គណៈប្រតិភូនៃស្ថានទូត និងស្ថានអគ្គកុងស៊ុលកាណាដានៅវៀតណាមបានធ្វើដំណើរទស្សនកិច្ចនិងធ្វើការនៅសាកលវិទ្យាល័យត្រាវិញ
- សេចក្ដីលម្អិត
- ជំពូក៖ ព័ត៌មាន
- ចេញផ្សាយនា 19 មីនា 2022
- ចុចដង៖ 446
នាថ្ងៃទី ៧ ខែមីនា ឆ្នាំ២០២២ គណៈប្រតិភូស្ថានទូត និងស្ថានអគ្គកុងស៊ុលកាណាដាប្រចាំនៅវៀតណាមបានមកទស្សនកិច្ច និងធ្វើការនៅសាកលវិទ្យាល័យត្រាវិញ។ សាស្ត្រាចារ្យរង បណ្ឌិត Pham Tiet Khanh សាកលវិទ្យាធិការនៃសាកលវិទ្យាល័យត្រាវិញ ប្រធានសមាគមមហាវិទ្យាល័យសហគមន៍វៀតណាម និងជាប្រធានសមាគមមិត្តភាពវៀតណាម-កាណាដា ខេត្តត្រាវិញបានទទួលស្វាគមន៍គណៈប្រតិភូ។
រីឯខាងកាណាដាក៏មានលោក Brian Allemekenders ទីប្រឹក្សាសម្រាប់កិច្ចសហប្រតិបត្តិការ និងអភិវឌ្ឍន៍នៃស្ថានទូតកាណាដាប្រចាំនៅវៀតណាម និងលោក Bez Babakhani អគ្គកុងស៊ុលកាណាដាប្រចាំនៅវៀតណាម ព្រមទាំងគណៈប្រតិភូស្ថានទូត និងស្ថានកុងស៊ុលកាណាដាផងដែរ។
ទទួលជំនួបគណៈប្រតិភូមាន សាស្ត្រាចារ្យរង បណ្ឌិត Pham Tiet Khanh សាកលវិទ្យាធិការនៃសាកលវិទ្យាល័យត្រាវិញ ប្រធានសមាគមមិត្តភាពវៀតណាម-កាណាដាខេត្តត្រាវិញ; លោក Tran Hoan Kim អតីតអនុលេខាគណៈកម្មាធិការបក្សខេត្ត អតីតប្រធានគណៈកម្មាធិការប្រជាជនខេត្តត្រាវិញ ប្រធានក្រុមប្រឹក្សានៃសាកលវិទ្យាល័យត្រាវិញ; លោកស្រី Thach Thi Dan សាកលវិទ្យាធិការរងនៃសាកលវិទ្យាល័យ ព្រមទាំងសមាជិកនៃក្រុមប្រឹក្សាភិបាល និងតំណាងថ្នាក់ដឹកនាំអង្គភាពនានា។
ថ្លែងសុន្ទរកថាស្វាគមន៍ សាស្ត្រាចារ្យរង បណ្ឌិត Pham Tiet Khanh សាកលវិទ្យាធិការនៃសាកលវិទ្យាល័យត្រាវិញ ប្រធានសមាគមមហាវិទ្យាល័យសហគមន៍វៀតណាម ប្រធានសមាគមមិត្តភាពវៀតណាម-កាណាដានៅខេត្តត្រាវិញ បានមានប្រសាសន៍ថា៖ «ចាប់តាំងពីឆ្នាំ ២០០១ កិច្ចសហប្រតិបត្តិការរវាងបណ្ដាសាលា វិទ្យាស្ថាននៃកាណាដា និងសាកលវិទ្យាល័យត្រាវិញបាននាំមកនូវភាពជោគជ័យជាច្រើនក្នុងវិស័យអប់រំ សេដ្ឋកិច្ច និងនាំមកនូវវឌ្ឍនភាពខាងវិជ្ជាជីវៈសម្រាប់ប្រជាជនខេត្តត្រាវិញ ក៏ដូចជាទូទាំងតំបន់វាលរាបទន្លេគឺវឡុង។ ជាពិសេសដោយមានការគាំទ្រពីស្ថានទូត និងស្ថានកុងស៊ុលកាណាដាប្រចាំនៅវៀតណាម ដោយមានគម្រោងចាប់ផ្តើមអាជីវកម្មប្រកបដោយភាពច្នៃប្រឌិតសម្រាប់និស្សិត។ លើសពីនេះទៀត សាកលវិទ្យាល័យត្រាវិញតែងតែយកចិត្តទុកដាក់លើការលើកទឹកចិត្តនិស្សិតឱ្យចូលរួមក្នុងសកម្មភាពចាប់ផ្តើមបង្កើតគំនិតច្នៃប្រឌិត ឆ្ពោះទៅរកផលប្រយោជន៍សហគមន៍។»
ក្នុងជំនួបនេះផងដែរ លោក Bez Babakhani អគ្គកុងស៊ុលកាណាដាប្រចាំនៅវៀតណាម បានថ្លែងអំណរគុណចំពោះសាកលវិទ្យាល័យត្រាវិញ ដែលបានរៀបចំការទទួលស្វាគមន៍យ៉ាងយកចិត្តទុកដាក់។ ក្រៅពីនេះ លោកក៏មានការចាប់អារម្មណ៍យ៉ាងខ្លាំងចំពោះជោគជ័យរបស់សាកលវិទ្យាល័យត្រាវិញនាពេលបច្ចុប្បន្ននេះ ដែលជាសក្ខីភាពបញ្ជាក់អំពីចំណងមិត្តភាពរវាងរដ្ឋាភិបាល និងប្រជាជននៃប្រទេសទាំងពីរ នៅពេលដែលការរួមចំណែករបស់រដ្ឋាភិបាល និងប្រជាជនកាណាដាត្រូវបានកោតសរសើរយ៉ាងខ្លាំង បង្កើតឱ្យមានអត្ថន័យ។ ផ្លាស់ប្តូរសម្រាប់ប្រជាជនខេត្តត្រាវិញ និងសាកលវិទ្យាល័យត្រាវិញ។
លោក Brian Allemekinders ទីប្រឹក្សាកិច្ចសហប្រតិបត្តិការអភិវឌ្ឍន៍នៃស្ថានទូតកាណាដាប្រចាំនៅវៀតណាមបានចែករំលែកថា៖ «នេះជាលើកទីមួយហើយដែលស្ថានទូត និងស្ថានកុងស៊ុលកាណាដាប្រចាំនៅវៀតណាមទាំងពីរបានរួមធ្វើទស្សនកិច្ច និងធ្វើការនៅសាកលវិទ្យាល័យត្រាវិញ ដោយបង្ហាញពីការគោរពនូវទំនាក់ទំនងរវាងភាគីទាំងពីរ ហើយទន្ទឹមនឹងនោះ បង្ហាញពីការប្តេជ្ញាចិត្តយូរអង្វែង និងប្រាកដប្រជារបស់បណ្ដាក្រសួង ស្ថាប័ននៃរដ្ឋាភិបាលកាណាដា ក្នុងការបន្តជួយឧបត្ថម្ភអភិវឌ្ឍន៍ជាយូរអង្វែងដល់ខេត្តត្រាវិញ និងសាកលវិទ្យាល័យត្រាវិញ។ គំរូបច្ចុប្បន្ននៃសាកលវិទ្យាល័យត្រាវិញ គឺជាប្រភពដើមនៃគំរូសាកលវិទ្យាល័យសហគមន៍កាណាដា ដែលជាគំរូជួយដល់ការទទួលបានការអប់រំ និងការបណ្តុះបណ្តាលជំនាញ នាំមកទីផ្សារកម្មករដែលមានជំនាញ និងជំនាញខ្ពស់ ហើយទន្ទឹមនឹងនោះ វាជួយផ្សារភ្ជាប់តម្រូវការរវាង អាជីវកម្ម និងវិទ្យាស្ថានបណ្តុះបណ្តាល។»
ក្នុងឱកាសនៃការធ្វើដំណើរទស្សនកិច្ចនៅសាកលវិទ្យាល័យត្រាវិញ គណៈប្រតិភូនៃស្ថានទូត និងស្ថានអគ្គកុងស៊ុលក៏បានស្នើនូវសកម្មភាពដើម្បីអបអរសាទរខួបលើកទី៥០ នៃការបង្កើតទំនាក់ទំនងការទូតរវាងវៀតណាម និងកាណាដាក្នុងឆ្នាំ២០២៣។ រួមទាំងការប្រើប្រាស់រូបភាពគំរូរបស់សាកលវិទ្យាល័យត្រាវិញជាគំរូតំណាងសម្រាប់ភាពជោគជ័យនៃការបង្កើតទំនាក់ទំនងសហប្រតិបត្តិការ និងគាំទ្រគ្នាទៅវិញទៅមករវាងប្រជាជន និងរដ្ឋាភិបាលនៃប្រទេសទាំងពីរ។
រូបភាពមួយចំនួននៃដំណើរទស្សនកិច្ចនៅសាកលវិទ្យាល័យត្រាវិញ របស់គណៈប្រតិភូស្ថានទូត និងស្ថានអគ្គកុងស៊ុលកាណាដាប្រចាំនៅវៀតណាម។
អត្ថបទដោយ៖ Đong Lam
ប្រែសម្រួលដោយ៖ Ngoc Han – Thanh Ha