សាកលវិទ្យាល័យត្រាវិញសហការបណ្ដុះបណ្ដាលធនធានមនុស្សសម្រាប់ខេត្តត្បូងឃ្មុំ នៃព្រះរាជាណាចក្រកម្ពុជា
- សេចក្ដីលម្អិត
- ជំពូក៖ ព័ត៌មាន
- ចេញផ្សាយនា 02 មករា 2024
- ចុចដង៖ 170
ត្បូងឃ្មុំ - នាថ្ងៃទី២៥ ខែធ្នូ គណៈប្រតិភូសាកលវិទ្យាល័យត្រាវិញ ដឹកនាំដោយបណ្ឌិត Thach Thi Dan សាកលវិទ្យាធិការរង បានទៅទស្សនកិច្ចនៅខេត្តត្បូងឃ្មុំ ប្រទេសកម្ពុជា ដើម្បីពិភាក្សាអំពីលទ្ធភាពបណ្តុះបណ្តាលធនធានមនុស្ស តបតាមការអញ្ជើញរបស់ប្រធានមន្ទីរសុខាភិបាលខេត្តត្បូងឃ្មុំ។
ទទួលស្វាគមន៍គណៈប្រតិភូ ខាងគណៈអភិបាលខេត្តត្បូងឃ្មុំ មានឯកឧត្តម កែវ វណ្ណៈ ប្រធានមន្ទីរសុខាភិបាល;ឯកឧត្តម អ៊ិន ពៅសម្បត្តិ ប្រធានមន្ទីរអប់រំ យុវជន និងកីឡា; ឯកឧត្តម ឯក ឃាង ប្រធានមន្ទីរពេទ្យមិត្តភាពកម្ពុជា - ចិន ប្រចាំខេត្តត្បូងឃ្មុំ មួយអន្លើដោយតំណាងស្ថានប័ននានាក៏បានអញ្ជើញចូលរួមផងដែរ។
ខាងសាកលវិទ្យាល័យត្រាវិញ រួមមានបណ្ឌិត Thach Thi Dan សាកលវិទ្យាធិការរង; សាស្ត្រាចារ្យរង បណ្ឌិត Nguyen Van Nguyen នាយកមហាវិទ្យាល័យសេដ្ឋកិច្ច និងនីតិសាស្ត្រ; បណ្ឌិត Ngo So Phe នាយកមហាវិទ្យាល័យភាសា វប្បធម៌ វិចិត្រសិល្បៈខ្មែរណាមបូ និងមនុស្សសាស្ត្រ; បណ្ឌិត Huynh My Phuong ព្រឹទ្ធបុរសមហាវិទ្យាល័យត្រៀមបរិញ្ញាបត្រ; បណ្ឌិត Tran Kim Khanh អនុប្រធានករិយាល័យគ្រប់គ្រងការប្រឡងនិងពិន្ទុ; វេជ្ជបណ្ឌិត Truong Thi Thu Hien នាយករងមន្ទីរពេទ្យសាកលវិទ្យាល័យត្រាវិញ; អនុបណ្ឌិត Chau Thi Truc Ly ប្រធានការិយាល័យក្រុមប្រឹក្សាភិបាលសាលា; ព្រមទាំងករិយាល័យសហប្រតិបត្តិការអន្តរជាតិ និងគណៈកម្មាធិការជម្រើសនិស្សិតអន្តរជាតិបានចូលរួមផងដែរ។
ក្នុងកិច្ចប្រជុំនេះ ឯកឧត្តម កែវ វណ្ណៈ ប្រធានមន្ទីរសុខាភិបាល បានណែនាំដោយសង្ខេបអំពីសេដ្ឋកិច្ច - សង្គម នៃខេត្តត្បូងឃ្មុំ។ អភិបាលខេត្តត្បូងឃ្មុំ តែងតែស្វែងរកឱកាសសហការក្នុងការបណ្តុះបណ្តាលធនធានមនុស្សសម្រាប់ខេត្ត ជាពិសេសលើវិស័យសុខាភិបាល។ បច្ចុប្បន្នខេត្តត្បូងឃ្មុំកំពុងសហការជាមួយខេត្តមួយចំនួននៅវៀតណាមក្នុងការបណ្តុះបណ្តាល កម្រិតបរិញ្ញាបត្រ និងក្រោយបរិញ្ញាបត្រផ្នែកសុខាភិបាល។ លើសពីនេះ មន្ទីរសុខាភិបាលក៏បានបញ្ជូនបុគ្គលិកទៅបណ្តុះបណ្តាលវគ្គខ្លី និងក្រោយបរិញ្ញាបត្រនៅរាជធានីភ្នំពេញ។ ឯកឧត្តមសង្ឃឹមថា តាមរយៈកិច្ចប្រជុំនេះ សាកលវិទ្យាល័យត្រាវិញនឹងគាំទ្រមន្ទីរសុខាភិបាលខេត្តត្បូងឃ្មុំ ក្នុងការបណ្តុះបណ្តាលធនធានមនុស្ស លើកកម្ពស់ជំនាញវិជ្ជាជីវៈ ដើម្បីបម្រើលើវិស័យសុខាភិបាលរបស់ខេត្ត។
ឯកឧត្តម អ៊ិន ពៅសម្បត្តិ ប្រធានមន្ទីរអប់រំ យុវជន និងកីឡា បានណែនាំពីស្ថានភាពអប់រំ និងបណ្តុះបណ្តាលក្នុងខេត្តត្បូងឃ្មុំ។ ឯកឧត្តមអោយដឹងថា ពេលនេះ សិស្សានុសិស្សទើបតែប្រឡងបញ្ចប់សញ្ញាបត្រមធ្យមសិក្សាទុតិយភូមិ និងកំពុងពិចារណាដាក់ពាក្យចូលរៀននៅកម្រិតបរិញ្ញាបត្ររង និងកម្រិតបរិញ្ញាបត្រទាំងក្នុង និងក្រៅប្រទេស។ ឯកឧត្តមបានបន្ថែមថា នៅខេត្តត្បូងឃ្មុំ សិស្សមានតម្រូវការទៅសិក្សា និងស្រាវជ្រាវនៅបរទេសលើវិស័យខុសៗគ្នា។ អាស្រ័យហេតុនេះ ឯកឧត្តមសង្ឃឹមថា ភាគីទាំងពីរនឹងពង្រីកទំនាក់ទំនងសហប្រតិបត្តិការប្រកបដោយប្រសិទ្ធភាព ដើម្បីឱ្យសិស្សនៅខេត្តត្បូងឃ្មុំ ទៅសិក្សានៅប្រទេសវៀតណាមនិយាយរួម និងសាកលវិទ្យាល័យត្រាវិញនិយាយដោយឡែកមួយថ្ងៃកាន់តែច្រើនឡើង។
បណ្ឌិត Thach Thi Dan សាកលវិទ្យាធិការរងជូនវត្ថុអនុស្សាវរីយ៍ដល់ឯកឧត្តម កែវ វណ្ណៈ ប្រធានមន្ទីរសុខាភិបាលខេត្តត្បូងឃ្មុំ
បណ្ឌិត Thach Thi Dan សាកលវិទ្យាធិការរងជូនវត្ថុអនុស្សាវរីយ៍ដល់ឯកឧត្តម អ៊ិន ពៅសម្បត្តិ ប្រធានមន្ទីរអប់រំ យុវជន និងកីឡាខេត្តត្បូងឃ្មុំ
ក្នុងឱកាសនេះដែរ បណ្ឌិត Thach Thi Dan សាកលវិទ្យាធិការរង បានថ្លែងអំណរគុណអភិបាលខេត្តត្បូងឃ្មុំ ប្រធានមន្ទីរសុខាភិបាល និងប្រធានមន្ទីរអប់រំ យុវជន និងកីឡា ប្រធានមន្ទីរពេទ្យមិត្តភាពកម្ពុជា-ចិន ប្រចាំនៅខេត្តត្បូងឃ្មុំ ដែលបានអញ្ជើញគណៈប្រតិភូមកបំពេញទស្សនកិច្ចនៅខេត្ត។ តាមរយៈការពិភាក្សាគ្នា សាកលវិទ្យាធិការរងយល់ឃើញថា សាកលវិទ្យាល័យត្រាវិញអាចអនុវត្តនូវសំណើសហប្រតិបត្តិការក្នុងការបណ្តុះបណ្តាលធនធានមនុស្សសម្រាប់ខេត្ត ជាពិសេសការបណ្តុះបណ្តាលធនធានមនុស្សផ្នែកសុខាភិបាល។
បច្ចុប្បន្ននេះ សាលាមាននិស្សិតកម្ពុជាជិត១០០នាក់ កំពុងសិក្សានៅសាកលវិទ្យាល័យត្រាវិញ នៅលើមុខជំនាញសុខាភិបាល វិស្វកម្ម កសិកម្មនិងវារីវប្បកម្ម សេដ្ឋកិច្ច ។ល។ ឆ្លងតាមរយៈដំណើរទស្សនកិច្ចរបស់គណៈប្រតិភូ សាលាសង្ឃឹមថានឹងពង្រីកទំនាក់ទំនងកិច្ចសហប្រតិបត្តិការបណ្តុះបណ្តាលវិជ្ជាជីវៈដល់សិស្សានុសិស្សនៅកម្ពុជានិយាយរួម និងខេត្តត្បូងឃ្មុំនិយាយដោយឡែក។ ជាមួយនឹងសក្តានុពល និងភាពលេចធ្លោដែលភាគីទាំងពីរកំពុងមាន សន្យាថានឹងនាំមកឱកាសជាច្រើនសម្រាប់កិច្ចសហប្រតិបត្តិការមានការរីកចម្រើននាពេលអនាគត។
នាថ្ងៃនេះដដែល គណៈប្រតិភូបានអញ្ជើញទៅទស្សនាមន្ទីរពេទ្យមិត្តភាពកម្ពុជា-ចិន នៅខេត្តត្បូងឃ្មុំ និងមន្ទីរពេទ្យ KV នៅខេត្តកំពង់ចាម។
ក្នុងរយៈពេលពីថ្ងៃទី២៥ ដល់ថ្ងៃទី២៩ ខែធ្នូ គណៈប្រតិភូសាកលវិទ្យាល័យត្រាវិញនឹងទៅទស្សនកិច្ចជាមួយនឹងក្រសួងអប់រំ យុវជន និងកីឡា; ក្រសួងសុខាភិបាល (សាកលវិទ្យាល័យវិទ្យាសាស្ត្រសុខាភិបាល - UHS); សាកលវិទ្យាល័យភូមិន្ទភ្នំពេញ; សាកលវិទ្យាល័យចេនឡា និងដៃគូនៅរាជធានីភ្នំពេញ និងខេត្តស្វាយរៀង។
អត្ថបទដោយ៖ Đong Lam
ប្រែសម្រួលដោយ៖ Sa Phone