផលនានាក្នុងនាមជាសាកលវិទ្យាល័យវ័យក្មេងដែលមានបំណងប្រាថ្នាដ៏អស្ចារ្យគឺទន្ទឹមជាមួយខេត្តត្រាវិញដើម្បីឆ្ពោះទៅកាន់ពិភពលោក ក៏ដូចជាដើម្បីក្លាយជាសាកលវិទ្យាល័យឆ្លាតវៃនាពេលអនាគត បន្តបញ្ជាក់អំពីគុណភាពនៃការបណ្តុះបណ្តាល បង្កើតនូវគុណតម្លៃបន្ថែមទៀតសម្រាប់បេសកកម្ម «នាំមកនូវឱកាសសិក្សាមានគុណភាពសម្រាប់សហគមន៍» និងរួមគ្នាបង្កើតនូវតម្លៃស្នូលគឺ «អស់ពីចិត្ត-តម្លាភាព-ភាពច្នៃប្រឌិត-ស្និទ្ធិស្នាល» សម្រាប់សហគមន៍។
អត្ថបទដោយ៖ Dong Lam
ប្រែសម្រួល៖ Se Ha Thach