សាកលវិទ្យាល័យត្រាវិញសហប្រតិបត្តិការក្នុងការបណ្ដុះបណ្ដាលនិស្សិតកម្ពុជា
- សេចក្ដីលម្អិត
- ជំពូក៖ ព័ត៌មាន
- ចេញផ្សាយនា 24 សីហា 2022
- ចុចដង៖ 450
នៅថ្ងៃទី១៦ ខែសីហា ឆ្នាំ២០២២ ថ្នាក់ដឹកនាំនៃសាកលវិទ្យាល័យត្រាវិញបានឱ្យដឹងថា សាកលវិទ្យាល័យត្រាវិញទើបមានជំនួបការងារជាមួយថ្នាក់ដឹកនាំនៃមន្ទីរអប់រំ យុវជននិងកីឡា និងមន្ទីរសុខាភិបាលខេត្តស្វាយរៀង (ប្រទេសកម្ពុជា) ព្រមទាំងជាមួយនាយកវិទ្យាល័យជាង២០រូបនៃបណ្ដាសាលាវិទ្យាល័យនៅក្នុងខេត្តស្វាយរៀងស្ដីអំពីកិច្ចការជម្រើសនិស្សិតថ្នាក់បរិញ្ញាបត្រ និងថ្នាក់ក្រោយបរិញ្ញាបត្រ។
ប្រតិភូនៃសាកលវិទ្យាល័យត្រាវិញធ្វើទស្សនកិច្ចនៅវិទ្យាល័យហ៊ុនសែនចេក
ជាមួយនឹងនោះផងដែរ សាស្ត្រាចារ្យរង បណ្ឌិត Diep Thanh Tung សាកលវិទ្យាធិការរងនៃសាកលវិទ្យាល័យត្រាវិញរួមជាមួយនឹងបុគ្គលិក និងគ្រូបង្រៀនអចិន្ត្រៃយ៍នៃគណៈកម្មការជម្រើសនិស្សិតអន្តរជាតិ មានកិច្ចជំនួបពិភាក្សាស្ដីពីកិច្ចសហប្រតិបត្តិការក្នុងការជម្រើសនិស្សិត និងណែនាំអំពីមុខជំនាញបណ្តុះបណ្តាលរបស់សាកលវិទ្យាល័យត្រាវិញ ក៏ដូចជាផ្ដល់នូវព័ត៌មានអំពីស្ថានភាពនិស្សិតកម្ពុជាដែលកំពុងសិក្សានៅសាកលវិទ្យាល័យត្រាវិញផងដែរ។
លោកសាស្ត្រាចារ្យរង បណ្ឌិត Diep Thanh Tung សាកលវិទ្យាធិការរងនៃសាកលវិទ្យាល័យត្រាវិញបានមានប្រសាសន៍ថា៖ ប៉ុន្មានឆ្នាំមកនេះសាកលវិទ្យាល័យត្រាវិញបានសម្រេចនូវបេសកកម្មបណ្តុះបណ្តាលធនធានមនុស្សប្រកបដោយគុណភាពខ្ពស់សម្រាប់តំបន់វាលរាបទន្លេគឺវឡុង និងទូទាំងប្រទេស។ ជាមួយនឹងក្តីប្រាថ្នាចង់ឈានទៅដល់កម្រិតអន្តរជាតិ និងបណ្តុះបណ្ដាលធនធានមនុស្សដើម្បីឆ្លើយតបនឹងនិន្នាការនៃសមាហរណកម្មអន្តរជាតិ សាកលវិទ្យាល័យត្រាវិញបានបន្តកែលម្អគុណភាពបណ្តុះបណ្តាលតាមរយៈការទទួលស្គាល់អំពីគុណភាពបណ្ដុះបណ្ដាលអន្តរជាតិដូចជា FIBAA, AUN - QA, ABET។
បច្ចុប្បន្ននេះ ដោយមានកម្មវិធីសិក្សាចំនួន១២ ដែលបានទទួលស្គាល់អំពីគុណភាពបណ្ដុះបណ្ដាលអន្តរជាតិរបស់ FIBAA, AUN-QA ព្រមទាំងមានកម្មវិធីសិក្សាចំនួន០១ផ្នែកបច្ចេកវិទ្យាព័ត៌មានដែលបានទទួលស្គាល់អំពីគុណភាពបណ្ដុះបណ្ដាលរបស់ ABET។ ហេតុដូច្នោះហើយសាកលវិទ្យាល័យត្រាវិញកំពុងនាំមុខគេក្នុងតំបន់វាលរាបទន្លេគឺវឡុងអំពីចំនួននៃកម្មវិធីសិក្សាទទួលស្គាល់អំពីគុណភាពបណ្ដុះបណ្ដាលកម្រិតអន្តរជាតិ។
លោក គង់ សំអឿន នាយកសាលាវិទ្យាល័យរមាសហែក បានមានប្រសាសន៍ថា៖ គុណភាពនៃការបណ្តុះបណ្តាលផ្នែកវេជ្ជសាស្រ្តនៅសាកលវិទ្យាល័យត្រាវិញគឺល្អណាស់។ និស្សិតក្រោយពីបញ្ចប់ការសិក្សាមានជំនាញខ្ពស់ ឆ្លើយតបតម្រូវការពិនិត្យ និងព្យាបាលជំងឺរបស់ប្រជាពលរដ្ឋ ជាក់ស្ដែងគឺនិស្សិតពេទ្យដែលចេញពីសាកលវិទ្យាល័យត្រាវិញបាននិងកំពុងបម្រើការងារ ក្នុងវិស័យវេជ្ជសាស្រ្ដខេត្តស្វាយរៀង ក៏ដូចជាបានបើកគ្លីនិកដើម្បីបម្រើតម្រូវការពិនិត្យ និងព្យាបាលជំងឺរបស់ប្រជាពលរដ្ឋនៃកម្ពុជា។
បច្ចុប្បន្ននេះ មានអតីតនិស្សិតនៃសាកលវិទ្យាល័យត្រាវិញជាង១០នាក់ ដែលកំពុងបម្រើការងារក្នុងប្រព័ន្ធសុខាភិបាលខេត្តស្វាយរៀង និងទទួលបានការវាយតម្លៃខ្ពស់ពីប្រជាពលរដ្ឋ និងថ្នាក់ដឹកនាំមន្ទីរសុខាភិបាលខេត្តស្វាយរៀង។ នេះបង្ហាញឱ្យឃើញថា គុណភាពបណ្តុះបណ្តាលរបស់សាកលវិទ្យាល័យ ជាពិសេសផ្នែកវេជ្ជសាស្រ្ត បានបំពេញនូវតម្រូវការការងាររបស់ខេត្តស្វាយរៀង និងប្រទេសកម្ពុជាទាំងមូល។
តំណាងមន្ទីរអប់រំ យុវជននិងកីឡាខេត្តស្វាយរៀង លោក សាននាង មានប្រសាសន៍ថា លោក និងគណៈប្រតិភូបានធ្វើដំណើរទស្សនកិច្ចនៅសាកលវិទ្យាល័យត្រាវិញក្នុងឆ្នាំ២០១៨ ហើយបន្ទាប់ពីបានឃើញការរីកចម្រើនអំពីទំហំ និងគុណភាពនៃការបណ្តុះបណ្តាលរបស់លាសា លោកជឿជាក់ថា សាកលវិទ្យាល័យត្រាវិញនឹងបន្តពង្រីកកិច្ចសហប្រតិបត្តិការបណ្តុះបណ្តាល និងការជម្រើសនិស្សិតនៅកម្ពុជា។ លោកគាំទ្រនិងបង្ករលក្ខខណ្ឌងាយស្រួលបំផុតសម្រាប់សាកលវិទ្យាល័យត្រាវិញដើម្បីតភ្ជាប់ជាមួយវិទ្យាល័យនានាក្នុងខេត្តស្វាយរៀងសម្រាប់ការជម្រើសនិស្សិត។
ក្នុងដំណើរបំពេញទស្សនកិច្ចការងារនៅកម្ពុជារបស់ថ្នាក់ដឹកនាំនៃសាកលវិទ្យាល័យត្រាវិញ គណៈប្រតិភូនឹងចូលរួមកម្មវិធីនៃកិច្ចពិភាក្សាពិព័រណ៍អប់រំវៀតណាមក្នុងក្របខណ្ឌនៃសប្តាហ៍វប្បធម៌វៀតណាមនៅកម្ពុជា ដែលប្រព្រឹត្តទៅនៅទីក្រុងភ្នំពេញ ចាប់ពីថ្ងៃទី១០ ដល់ថ្ងៃទី១១ ខែសីហា និងជួបជាមួយដៃគូសហប្រតិបត្តិការដើម្បីអនុវត្តសកម្មភាពសហប្រតិបត្តិការអន្តរជាតិក្នុងវិស័យស្រាវជ្រាវវិទ្យាសាស្ត្រ ការអភិវឌ្ឍន៍វិស័យអប់រំ និងការជម្រើសនិស្សិតអន្តរជាតិ។
ប្រភពអត្ថបទ៖https://www.saigondautu.com.vn/van-hoa-doi-song/truong-dh-tra-vinh-hop-tac-dao-tao-du-hoc-sinh-campuchia-108352.html
អត្ថបទដោយ៖ Ngoc Dan
ប្រែសម្រួលដោយ៖ Seha Thach
