គណៈកម្មាធិការប្រជាជនខេត្តត្រាវិញបានប្រកាសសេចក្តីសម្រេចទទួលស្គាល់ប្រធានក្រុមប្រឹក្សាភិបាលសាលា និងសាកលវិទ្យាធិការនៃសាកលវិទ្យាល័យត្រាវិញអាណត្តិ ២០២១ - ២០២៥
- សេចក្ដីលម្អិត
- ជំពូក៖ ព័ត៌មាន
- ចេញផ្សាយនា 06 មិថុនា 2022
- ចុចដង៖ 267
TVU – នារសៀលថ្ងៃទី ២៧ ឧសភា លោក Le Thanh Binh អនុប្រធានគណៈកម្មាធិការប្រជាជនខេត្តបានចូលរួម និងប្រគល់សេចក្តីសម្រេចទទួលស្គាល់ថ្នាក់ដឹកនាំនៃសាកលវិទ្យាល័យត្រាវិញអាណត្តិ ២០២១ - ២០២៥។ សាស្ត្រាចារ្យរង បណ្ឌិត Pham Tiet Khanh ទទួលតំណែងជាប្រធានក្រុមប្រឹក្សាភិបាលសាលា និងបណ្ឌិត Nguyen Minh Hoa ទទួលតំណែងជាសាកលវិទ្យាធិការនៃសាកលវិទ្យាល័យត្រាវិញ។
អញ្ជើញចូលរួមពិធីប្រគល់ជូនសេចក្ដីសម្រេច មានលោក Le Thanh Binh សមាជិកអចិន្ត្រៃយ៍គណៈកម្មាធិការបក្សខេត្ត អនុប្រធានគណៈកម្មាធិការប្រជាជនខេត្តត្រាវិញ; លោក Pham Van Cuong អនុប្រធានគណៈចាត់តាំងនៃគណៈកម្មាធិការបក្សខេត្ត; លោក Ngo Truong Giang នាយករងមន្ទីរមហាផ្ទៃ; លោក Tran Hoan Kim ប្រធានក្រុមប្រឹក្សាសាលា; សាស្ត្រាចារ្យរងបណ្ឌិត Pham Tiet Khanh លេខាបក្សគណៈកម្មាធិការបក្ខភាគ ប្រធានក្រុមប្រឹក្សាភិបាលសាកលវិទ្យាល័យត្រាវិញ ព្រមទាំងគណៈកម្មការសាលា ថ្នាក់ដឹកនាំនាយកដ្ឋាននៃសាកលវិទ្យាល័យ។
សុន្ទរកថារបស់លោក Le Thanh Binh អនុប្រធានគណៈកម្មាធិការប្រជាជនខេត្តត្រាវិញ
លោក Le Thanh Binh អនុប្រធានគណៈកម្មាធិការប្រជាជនខេត្តត្រាវិញ ប្រគល់សេចក្តីសម្រេចទទួលស្គាល់ សាស្ត្រាចារ្យរង បណ្ឌិត Pham Tiet Khanh ជាប្រធានក្រុមប្រឹក្សាភិបាលនៃសាកលវិទ្យាល័យត្រាវិញ
លោក Le Thanh Binh អនុប្រធានគណៈកម្មាធិការប្រជាជនខេត្តត្រាវិញ ប្រគល់សេចក្តីសម្រេចទទួលស្គាល់ បណ្ឌិត Nguyen Minh Hoa ជាសាកលវិទ្យាធិការនៃសាកលវិទ្យាល័យត្រាវិញ
អញ្ជើញថ្លែងការក្នុងពិធីនេះ លោក Le Thanh Binh អនុប្រធានគណៈកម្មាធិការប្រជាជនខេត្តបានអបអរសាទរ និងវាយតម្លៃខ្ពស់ចំពោះសមិទ្ធិផលរបស់សមូហភាពនៃសាកលវិទ្យាល័យត្រាវិញក្នុងប៉ុន្មានឆ្នាំថ្មីៗនេះ ទទួលស្គាល់ការរួមចំណែករបស់សាស្ត្រាចារ្យរង បណ្ឌិត Pham Tiet Khanh ក្នុងរយៈពេលកាន់តំណែងជាសាកលវិទ្យាធិការនៃសាកលវិទ្យាល័យត្រាវិញ។
លោកបានមានប្រសាសន៍ថា៖ ខ្ញុំសូមវាយតម្លៃខ្ពស់ និងទទួលស្គាល់នូវការខិតខំប្រឹងប្រែងរបស់ សាស្ត្រាចារ្យរង បណ្ឌិត Pham Tiet Khanh ក្នុងអំឡុងពេលដែលលោកកាន់តំណែងជាសាកលវិទ្យាធិការនៃសាកលវិទ្យាល័យត្រាវិញ ដែលបានដឹកនាំ និងគ្រប់គ្រងសាកលវិទ្យាល័យត្រាវិញ ជានិច្ចកាលសម្រេចបានជោគជ័យនូវភារកិច្ចដែលបានកំណត់។ ការអភិវឌ្ឍន៍របស់សាកលវិទ្យាល័យត្រាវិញសព្វថ្ងៃនេះ គឺជាភស្តុតាងសម្រាប់ប្រការនោះ។
លោកអនុប្រធានសង្ឃឹមថា សាស្ត្រាចារ្យរង បណ្ឌិត Pham Tiet Khanh ប្រធានក្រុមប្រឹក្សាភិបាលសាលា និងសមាជិកក្រុមប្រឹក្សាសាលាបន្តអនុវត្តការងារដែលបានប្រគល់ប្រកបដោយប្រសិទ្ធភាព ជាពិសេស៖ រៀបចំយុទ្ធសាស្ត្រ និងផែនការអភិវឌ្ឍ ផែនការសហការបណ្តុះបណ្តាលសកម្មភាពវិទ្យាសាស្ត្រ បច្ចេកវិទ្យា កិច្ចសហប្រតិបត្តិការអន្តរជាតិ គោលនយោបាយធានាគុណភាពឧត្តមសិក្សា កិច្ចសហប្រតិបត្តិការអាជីវកម្ម ... អនុវត្តការងារផ្សេងៗទៀតដែលកំណត់ដោយច្បាប់ រួមចំណែកបញ្ជាក់ពីតួនាទីរបស់សាកលវិទ្យាល័យត្រាវិញក្នុងវិស័យអប់រំរបស់ប្រទេស និងលើឆាកអន្តរាជាតិ រួមចំណែកអភិវឌ្ឍវិស័យអប់រំ សេដ្ឋកិច្ច វប្បធម៌ និងសង្គមកិច្ចរបស់ខេត្តត្រាវិញ។
ថ្នាក់ដឹកនាំខេត្តត្រាវិញ លោក Le Thanh Binh បានអបអរសាទរ និងជឿជាក់លើ បណ្ឌិត Nguyen Minh Hoa ក្នុងឋានៈជាសាកលវិទ្យាធិការនឹងសាមគ្គីជាមួយសមូហភាពទាំងមូល ដើម្បីបន្តការលើកកម្ពស់សមិទ្ធិផល និងដឹកនាំសាកលវិទ្យាល័យត្រាវិញអភិវឌ្ឍបន្ថែមទៀត។
លោកអនុប្រធានខេត្តសង្ឃឹមថា បណ្ឌិត Nguyen Minh Hoa បន្តលើកតម្កើងស្មារតីសាមគ្គីភាពផ្ទៃក្នុង ខិតខំតស៊ូ ស្រាវជ្រាវវិទ្យាសាស្រ្ត អនុវត្តល្អសកម្មភាពជំនាញនៃការសិក្សា។ល។ ទន្ទឹមនឹងនោះ លោកស្នើឲ្យថ្នាក់ដឹកនាំ អ្នកគ្រប់គ្រង និងបុគ្គលិកនៃសាកលវិទ្យាល័យលើកកម្ពស់ស្មារតីសាមគ្គីភាព សហការស្អិតរមួតជាមួយនឹងបណ្ឌិត Nguyen Minh Hoa អនុវត្តល្អនូវភារកិច្ច តួនាទីដែលបានប្រគល់ជូន ដើម្បីកសាងសាកលវិទ្យាល័យត្រាវិញសម្រេចបានជោគជ័យនូវភារកិច្ចអភិវឌ្ឍសេដ្ឋកិច្ចសង្គមឆ្នាំ ២០២២ របស់ខេត្តត្រាវិញនិងឆ្នាំបន្តបន្ទាប់ទៀត។
ក្នុងតួនាទីថ្មី សាស្ត្រាចារ្យរង បណ្ឌិត Pham Tiet Khanh សន្យាថានឹងបន្តធ្វើការជាមួយសមាជិកក្រុមប្រឹក្សាសាកលវិទ្យាល័យ ដើម្បីអភិវឌ្ឍសាកលវិទ្យាល័យត្រាវិញតាមគំរូសាកលវិទ្យាល័យជឿនលឿន ដើម្បីបំពេញតាមក្ដីសង្ឃឹមរបស់ថ្នាក់ដឹកនាំនៃគណៈកម្មាធិការបក្សខេត្ត និងគណៈកម្មាធិការប្រជាជនខេត្ត ជាមួយនឹងបុគ្គលិកសាលាអនុវត្តដោយជោគជ័យនូវសេចក្តីសម្រេចចិត្តរបស់ក្រុមប្រឹក្សាភិបាលសាលាអាណត្តិ ២០២១-២០២៥។
មានប្រសាសន៍ក្នុងពិធីភារកិច្ចថ្មី សាកលវិទ្យាធិការថ្មីបណ្ឌិត Nguyen Minh Hoa បានថ្លែងអំណរគុណចំពោះការជឿទុកចិត្តរបស់ថ្នាក់ដឹកនាំខេត្ត ក្រុមប្រឹក្សាភិបាលសាលា ថ្នាក់ដឹកនាំអង្គភាព និងបុគ្គលិកសាកលវិទ្យាល័យ ដែលបានជឿទុកចិត្ត និងប្រគល់ភារកិច្ចដ៏មានសារៈសំខាន់ ដោយការប្តេជ្ញាចិត្តរបស់ខ្លួន សាកលវិទ្យាធិការថ្មីនៃសាកលវិទ្យាល័យត្រាវិញមានជំនឿយ៉ាងមុតមាំថា នឹងរួមសហការជាមួយសមូហភាពនៃសាកលវិទ្យាល័យ បន្តទទួលមរតក និងបង្កើនសមិទ្ធិផលដែលទទួលបាន នឹងដឹកនាំសាកលវិទ្យាល័យត្រាវិញបន្តអភិវឌ្ឍបន្ថែមទៀត ដើម្បីឈានទៅដល់កម្រិតតំបន់ និងអន្តរជាតិ។
ថ្នាក់ដឹកនាំខេត្តត្រាវិញថតរូបអនុស្សាវរីយ៍ជាមួយថ្នាក់ដឹកនាំនិងក្រុមប្រឹក្សាភិបាលនៃសាកលវិទ្យាល័យត្រាវិញ ក្នុងពិធីប្រគល់សេចក្ដីសម្រេច
អត្ថបទដោយ៖ Thanh Sơn – Hoang Long
ប្រែសម្រួលដោយ៖ Van Thon
