បើកវគ្គសិក្សាថ្នាក់ភាសាវៀតណាមសម្រាប់និស្សិតកម្ពុជាឆ្នាំ២០២៣
- សេចក្ដីលម្អិត
- ជំពូក៖ ព័ត៌មាន
- ចេញផ្សាយនា 19 ឧសភា 2023
- ចុចដង៖ 498
នៅថ្ងៃទី១៦ ខែឧសភា ឆ្នាំ២០២៣ សាកលវិទ្យាល័យត្រាវិញបានប្រារព្ធពិធីបើកវគ្គសិក្សាថ្នាក់ភាសាវៀតណាមសម្រាប់និស្សិតកម្ពុជាចំនួន៣៦រូប បានជាប់ឈ្មោះចូលរៀនតាមអាហារូបករណ៍ និងស្វ័យភាពក្នុងឆ្នាំ២០២៣។
កម្មវិធីបើកវគ្គសិក្សា ភាសាវៀតណាម មានការចូលរួមរបស់លោក វរសេនីយ៍ត្រី សាង សេរីមុនី ជានគរបាលបំរើការនៅស្នងការដ្ឋាននគរបាលរាជធានីភ្នំពេញ និងជាតំណាងអោយលោកជំទាវ ជូ ប៊ុនអេង រដ្ឋលេខាធិការក្រសួងមហាផ្ទៃ ទទួលបន្ទុកជាអនុប្រធានអចិន្រ្តៃយ៍ នៃគណៈកម្មធិការជាតិប្រយុទ្ធប្រឆាំងអំពើជួញដូរមនុស្សនៃព្រះរាជាណាចក្រកម្ពុជា និងលោក គឹម ទ្រី ព្រមទាំងអាណាព្យាបាលសិស្សកម្ពុជា។
ផ្នែកខាងថ្នាក់ដឹកនាំគណៈកម្មាធិការប្រជាជនខេត្ត ថ្នាក់ដឹកនាំមន្ទីរ ស្ថាប័នខេត្តត្រាវិញ មានលោកស្រី Pham Thi Hong Diem នាយករងមន្ទីរការងារ យុទ្ធជនពិការ និងសង្គមកិច្ចខេត្តត្រាវិញ; លោកវរសេនីយ៍ឯកបំរុងNgo Thanh Mong អនុប្រធានការិយាល័យសន្តិសុខកិច្ចការបរទេស - នគរបាលខេត្តត្រាវិញ; លោកវរសេនីយ៍ទោ Nguyen Tan Manh អនុប្រធានក្រុម - ការិយាល័យសន្តិសុខកិច្ចការបរទេស និងលោកស្រី Lam Phuong Diem តំណាងការិយាល័យអន្តោប្រវេសន៍នគរបាលខេត្តត្រាវិញ។
ផ្នែកខាងសាកលវិទ្យាល័យត្រាវិញ មានការចូលរួមរបស់លោកស្រីបណ្ឌិត Thach Thi Dan សាកលវិទ្យាធិការរង; លោកបណ្ឌិត Nguyen Tan Dung អនុប្រធានក្រុមប្រឹក្សាពិគ្រោះ និងតំណាងថ្នាក់ដឹកនាំបណ្ដាអង្គភាពចំណុះសាលា។
ក្នុងរយៈពេលកន្លងមក សាកលវិទ្យាល័យត្រាវិញបានបន្តរចនា ចងក្រង និងកែលម្អកម្មវិធីបណ្តុះបណ្តាល ឱ្យសមស្របទៅនឹងតម្រូវការសិក្សារបស់សហគមន៍ក្នុងប្រទេសនិងអន្តរជាតិដើម្បីឆ្លើយតបនឹងតម្រូវការសិក្សាភាសាវៀតណាមក៏ដូចជាបណ្ដាមុខជំនាញថ្នាក់បរិញ្ញាបត្រនៅសាកលវិទ្យាល័យត្រាវិញ សម្រាប់និស្សិតអន្តរជាតិនិយាយរួមនិងនិស្សិតកម្ពុជានិយាយដោយឡែក។
ថ្លែងសុន្ទរកថាក្នុងពិធីនោះ លោកស្រីបណ្ឌិត Thach Thi Dan សាកលវិទ្យាធិការរងនៃសាកលវិទ្យាល័យត្រាវិញ បានផ្ញើបិយវាចាជូនពរដល់និស្សិតកម្ពុជាទាំងអស់ដែលបានជាប់ជម្រើសមកសិក្សានៅសាកលវិទ្យាល័យត្រាវិញ ឈានចូលឆ្នាំសិក្សាថ្មីពោរពេញដោយភាពសប្បាយរីករាយ។ លោកស្រីបន្តថាសាលានឹងបង្កលក្ខណៈងាយស្រួលបំផុត សម្រាប់ប្អូនៗក្នុងការសិក្សាស្រាវជ្រាវនៅឯសាកលវិទ្យាល័យត្រាវិញ។
ស្របឱកាសនេះដែរ ក្នុងនាមគណៈគ្រប់គ្រងសាលាលោកស្រីសាកលវិទ្យាធិការរង សូមថ្លែងអំណរគុណដល់មន្ទីរ ស្ថាប័ន និងអង្គភាពនានា តែងតែយកចិត្តទុកដាក់ និងបង្កលក្ខណៈងាយស្រួលសម្រាប់សាកលវិទ្យាល័យត្រាវិញក្នុងកិច្ចការបណ្តុះបណ្តាលធនធានមនុស្ស នៃចំណងមិត្តភាពរវាងវៀតណាម និងកម្ពុជាប្រកបដោយជោគជ័យល្អប្រសើរ។ លោកស្រីសាកលវិទ្យាធិការរងថ្លែងអំណរគុណដល់ថ្នាក់ដឹកនាំក្រសួងមហាផ្ទៃ បណ្ដាអង្គភាពនៃព្រះរាជាណាចក្រកម្ពុជា និងអាណាព្យាបាលសិស្ស ដែលជឿជាក់ផ្ញើកូនមកសិក្សារៀនសូត្រនៅសាកលវិទ្យាល័យត្រាវិញ។
លោក វរសេនីយ៍ត្រី សាង សេរីមុនី ជានគរបាលបំរើការនៅស្នងការដ្ឋាននគរបាលរាជធានីភ្នំពេញបានប្រគល់ជូនលិខិតថ្លែងអំណរគុណ របស់លោកជំទាវ ជូ ប៊ុនអេង រដ្ឋលេខាធិការក្រសួងមហាផ្ទៃជូនដល់ថ្នាក់ដឹកនាំសាកលវិទ្យាល័យត្រាវិញ។
ប្អូន អ៊ុន រដ្ឋា និស្សិតកម្ពុជាអានលិខិតថ្លែងអំណរគុណរបស់លោកជំទាវ ជូ ប៊ុនអេង រដ្ឋលេខាធិការក្រសួងមហាផ្ទៃ ផ្ញើជូនថ្នាក់ដឹកនាំសាកលវិទ្យាល័យត្រាវិញ ដែលបានផ្តល់អាហារូបករណ៍ដល់និស្សិតកម្ពុជាមកសិក្សានៅសាកលវិទ្យាល័យត្រាវិញ និងប្ដេជ្ញាចិត្តជឿជាក់ថា ប្អូនៗនឹងសម្រេចដោយជោគជ័យនូវកិច្ចការសិក្សានៅសាកលវិទ្យាល័យត្រាវិញ ។
តំណាងអោយនិស្សិតកម្ពុជា ប្អូន កេង ច័ន្ទ កុលបុត្រ សូមថ្លែងអំណរគុណចំពោះគណៈគ្រប់គ្រងសាលា និងលោកគ្រូអ្នកគ្រូនៃសាកលវិទ្យាល័យត្រាវិញ ដែលបានបង្កលក្ខណៈគាំទ្រដល់ប្អូនៗមកសិក្សានៅសាលា ហើយសូមសន្យាថានឹងខិតខំយកចិត្តទុកដាក់រៀនសូត្រដើម្បីទទួលបាននូវលទ្ធផលខ្ពស់បំផុត។
ក្នុងពិធីបើកវគ្គសិក្សា សាលាក៏បានជូនអំណោយដល់និស្សិតកម្ពុជាដែលមកសិក្សានៅសាកលវិទ្យាល័យត្រាវិញ។
ក្នុងឱកាសនេះដែរនិស្សិតនិងអាណាព្យាបាលសិស្សបានទស្សនាសាលា និងចូលរួមកម្មវិធីផ្ដល់ដំបូន្មានដំបូងសម្រាប់និស្សិតកម្ពុជានៅសាលា។
|
សាកលវិទ្យាល័យត្រាវិញជម្រើសនិស្សិតកម្រិតបរិញ្ញាបត្រចំនួន៥២មុខជំនាញ ថា្នក់បណ្ឌិតចំនួន១០មុខជំនាញ ថ្នាក់អនុបណ្ឌិតចំនួន២៥មុខជំនាញ ថ្នាក់ឯកទេសកម្រិតទី១រួមមានបណ្ដាមុខជំនាញដូច៖ វេជ្ជសាស្ត្រទូទៅ សល្យសាស្ត្រ រោគកុមារ សម្ភពនិងរោគស្ត្រី ទន្តវទនសាស្ត្រ ។ TVU គឺជាសាកលវិទ្យាល័យមួយដែលមានកិត្តិសព្ទនៅក្នុងតំបន់វាលរាបទន្លេគឺវឡុងដោយមានកម្មវិធីចំនួន ១៣ ដែលសម្រេចបានការទទួលស្គាល់គុណភាពអប់រំស្របតាមស្តង់ដារអន្តរជាតិ AUN-QA, FIBAA និង ABET។ ជាច្រើនឆ្នាំបន្តបន្ទាប់ សាកលវិទ្យាល័យត្រាវិញបានស្ថិតក្នុងចំណាត់ថ្នាក់សាកលវិទ្យាល័យទាំង ២០០ដែលជាសាកលវិទ្យាល័យអប់រំបៃតង និងអភិវឌ្ឍប្រកបដោយនិរន្តរភាពនៅក្នុងពិភពលោក យោងតាម UI GreenMetric Ranking។ ស្ថិតក្នុងចំណាត់ថ្នាក់១០០សាកលវិទ្យាល័យមានឥទ្ធិពល និងរួមចំណែកយ៉ាងសកម្មដល់សង្គម តម្លៃនៃការបណ្ដុះធុរកិច្ចថ្មី និងការច្នៃប្រឌិត ការផ្លាស់ប្តូរឌីជីថល និងការពង្រីកកិច្ចសហប្រតិបត្តិការអន្តរជាតិ និងការផ្លាស់ប្តូរនិស្សិតអន្តរជាតិ - យោងតាមចំណាត់ថ្នាក់ WURI Ranking។ សាលាបានអនុវត្តប្រព័ន្ធគ្រប់គ្រងគុណភាពប្រកបដោយប្រសិទ្ធភាព ដោយបំពេញតាមស្តង់ដារ ISO 9001-2000 នៅដើមឆ្នាំ ២០០៦ រហូតមកដល់បច្ចុប្បន្ន ស្តង់ដារ ISO 9001-2008, ISO 9001-2015 ។ |
អត្ថបទដោយ៖ Hanh Nguyen - Hoang Tinh
ប្រែសម្រួលដោយ៖ Sa Phone
