សាកលវិទ្យាល័យត្រាវិញ ធ្វើការជាមួយក្រសួងអប់រំ យុវជន និងកីឡា នៃព្រះរាជាណាចក្រកម្ពុជា។
- សេចក្ដីលម្អិត
- ជំពូក៖ ព័ត៌មាន
- ចេញផ្សាយនា 29 ធ្នូ 2023
- ចុចដង៖ 254
នាថ្ងៃទី២៧ ខែធ្នូ គណៈប្រតិភូនៃសាកលវិទ្យាល័យត្រាវិញ ដឹកនាំដោយ បណ្ឌិត Thach Thi Dan សាកលវិទ្យាធិការរង បានទៅធ្វើការជាមួយក្រសួងអប់រំ យុវជន និងកីឡា នៃព្រះរាជាណាចក្រកម្ពុជា។
ទទួលស្វាគមន៍គណៈប្រតិភូមានឯកឧត្តម ទូច វិសាលសុខ រដ្ឋលេខាធិការក្រសួងអប់រំ យុវជន និងកីឡា ព្រមទាំងតំណាងថ្នាក់ដឹកនាំផ្នែកជំនាញចូលរួមផងដែរ។
គណៈប្រតិភូសាកលវិទ្យាល័យត្រាវិញ រួមមានបណ្ឌិត Thach Thi Dan សាកលវិទ្យាធិការរង; សាស្ត្រាចារ្យរង បណ្ឌិត Nguyen Van Nguyen នាយកមហាវិទ្យាល័យសេដ្ឋកិច្ច និងនីតិសាស្ត្រ; បណ្ឌិត Ngo So Phe នាយកមហាវិទ្យាល័យភាសា វប្បធម៌ វិចិត្រសិល្បៈខ្មែរណាមបូ និងមនុស្សសាស្ត្រ; បណ្ឌិត Huynh My Phuong ព្រឹទ្ធបុរសមហាវិទ្យាល័យត្រៀមបរិញ្ញាបត្រ; បណ្ឌិត Tran Kim Khanh អនុប្រធានករិយាល័យគ្រប់គ្រងការប្រឡងនិងពិន្ទុ; វេជ្ជបណ្ឌិត Truong Thi Thu Hien នាយករងមន្ទីរពេទ្យសាកលវិទ្យាល័យត្រាវិញ; អនុបណ្ឌិត Chau Thi Truc Ly ប្រធានការិយាល័យក្រុមប្រឹក្សាភិបាលសាលា; ព្រមទាំងករិយាល័យសហប្រតិបត្តិការអន្តរជាតិ និងគណៈកម្មាធិការជម្រើសនិស្សិតអន្តរជាតិបានចូលរួមផងដែរ។
ក្នុងអង្គជំនួបនេះ ឯកឧត្តម ទូច វិសាលសុខ រដ្ឋលេខាធិការក្រសួងអប់រំ យុវជន និងកីឡា បានស្វាគមន៍យ៉ាងកក់ក្ដៅចំពោះគណៈប្រតិភូ ដែលបានមកទស្សនកិច្ចនៅក្រសួង ហើយបានថ្លែងអំណរគុណចំពោះសាកលវិទ្យាល័យត្រាវិញ បានផ្តល់ជូនអាហារូបករណ៍ជាច្រើនកន្លែងសម្រាប់និស្សិតកម្ពុជាទៅសិក្សានៅសាលា ជាពិសេសលើផ្នែកវិទ្យាសាស្ត្រសុខាភិបាល។ ក្រសួងអប់រំ យុវជន និងកីឡា តែងតែគាំទ្រសាកលវិទ្យាល័យត្រាវិញ ពង្រីកកិច្ចសហប្រតិបត្តិការជាមួយវិទ្យាស្ថាន សាកលវិទ្យាល័យនានាក្នុងប្រទេសកម្ពុជាលើការបណ្តុះបណ្តាល ការស្រាវជ្រាវវិទ្យាសាស្ត្រ ជម្រើសនិស្សិត និងការបង្រៀនភាសាវៀតណាម ...
បណ្ឌិត Thach Thi Dan សាកលវិទ្យាធិការរងនៃសាកលវិទ្យាល័យត្រាវិញ ជូនវត្ថុអនុស្សាវរីយ៍ ដល់ឯកឧត្តម ទូច វិសាលសុខ រដ្ឋលេខាធិការក្រសួងអប់រំ យុវជន និងកីឡា
ក្នុងឱកាសនេះដែរ បណ្ឌិត Thach Thi Dan សាកលវិទ្យាធិការរងបានថ្លែងអំណរគុណចំពោះឯកឧត្តម ទូច វិសាលសុខ រដ្ឋលេខាធិការក្រសួងអប់រំ យុវជន និងកីឡា ដែលបានចំណាយពេលវេលាទទួលគណៈប្រតិភូ និងតែងតែគាំទ្រសាកលវិទ្យាល័យត្រាវិញនាពេលកន្លងមក។ សាកលវិទ្យាធិការរងសង្ឃឹមថា ក្រសួងអប់រំ យុវជន និងកីឡា នឹងបន្តការគាំទ្រសាលាក្នុងការប្រឹក្សាពិគ្រោះតម្រែតម្រង់វិជ្ជាជីវៈ និងជម្រើសនិស្សិត ក៏ដូចជាជួយសាលាក្នុងការតភ្ជាប់ជាមួយមន្ទីរអប់រំ យុវជន និងកីឡានៅបណ្តាខេត្ត ក្នុងការប្រឹក្សាពិគ្រោះតម្រែតម្រង់ទិស ជម្រើសនិស្សិត។ នាពេលខាងមុខ សាលាមានបំណងនឹងបង្កើតការិយាល័យតំណាងនៃសាកលវិទ្យាល័យត្រាវិញនៅទីក្រុងភ្នំពេញ ដើម្បីពង្រឹងទំនាក់ទំនង និងកិច្ចសហប្រតិបត្តិការជាមួយដៃគូ និងបើកថ្នាក់បណ្ដុះបណ្ដាលភាសាវៀតណាមនៅកម្ពុជា។
បច្ចុប្បន្ននេះ សាលាមាននិស្សិតកម្ពុជាជិត១០០នាក់ កំពុងសិក្សានៅសាកលវិទ្យាល័យត្រាវិញ នៅលើមុខជំនាញសុខាភិបាល វិស្វកម្ម កសិកម្មនិងវារីវប្បកម្ម សេដ្ឋកិច្ច ។ល។ ឆ្លងតាមរយៈដំណើរទស្សនកិច្ចរបស់គណៈប្រតិភូ សាលាសង្ឃឹមថានឹងពង្រីកទំនាក់ទំនងកិច្ចសហប្រតិបត្តិការជាមួយដៃគូនានានៅព្រះរាជាណាចក្រកម្ពុជាលើវិស័យបណ្តុះបណ្តាល ស្រាវជ្រាវវិទ្យាសាស្ត្រ ការផ្ទេរបច្ចេកវិទ្យា... ដើម្បីអោយនិស្សិតកម្ពុជាមានចំណាប់អារម្មណ៍ទៅសិក្សាស្រាវជ្រាវនៅសាកលវិទ្យាល័យត្រាវិញ រួមចំណែកបណ្តុះបណ្តាលធនធានមនុស្សប្រកបដោយគុណភាពសម្រាប់កម្ពុជា។
ក្នុងឱកាសនេះ បណ្ឌិត Thach Thi Dan សាកលវិទ្យាធិការរង បានអញ្ជើញ ឯកឧត្តម ទូច វិសាលសុខ រដ្ឋលេខាធិការក្រសួងអប់រំ យុវជន និងកីឡា មកទស្សនកិច្ចនៅសាកលវិទ្យាល័យត្រាវិញ នាពេលឆាប់ៗខាងមុខនេះ។
អត្ថបទដោយ៖ Dong Lam
ប្រែសម្រួលដោយ៖ Sa Phone