អភិរក្ស និងអភិវឌ្ឍតម្លៃវប្បធម៌តាមរយៈកិច្ចសហប្រតិបត្តិការអប់រំ
- សេចក្ដីលម្អិត
- ជំពូក៖ ព័ត៌មាន
- ចេញផ្សាយនា 06 តុលា 2022
- ចុចដង៖ 357
TVU -អភិរក្ស និងអភិវឌ្ឍតម្លៃអត្តសញ្ញាណវប្បធម៌ជាតិ គឺជាយុទ្ធសាស្ត្រអភិវឌ្ឍន៍ប្រកបដោយចីរភាពរបស់ប្រទេសនីមួយៗ និងជាភារកិច្ចរួមរបស់សង្គមទាំងមូល ក្នុងនោះការអប់រំមានតួនាទីសំខាន់បំផុត តាមរយៈការអប់រំ តម្លៃសម្ភារៈ តម្លៃស្មារតី បទពិសោធន៍ជាក់ស្តែង របៀបរស់នៅ និងភាសា... ត្រូវបានអភិរក្ស និងអភិវឌ្ឍ រួមចំណែកនាំមកគុណតម្លៃជាច្រើនជូនសហគមន៍។
ដោះដូរវប្បធម៌រួមចំណែកអភិរក្ស និងអភិវឌ្ឍអត្តសញ្ញាណវប្បធម៌ជាតិ
សប្តាហ៍វប្បធម៌កម្ពុជានៅវៀតណាម ចាត់តាំងដោយក្រសួងវប្បធម៌ កីឡា និងទេសចរណ៍វៀតណាម សហការជាមួយក្រសួងវប្បធម៌ និងសិល្បៈកម្ពុជា ប្រារព្ធឡើងនៅខេត្តត្រាវិញ ចាប់ពីថ្ងៃទី ២៩ ខែកញ្ញា ដល់ថ្ងៃទី០១ ខែតុលា ឆ្នាំ ២០២២ ដើម្បីចូលរួមអបអរសាទរអនុស្សារីយ៍ខួបលើកទី ៥៥ ទិវាបង្កើតទំនាក់ទំនងការទូតរវាងកម្ពុជា - វៀតណាម និងអបអរសាទរឆ្នាំមិត្តភាពវៀតណាម - កម្ពុជាឆ្នាំ២០២២។ ជាមួយនឹងសកម្មភាពសំដែង សិល្បៈ របាំ ចម្រៀង និងការតាំងពិព័រណ៍ស្នាដៃសិល្បៈវប្បធម៌ខ្មែរ សមិទ្ធផលអប់រំ ... មានតម្លៃមិនអាចកាត់ថ្លៃបានដែលរដ្ឋាភិបាលនៃប្រទេសទាំងពីរកំពុងព្យាយាមអភិរក្ស និងអភិវឌ្ឍ។
កម្មវិធីសិល្បៈក្នុងក្របខ័ណ្ឌសប្ដាហ៍វប្បធម៌កម្ពុជានៅវៀតណាម
តាមរយៈសកម្មភាពក្នុងក្របខ័ណ្ឌនៃព្រឹត្តិការណ៍ សប្តាហ៍វប្បធម៌កម្ពុជានៅវៀតណាម ប្រជាជនវៀតណាមនិយាយរួម និងជាពិសេសគឺខេត្តត្រាវិញ មានឱកាសយល់ដឹងកាន់តែច្បាស់អំពីប្រទេស និងប្រជាជនកម្ពុជា ហើយទន្ទឹមនឹងនោះ រួមចំណែកលើកកម្ពស់ទំនាក់ទំនងមិត្តភាព និងកិច្ចសហប្រតិបត្តិការរវាងប្រជាជននៃប្រទេសទាំងពីរជាមួយនឹងទិសដៅ៖ «អ្នកជិតខាងល្អ មិត្តភាពប្រពៃណី សហប្រតិបត្តិការគ្រប់ជ្រុងជ្រោយ និរន្តរភាពយូរអង្វែង»។ កម្មវិធីវប្បធម៌នានានៃប្រទេសទាំងពីរត្រូវបានប្រារព្ធឡើងជាទៀងទាត់ ដែលមានអត្ថន័យ និងសារៈសំខាន់ក្នុងការពង្រឹងសាមគ្គីភាព មិត្តភាព និងការយោគយល់គ្នាទៅវិញទៅមក រួមចំណែកដល់ការអភិវឌ្ឍសេដ្ឋកិច្ច សង្គមកិច្ច។ នេះក៏ជាឱកាសដើម្បីបង្ហាញអំពីវប្បធម៌ដ៏វិសេសវិសាលនៃប្រទេសទាំងពីរ ហើយទន្ទឹមនឹងនោះចែករំលែកបទពិសោធន៍ក្នុងការអភិរក្ស និងអភិវឌ្ឍតម្លៃវប្បធម៌ដែលបង្កប់នូវអត្តសញ្ញាណជាតិ រួមចំណែកជំរុញទំនាក់ទំនងភូមិផងរបងជាមួយរវាងវៀតណាម - កម្ពុជាឱ្យកាន់តែរីកចម្រើន។
និស្សិតកម្ពុជាកំពុងសិក្សានៅសាកលវិទ្យាល័យត្រាវិញ និងគ្រូបង្រៀននៃសាកលវិទ្យាល័យត្រាវិញចូលរួម
ទស្សនាកម្មវិធីសិល្បៈ
អភិវឌ្ឍតម្លៃវប្បធម៌តាមរយៈកិច្ចសហប្រតិបត្តិការអប់រំ
សាកលវិទ្យាល័យត្រាវិញត្រូវបានថ្នាក់ដឹកនាំខេត្តត្រាវិញប្រគល់ភារកិច្ចធ្វើជាច្រកទ្វារអន្តរជាតិសម្រាប់ខេត្តត្រាវិញ រយៈពេលថ្មីៗនេះ សាកលវិទ្យាល័យត្រាវិញបានពង្រឹងការលើកកម្ពស់ទំនាក់ទំនង និងកិច្ចសហប្រតិបត្តិការអន្តរជាតិលើវិស័យអប់រំជាមួយប្រមាណជាង ៩០ ដៃគូមកពីប្រទេសជាច្រើនជុំវិញពិភពលោកនិយាយរួម និងជាពិសេសគឺរវាងវៀតណាម - កម្ពុជា។ អនុវត្តជាទៀងទាត់នូវកម្មវិធីផ្លាស់ប្តូរ និងដោះដូររវាងស្ថាប័នអប់រំ ស្រាវជ្រាវវិទ្យាសាស្ត្រផ្លាស់ប្តូរនិស្សិតអន្តរជាតិ និស្សិត និងសាស្ត្រាចារ្យ... បង្កើតទំនាក់ទំនង និងជួបពិភាក្សាការងារជាមួយដៃគូទាំងឡាយ បង្កើតការផ្លាស់ប្តូរជាវិជ្ជមានក្នុងទំនាក់ទំនងសហប្រតិបត្តិការ។
ដោយទទួលបានការគាំទ្រពីគណៈកម្មាធិការប្រជាជនខេត្ត និងការគាំទ្រពីបណ្តាក្រសួង ស្ថាប័ននៃប្រទេសទាំងពីរ សាលាបានបង្កើតទំនាក់ទំនងជាមួយដៃគូសហការនានានៃព្រះរាជាណាចក្រកម្ពុជាក្នុងវិស័យដោះដូរវប្បធម៌ អភិវឌ្ឍការអប់រំ ស្រាវជ្រាវវិទ្យាសាស្ត្រ និងផ្ទេរបច្ចេកវិទ្យា។ សាលាបានអនុវត្តយ៉ាងសកម្មនូវការបង្កើតទំនាក់ទំនង និងទទួលបានការគាំទ្រពីស្ថានទូត និងស្ថានអគ្គកុងស៊ុលវៀតណាម និងកម្ពុជា ក្នុងការពង្រីកឱកាសសហប្រតិបត្តិការបណ្តុះបណ្តាលជាមួយស្ថាប័នអប់រំនៅកម្ពុជា។
ចាប់តាំងពីឆ្នាំ 2012 សាកលវិទ្យាល័យត្រាវិញបានបង្កើតមហាវិទ្យាល័យភាសា វប្បធម៌ និងវិចិត្រសិល្បៈខ្មែរណាមបូ។ នេះជាមហាវិទ្យាល័យដ៏ពិសេសមួយ និងជាមហាវិទ្យាល័យដំបូងគេក្នុងទូទាំងប្រទេស ដែលមានបណ្តុះបណ្តាលជាផ្លូវការលើមុខជំនាញភាសា វប្បធម៌ និងវិចិត្រសិល្បៈខ្មែរ អនុវត្តភារកិច្ចសំខាន់របស់ជាតិក្នុងការបណ្តុះបណ្តាលធនធានមនុស្សផ្នែកភាសា វប្បធម៌ និងវិចិត្រសិល្បៈខ្មែរណាមបូ បំពេញតម្រូវការអភិវឌ្ឍវិស័យវប្បធម៌ និងសង្គមនៅតាមខេត្ត ក្រុងក្នុងតំបន់។ ទន្ទឹមនឹងនោះ ការបណ្តុះបណ្តាលភាសា វប្បធម៌ សិល្បៈទស្សនីយភាព ... បានរួមចំណែកអភិរក្ស និងអភិវឌ្ឍអត្តសញ្ញាណវប្បធម៌ជាតិ ជាពិសេសក្នុងខេត្ត និងក្នុងតំបន់និយាយរួម។
លោកជំទាវបណ្ឌិតសភាចារ្យ ភឿង សកុណា រដ្ឋមន្រ្តីក្រសួងវប្បធម៌ និងវិចិត្រសិល្បៈ
នៃព្រះរាជាណាចក្រកម្ពុជាទទួលគណៈប្រតិភូមកពីសាកលវិទ្យាល័យត្រាវិញ
(ក្នុងដំណើរទស្សនកិច្ចនៅកម្ពុជាកាលពី ខែសីហា ឆ្នាំ២០២២)
សមិទ្ធផលនានាពីទំនាក់ទំនងមិត្តភាពវៀតណាម - កម្ពុជាក៏បានរួមចំណែកដល់ភាពជោគជ័យនៃគម្រោងចងក្រងវចនានុក្រមទ្វេភាសា វៀតណាម - ខ្មែរ និងខ្មែរ - វៀតណាមដែលគ្រប់គ្រងដោយក្រសួងអប់រំ និង
បណ្តុះបណ្តាល និងអនុវត្តគម្រោងផ្ទាល់ដោយសាកលវិទ្យាល័យត្រាវិញ។ នេះជាសមិទ្ធផលដ៏សំខាន់មួយ រួមចំណែករឹតបន្តឹងចំណងទំនាក់ទំនងការទូតរវាងវៀតណាម - កម្ពុជា និងបង្ហាញពីស្មារតីទទួលខុសត្រូវរបស់សាកលវិទ្យាល័យត្រាវិញក្នុងការងារអភិរក្ស និងអភិវឌ្ឍតម្លៃវប្បធម៌តាមរយៈការអប់រំ និងស្រាវជ្រាវវិទ្យាសាស្ត្រ។ វចនានុក្រមជាឧបករណ៍ដ៏មានសារៈប្រយោជន៍ដើម្បីជួយជនរួមជាតិខ្មែរក៏ដូចជាប្រជាជនកម្ពុជា ទទួលបានចំណេះដឹងអំពីវាក្យសព្ទ និងយល់ពីភាសាវៀតណាមទាំងសមត្ថភាពនៃការស្តាប់ ការនិយាយ ការអាន និងការសរសេរ។ ទន្ទឹមនឹងនោះ ក៏ជួយអោយប្រជាជនវៀតណាមពង្រឹងសមត្ថភាពប្រើប្រាស់ភាសាវៀតណាម សមត្ថភាពយល់ដឹងអំពីភាសាខ្មែរ អក្សរខ្មែរ រួមចំណែកជួយអោយការអប់រំទ្វេភាសានៅតាមតំបន់ដែលមានជាជនរួមជាតិខ្មែររស់នៅកុះករទទួលបានប្រសិទ្ធភាពល្អ។
លោកស្រី ថាច់ ធីយ៉ឹន សាកលវិទ្យាធិការរងសាកលវិទ្យាល័យត្រាវិញជូនវចនានុក្រម វៀតណាម - ខ្មែរ
ខ្មែរ - វៀតណាមដល់ឯកឧត្តម ពិត ចំណាន រដ្ឋលេខាធិការក្រសួងអប់រំ យុវជន និងកីឡា
ព្រះរាជាណាចក្រកម្ពុជា (ក្នុងដំណើរទស្សកិច្ចនៅកម្ពុជាកាលពី ខែសីហា ឆ្នាំ២០២២)
ទន្ទឹមនឹងនោះ ការបណ្តុះបណ្តាលធនធានមនុស្សប្រកបដោយគុណភាពសម្រាប់តំបន់ជាពិសេសប្រទេសកម្ពុជាតែងតែទទួលបានការយកចិត្តទុកដាក់ជាពិសេស។ ប៉ុន្មានឆ្នាំមកនេះ សាលាតែងតែយកចិត្តទុកដាក់ និងបង្កលក្ខណៈងាយស្រួលសម្រាប់សិស្សានុសិស្សកម្ពុជាក្នុងការបញ្ចប់ការសិក្សារបស់ពួកគេបានយ៉ាងល្អ ទន្ទឹមនឹងការពង្រីកចំណុចខ្លាំងពូកែនៃមហាវិទ្យាល័យភាសា វប្បធម៌ និងវិចិត្រសិល្បៈខ្មែរណាមបូក្នុងកិច្ចការបណ្តុះបណ្តាលនិស្សិតបរទេសក៏ដូចជាការដោះដូរ និងអភិរក្សតម្លៃវប្បធម៌រវាងនិស្សិតវៀតណាមនិងកម្ពុជា។
សាស្រ្តាចារ្យរង បណ្ឌិត Diep Thanh Tungសាកលវិទ្យាធិការរងសាកលវិទ្យាល័យត្រាវិញនិង
គណៈប្រតិភូក្នុងដំណើរទស្សនកិច្ចនិងជួបពិភាក្សាការងារជាមួយមន្ទីរសុខាភិបាល មន្ទីរអប់រំ និងបណ្ដុះបណ្ដាលខេត្តស្វាយរៀង និងនាយកវិទ្យាល័យនានានៅខេត្តស្វាយរៀង
(ក្នុងដំណើរទស្សនកិច្ចនៅកម្ពុជា កាលពី ខែសីហា ឆ្នាំ២០២២)
ជាពិសេស ឆ្នាំ២០២២ ជាឆ្នាំរំលឹកខួបអនុស្សារីយ៍លើកទី៥៥នៃការបង្កើតទំនាក់ទំនងការទូតរវាងកម្ពុជា - វៀតណាម និងអបអរសាទរឆ្នាំមិត្តភាពវៀតណាម - កម្ពុជា ឆ្នាំ២០២២ សាកលវិទ្យាល័យត្រាវិញបានជំរុញទំនាក់ទំនងការទូត បង្កើនចំណងមិត្តភាពរវាងប្រទេសទាំងពីរតាមរយៈសកម្មភាពជាក់លាក់ ដូចជាការចូលរួមក្នុងការតាំងពិព័រណ៍អប់រំវៀតណាមនៅកម្ពុជា ចុះហត្ថលេខាលើអនុស្សារណៈកិច្ចសហប្រតិបត្តិការជាមួយដៃគូ ផ្តល់អាហារូបករណ៍ដល់និស្សិតកម្ពុជាមកសិក្សានៅសាលា និងជំរុញការជ្រើសរើសនិស្សិតនៅតាមបណ្តាខេត្តនានាក្នុងប្រទេសកម្ពុជា។
សាកលវិទ្យាល័យត្រាវិញចូលរួមការតាំងពិព័ណ៍អប់រំវៀតណាមនៅកម្ពុជាកាលពី ខែសីហា ឆ្នាំ២០២២
លោកសាស្រ្តារង បណ្ឌិត Diep Thanh Tungសាកលវិទ្យាធិការរងសាកលវិទ្យាល័យត្រាវិញបានមានប្រសាសន៍ថា “ក្នុងរយៈពេលកន្លងមក សាលាបានចូលរួមយ៉ាងសកម្មក្នុងការបណ្តុះបណ្តាលធនធានមនុស្សសម្រាប់កម្ពុជា។ ឆ្លងតាមរយៈការសហការជាមួយស្ថាប័នអប់រំ និងសុខាភិបាលរួមជាមួយនឹងនិយោជកប្រើប្រាស់ពលករផ្ទាល់ អង្គភាពទាំងនោះបានវាយតម្លៃខ្ពស់ចំពោះគុណភាពរបស់និស្សិតដែលបានទទួលការបណ្តុះបណ្តាលពីសាកលវិទ្យាល័យត្រាវិញ ក៏ដូចជាការសម្របខ្លួនជាមួយនឹងបរិយាកាសការងារនៅក្នុងប្រទេសកម្ពុជាបន្ទាប់ពីបញ្ចប់ការសិក្សា។ តាមរយៈនោះ អាចសន្និដ្ឋានបានថា សាកលវិទ្យាល័យបានផ្តល់នូវធនធានមនុស្សប្រកបដោយគុណភាព រួមចំណែកក្នុងការអភិវឌ្ឍសេដ្ឋកិច្ច សង្គមសម្រាប់មូលដ្ឋាននានាក្នុងប្រទេសកម្ពុជា ហើយទន្ទឹមនឹងនោះបានរួមចំណែកក្នុងការអភិរក្ស និងអភិវឌ្ឍន៍តម្លៃវប្បធម៌ តាមរយៈសកម្មភាពសហប្រតិបត្តិការអប់រំ ដើម្បីនាំមកនូវគុណតម្លៃកាន់តែច្រើនដល់សហគមន៍ បន្តបញ្ជាក់ពីគុណភាពនៃការបណ្តុះបណ្តាល បង្កើតតម្លៃជាច្រើនបន្ថែមទៀតសម្រាប់បុព្វហេតុ "នាំមកនូវឱកាសសិក្សាមានគុណភាពសម្រាប់សហគមន៍"។
អត្ថបទដោយ៖ Dong Lam
ប្រែសម្រួលដោយ៖ Tang Van Thon
