ភាពអល់អែកក្នុងការជ្រើសអាជីពមុនពេលបញ្ចប់ការសិក្សា
- សេចក្ដីលម្អិត
- ជំពូក៖ ព័ត៌មាន
- ចេញផ្សាយនា 05 ធ្នូ 2023
- ចុចដង៖ 158
(TVU) – បញ្ចប់ការសិក្សាចេញទៅធ្វើការឱ្យអាជីវកម្ម ស្ថាប័នរដ្ឋ ឬធ្វើអាជីវកម្មខ្លួនឯង? តើទិសដៅណាសម្រាប់អ្នក? - នោះគឺជាប្រធានបទដោះដូររួមជាមួយនឹងអតីតនិស្សិតសម្រេចជោគជ័យ បានប្រព្រឹត្តឡើងនៅព្រឹកថ្ងៃទី២៨ ខែវិច្ឆិកា នៅសាកលវិទ្យាល័យត្រាវិញ ដោយមាននិស្សិតចូលរួមយ៉ាងច្រើនកុះករ។
ក្នុងដំណើរមិនទាន់រឹងប៉ឹងចាប់ពីអន្តេវាសិកដ្ឋានដល់ទីលានពិធីបញ្ចប់ការសិក្សា និស្សិតប្រឈមមុខនឹងការសម្រេចចិត្តមួយដ៏ធំ និងពោរពេញដោយភាពតានតឹង នោះគឺជ្រើសអាជីពសម្រាប់អនាគត។ ភាពអល់អែកនេះ មិនត្រឹមតែប៉ះពាល់ដល់ជីវភាពផ្ទាល់ខ្លួនប៉ុណ្ណោះទេ នៅទាំងគោលកំណត់ការងារធ្វើ កម្រិតប្រាក់ចំណូល និងការពេញចិត្តក្នុងការងារផងដែរ។ ក្នុងដំណាក់កាលនេះ និស្សិតតែងប្រឈមមុខនឹងការសម្រេចចិត្តរវាងការធ្វើការនៅអាជីវកម្ម ធ្វើអាជីវកម្មខ្លួនឯង ឬជ្រើសវិជ្ជាជីវៈនៅក្នុងស្ថាប័នរដ្ឋ។
និស្សិតមួយចំនួនជ្រើសចូលពិភពអាជីវកម្ម កន្លែងពួកគាត់មានឱកាសធ្វើការក្នុងបរិស្ថានជំនាញ រៀនសូត្រពីអ្នកជំនាញលើវិស័យ និងជឿនលឿនក្នុងបុព្វហេតុតាមរូបភាពដំឡើងឋានៈ។
បង Ngo Hong Khanh អតីតនិស្សិតសាកលវិទ្យាល័យត្រាវិញ កំពុងធ្វើការនៅក្រុមហ៊ុន Viettel ឱ្យដឹង៖ មនុស្សម្នាក់ៗមានតម្រង់ទិសដៅជ្រើសមុខជំនាញ និងអាជីពរៀងៗខ្លួន។ ពេលបញ្ចប់ការសិក្សា ចិត្តសាស្រ្តរួមរបស់និស្សិតសុទ្ធតែចង់ជ្រើសកន្លែងមានការងារធ្វើលំនឹង ប្រាក់ចំណូលបង្គួរ មានឱកាសដំឡើងតំណែងល្អ ប្រការសំខាន់គឺសមស្របជាមួយវិស័យវិជ្ជាជីវៈរបស់ខ្លួន។ ផ្តើមពីនោះ អាចរួមចំណែកបានល្អប្រសើរជាង នាំមកនូវតម្លៃដល់អាជីវកម្ម និងកាត់បន្ថយពេលវេលាកៀកជិតការងារ។ បងបានជ្រើសអាជីវកម្ម ពីព្រោះនេះជាកន្លែងសមស្របដើម្បីខិតខំ អភិវឌ្ឍខ្លួនឯង និងមានឱកាសជឿនលឿន។
អាស្រ័យហេតុនោះ ក្រុមហ៊ុនឯកជន ឬសាជីវកម្មធំៗក្លាយជាទិសដៅអមដោយផលប្រយោជន៍ខាងប្រាក់ចំណូលខ្ពស់ គោលនយោបាយសុខុមាលភាពក៏ទាក់ទាញ និងឱកាសដំឡើងតំណែងច្បាស់លាស់។ ប៉ុន្តែបញ្ហាសាកល្បងដូចជាសម្ពាធការងារ ពេលវេលាអាចបត់បែន និងការប្រកួតប្រជែងដ៏ខ្លាំងក្លាក៏ជាប្រការដែលនិស្សិតត្រូវប្រឈមមុខពេលចូលប្រលូកក្នុងវិស័យនេះផងដែរ។
ផ្ទុយមកវិញ មាននិស្សិតមួយចំនួនមានចំណង់ចំណូលចិត្តលើគំនិតធ្វើអាជីវកម្មរបស់ខ្លួន។ ពួកគាត់ជ្រើសធ្វើអាជីវកម្មដោយខ្លួនឯង ដើម្បីអនុវត្តនូវគំនិតច្នៃប្រឌិត និងឯករាជ្យភាព។ ប្រការនេះនាំមកជូនពួកគាត់សិទ្ធិម្ចាស់ការខ្ពស់ កំណត់សម្រេចគ្រប់យ៉ាងតាំងពីផលិតផល សេវាកម្ម រហូតដល់យុទ្ធសាស្ត្រធ្វើអាជីវកម្ម។ ប៉ុន្តែជាមួយនឹងសេរីភាពនេះ គឺអមដោយហានិភ័យក៏ធំ ដោយសម្ពាធផ្នែកហិរញ្ញវត្ថុ គ្រប់គ្រងអាជីវកម្ម និងសមត្ថភាពអត់ធ្មត់ការបរាជ័យគឺជាបញ្ហាសាកល្បងដែលពួកគាត់ត្រូវប្រឈមមុខផងដែរ។
តួយ៉ាងដូច បង Tran Minh Thuan បោះបង់ទីក្រុងឆើយឆាយ វិលត្រឡប់ទៅភូមិវិញ ដោយយកវាលស្រែជំនួសការិយាល័យ បង្កើតសហករណ៍កសិកម្ម។ ក្រឡេកមើលរយៈពេល១០ឆ្នាំរបស់ខ្លួន បងជឿជាក់ឆ្លើយសំណួរវិញ្ញាសាប្រឡងអក្សរសាស្រ្តកាលនៅនិស្សិតសាលា៖ តើអ្វីជាការរស់នៅស្អាតស្អំ?
ឬបង Luong Manh Duong, បង Nguyen Van De ....គឺជាគំរូលេចធ្លោនៃអតីតនិស្សិតសម្រេចជោគជ័យរបស់សាកលវិទ្យាល័យត្រាវិញ ក្រោយពីបញ្ចប់ការសិក្សា បានសម្រេចចិត្តធ្វើអាជីវកម្មដោយខ្លួនឯង ធ្វើម្ចាស់ និងបង្កើតឱកាសការងារដល់មនុស្សជាច្រើនទៀត។
និស្សិតមួយចំនួនសម្រេចចិត្តជ្រើសវិជ្ជាជីវៈនៅក្នុងប្រព័ន្ធរដ្ឋ ការងារនេះតែងដើរទន្ទឹមនឹងស្ថិរភាពអំពីប្រាក់ចំណូល គោលនយោបាយសុខុមាលភាពសង្គម និងឱកាសអភិវឌ្ឍវិជ្ជាជីវៈនៅក្នុងប្រព័ន្ធ។ ប៉ុន្តែប្រការនេះក៏អាចនាំមកនូវអារម្មណ៍ជាប់ជំពាក់ដោយសេចក្តីកំណត់ បែបបទការងារជាដើម។
តាមប្រសាសន៍ អនុបណ្ឌិត Nguyen Van Vu An ប្រធានមជ្ឈមណ្ឌលថ្នាលបណ្ដុះអាជីវកម្មខេត្តត្រាវិញ និងជាប្រធានមជ្ឈមណ្ឌលនវានុវត្តន៍និងបណ្ដុះធុរកិច្ចឱ្យដឹង និស្សិតក្រោយពីបញ្ចប់ការសិក្សាត្រូវប្រឈមមុខនឹងការសម្រេចចិត្តដ៏សំខាន់ក្នុងដំណើរអនាគតរបស់ខ្លួនក្នុងការជ្រើសធ្វើការនៅអាជីវកម្មមួយ សូមចូលស្ថាប័នរដ្ឋ ឬធ្វើអាជីវកម្មដោយខ្លួនឯង។ តាមប្រសាសន៍របស់លោក គ្មានជម្រើសត្រូវ ឬខុសនោះទេ ប៉ុន្តែទិសដៅនីមួយៗមានគុណសម្បត្តិ និងគុណវិបត្តិដោយឡែក។
នោះជាមូលហេតុសកម្មភាពនវានុវត្តន៍ និងបណ្ដុះធុរកិច្ច ត្រូវបានសាកលវិទ្យាល័យត្រាវិញយកចិត្តទុកដាក់ និងជំរុញយ៉ាងខ្លាំងក្នុងពេលកន្លង។ ឆ្លងតាមរយៈសកម្មភាពឧបត្ថម្ភ និងរីកសាយភាយនូវស្មារតីផ្តើមអាជីពដល់និស្សិត ក៏ដូចជាការបណ្តុះបណ្តាលចំណេះដឹង បំណិន ជួយបង្កើតបរិស្ថានងាយស្រួលសម្រាប់និស្សិតពេលបញ្ចប់ការសិក្សាមានការជ្រើសរើស និងតម្រង់ទិសបានត្រឹមត្រូវ។
រួមផ្តល់ដំបូន្មានដល់និស្សិតអំពីការជ្រើសវិជ្ជាជីវៈក្រោយពីបញ្ចប់ការសិក្សា បងៗអតីតនិស្សិត ដូចជាបងស្រី Nguyen Thi Ngoc Thao - ប្រធានការិយាល័យ Marketing នៃក្រុមហ៊ុនចំកាត់ច្នៃដូងខ្ទិះកូវកែ (VICOSAP); បង Huynh Hoang Khang - នាយកផ្លាស់ប្តូរឌីជីថល MobiFone ខេត្តត្រាវិញ សមាជិកក្រុមទីប្រឹក្សាបណ្ដុះធុរកិច្ចខេត្តត្រាវិញ បង Nguyen Thanh Gia នាយកក្រុមហ៊ុនចំកាត់អាជីវកម្មសង្គមពិគ្រោះនិងបណ្តុះបណ្តាល Song Yen សមាជិកក្រុមទីប្រឹក្សាបណ្ដុះធុរកិច្ចខេត្តត្រាវិញយល់ថា៖ ក្នុងដំណើរការដាក់ចេញការសម្រេចចិត្តនេះ និស្សិតសាលាគប្បីថ្លឹងថ្លែងរវាងចំណង់ចំណូលចិត្តផ្ទាល់ខ្លួន ទិសដៅបុព្វហេតុ និងស្ថានភាពរបស់គ្រួសារ ស្វែងយល់ពីខ្លួនឯង ស្វែងយល់ពីទីផ្សារការងារ និងដាក់ចេញនូវសំណួរស៊ីជម្រៅអំពីការពេញចិត្តផ្ទាល់ខ្លួនជាជំហានសំខាន់។ គ្មានវិជ្ជាជីវៈណាដែលត្រឹមត្រូវ ឬខុសទាំងស្រុងនោះទេ ប៉ុន្តែវាសមស្របសម្រាប់បុគ្គលម្នាក់ៗ៕
អត្ថបទដោយ៖ Minh Phuong – Quang Vinh
ប្រែសម្រួលដោយ៖ So Phune