អញ្ជើញចូលរួមពិធីមានលោកសាស្ត្រាចារ្យរងបណ្ឌិត Nguyen Minh Hoa សាកលវិទ្យាធិការនៃសាកលវិទ្យាល័យត្រាវិញ លោកស្រីបណ្ឌិត Ngo So Phe នាយកសាលាភាសា- វប្បធម៌ - វិចិត្រសិល្បៈ ខ្មែរណាមបូនិងមនុស្សសាស្ត្រ(សាកលវិទ្យាល័យត្រាវិញ); លោកស្រី Natella Svistunova អនុព័ន្ធវប្បធម៌នៃស្ថានអគ្គកុងស៊ុលអាមេរិក; លោកស្រី Le Thi Kim Muon អ្នកជំនួយការវប្បធម៌នៃស្ថានអគ្គកុងស៊ុលអាមេរិក។
លោកស្រី Natella Svistunova អនុព័ន្ធវប្បធម៌នៃស្ថានអគ្គកុងស៊ុលអាមេរិកបានឲ្យដឹងថា កម្មវិធីភាសាអង់គ្លេសតម្រង់ទិសវិជ្ជាជីវៈEnglishWorks គឺជាគំនិតច្នៃប្រឌិតមួយរបស់ការិយាល័យភាសាអង់គ្លេសក្នុងតំបន់ ចំណុះក្រសួងការបរទេសអាមេរិកដើម្បីផ្ដល់ឱកាសសិក្សាភាសាអង់គ្លេសនិងបំណិនវិជ្ជាជីវៈសម្រាប់ប្អូនៗដែលកំពុងស្វែងរកការងារធ្វើ។ កម្មវិធីរួមមានវគ្គបណ្តុះបណ្ដាលភាសាអង់គ្លេសសម្រាប់វិជ្ជាជីវៈ បំណិនទន់ បំណិនព័ត៌មានវិទ្យា សហគ្រិនភាព និងបំណិនស្វែងរកការងារ។ ឆ្នាំនេះរួមទាំងអស់មាន១៨ថ្នាក់ចូលរួមសិក្សាកម្មវិធីនេះដែលក្នុងនោះមាននៅវៀតណាម ឡាវ និងកម្ពុជា ដោយសិស្សរួមទាំងអស់គឺ៥០០រូប។ សម្រាប់តំបន់វាលទំនាបទន្លេគឺវឡុងមាន៣ខេត្តចូលរួមគឺខេត្តត្រាវិញ គៀងយ៉ាងនិងទៀងយ៉ាង។
ក្នុងពិធីបើកវគ្គសិក្សា លោកស្រីបណ្ឌិត Ngo So Phe នាយកសាលាភាសា- វប្បធម៌ - វិចិត្រសិល្បៈ ខ្មែរណាមបូនិងមនុស្សសាស្ត្របានឲ្យដឹងថា តាមលក្ខខណ្ឌនៃកម្មវិធី សាលានឹងជ្រើសរើសសិស្សចំនួន២៥រូបដែលគ្រប់សម្បទាចូលរួមថ្នាក់នេះ។ សាលានឹងបង្កលក្ខណៈងាយស្រួលបំផុតដើម្បីថ្នាក់រៀនបានប្រព្រឹត្តទៅយ៉ាងរលូនដូចដែលកម្មវិធីចង់បាន។
លោកស្រីសង្ឃឹមថាប្អូនៗចូលរៀនឲ្យបានគ្រប់គ្រាន់ ទៀងទាត់ មានទំនួលខុសត្រួវនិងខិតខំលើកកម្ពស់សមត្ថភាពរៀនដោយខ្លួនឯង លើកកម្ពស់សមត្ថភាពស្វែងយល់ឯកសារដើម្បីពេលប្រឡងបញ្ចប់វគ្គយើងនឹងទទួលបាននូវចំណេះដឹងបានយ៉ាងល្អអំពីភាសាអង់គ្លេស ទទួលបាននូវបំណិនបម្រើការងារក៏ដូចជាបំណិនក្នុងការរស់នៅបានល្អប្រសើរជាង។
កម្មវិធីភាសាអង់គ្លេសតម្រង់ទិសវិជ្ជាជីវៈEnglishWorks ត្រូវបានមហាវិទ្យាល័យភាសាបរទេសជ្រើសរើសនិស្សិត២៥រូបចូលរួម។ បេក្ខជនដែលត្រូវបានជ្រើសរើសនឹងបានសិក្សាភាសាអង់គ្លេសចាប់ពីខែមករាដល់ខែមិថុនាឆ្នាំ២០២៣ ហើយបានឧបត្ថម្ភទាំងស្រុងតាំងពីតម្លៃសិក្សា ឯកសារនានានិងបណ្ដាសកម្មភាពជំនួយផ្សេងទៀត៕
អត្ថបទដោយ៖ Tran Thanh Ngan
ប្រែសម្រួលដោយ៖ Ngoc Chau