និស្សិតផ្នែកវិស្វកម្មបរិស្ថានដោះដូរនឹងអ្នកឯកទេសផ្នែកបរិស្ថាននៃសាកលវិទ្យាល័យវិទ្យាសាស្ត្រអនុវត្ត Saxion – ហូឡង់
- សេចក្ដីលម្អិត
- ជំពូក៖ ព័ត៌មាន
- ចេញផ្សាយនា 24 តុលា 2022
- ចុចដង៖ 361
(TVU) – នាថ្ងៃទី០៣ខែតុលាឆ្នាំ២០២២ នៅវិទ្យាស្ថានបច្ចេកវិទ្យាបរិស្ថាននៃសាកលវិទ្យាល័យត្រាវិញរួមជាមួយសាកលវិទ្យាល័យវិទ្យាសាស្ត្រអនុវត្ត Saxion (Saxion University of Applied Sciences)នៅ Enschede នៃប្រទេសហូឡង់បានចាត់តាំងកម្មវិធីក្រោមប្រធានបទ «ពិភាក្សានិងសំណេះសំណាលពីឱកាសសិក្សាមុខជំនាញវិស្វកម្មបរិស្ថាន» ដើម្បីជាឱកាសទៅសិក្សា ធ្វើការ និងបញ្ហាអាហារូបករណ៍សម្រាប់និស្សិតរៀនមុខជំនាញវិស្វកម្មបរិស្ថាន ទន្ទឹមនឹងការបង្កើនអនុវត្តគម្រោង «ដោះដូរនិស្សិត» រវាងវិទ្យាស្ថានទាំងពីរ។
ក្នុងកម្មវិធី និស្សិតទាំងអស់បានដោះដូរទំនាក់ទំនងនឹងបណ្ដាសាស្ត្រាចារ្យ និងបណ្ឌិតជំនាញផ្នែកវិស្វកម្មបរិស្ថាននិងបច្ចេកវិទ្យានៃការចម្រោះទឹក។ ផ្នែកខាងសាកលវិទ្យាល័យវិទ្យាសាស្ត្រអនុវត្ត Saxion មានវត្តមាននៃលោកសាស្ត្រាចារ្យ Harry Futselaar។ ចំណែកខាងសាកលវិទ្យាល័យត្រាវិញមានវត្តមានរបស់លោកស្រីបណ្ឌិត Tran Thi Ngoc Bich និងលោកបណ្ឌិត Nguyen Thanh Tuu ដែលជាអនុប្រធានវិទ្យាស្ថានបច្ចេកវិទ្យាបរិស្ថាននៃសាកលវិទ្យាល័យត្រាវិញ។
សាស្ត្រាចារ្យ Harry Futselaar បានសន្និដ្ឋានថា៖ «ទឹកជាធនធានធម្មជាតិមួយដែលមានសារៈសំខាន់យ៉ាងខ្លាំង ដូច្នេះយើងត្រូវមានផែនការជាបន្ទាន់ដើម្បីការពារ និងប្រើប្រាស់ឡើងវិញប្រកបដោយប្រសិទ្ធិភាព»។ លោកបាននិយាយថា តម្រូវការប្រើប្រាស់ និងស្ថានភាពកង្វះទឹកស្អាតទូទាំងពិភពលោកកំពុងប្រឈមនឹងបញ្ហាដែលគួរឱ្យកត់សម្គាល់។ លោកបានបង្ហាញទៀតថា អំពីបច្ចេកវិទ្យាចម្រោះទឹកដែលកំពុងបានអនុវត្តប្រើប្រាស់នៅហូឡង់គឺបច្ចេកវិទ្យាចម្រោះទឹក Nano ហើយបច្ចេកវិទ្យានេះមានអត្ថប្រយោជន៍គឺប្រព័ន្ធចម្រោះទឹកដោយរំងាប់បាក់តេរីដែលបង្កគ្រោះថ្នាក់ ថែមទាំងបំបាត់ពណ៌ និងរសជាតិនៃទឹក ជួយឱ្យទឹកត្រឡប់មកភាពបរិសុទ្ធ គ្មានពណ៌ គ្មានក្លិន។
កន្លងមក សាកលវិទ្យាល័យវិទ្យាសាស្ត្រអនុវត្ត Saxion បានសហការជាមួយសាកលវិទ្យាល័យ Ton Duc Thang ធ្វើការពិសោធដោយជោគជ័យលើសំណាកទឹកក្នុងប្រព័ន្ធទន្លេ Saigonនិងទីក្រុងហូជីមិញ។ នាពេលខាងមុខ បច្ចេកវិទ្យានេះនឹងត្រូវបានអនុវត្តសម្រាប់និស្សិតនៃសាកលវិទ្យាល័យត្រាវិញនឹងទៅសិក្សាផ្ទាល់ដើម្បីចម្រោះទឹកនៅទន្លេ Long Binh ក្នុងខេត្តត្រាវិញ។
យោងតាមសាស្ត្រាចារ្យ Harry Futselaar ផងដែរ៖ សិស្សនិស្សិតគឺជាស្រទាប់បញ្ញាវន្ត ម៉្លោះហើយងាយស្រួលស្រូបយកបច្ចេកវិទ្យាថ្មីៗ មានភាពស្វាហាប់ ហ៊ានសាកល្បង និងហ៊ានធ្វើ។ កិច្ចសហប្រតិបត្តិការជាមួយវិទ្យាស្ថានវិទ្យាសាស្ត្រ និងបច្ចេកវិទ្យាបរិស្ថាន-សាកលវិទ្យាល័យត្រាវិញ ដើម្បីអនុវត្តគម្រោង «ដោះប្តូរនិស្សិត» រវាងវិទ្យាស្ថានទាំងពីរ គឺជាឱកាសមួយសម្រាប់សិស្សានុសិស្សក្នុងការពិសោធជាមួយបច្ចេកវិទ្យាពិតៗ។ល។ ជាក់ស្តែង យើងនឹងនាំនិស្សិតពី ០២ ទៅ ២៥នាក់ រួមទាំងនិស្សិតនៃសាកលវិទ្យាល័យវិទ្យាសាស្ត្រអនុវត្ត Saxion និងនិស្សិតមួយចំនួនមកពីប្រទេសឥណ្ឌូនេស៊ី នឹងមកប្រទេសវៀតណាម ដើម្បីសិក្សា និងស្រាវជ្រាវនៅវិទ្យាស្ថានវិទ្យាសាស្ត្រ និងបច្ចេកវិទ្យាបរិស្ថាននៃសាកលវិទ្យាល័យត្រាវិញ។ ទន្ទឹមនឹងនេះ សាកលវិទ្យាល័យត្រាវិញ នឹងបញ្ជូននិស្សិត នៃមុខជំនាញបរិស្ថានទៅកាន់ប្រទេសហូឡង់ ដើម្បីសិក្សា និងស្រាវជ្រាវនៅសាកលវិទ្យាល័យវិទ្យាសាស្ត្រអនុវត្ត Saxion។ ហើយប្រសិនបើ អ្នកមានជំនាញគ្រប់គ្រាន់ អ្នកអាចអនុវត្តទាំងស្រុងនៅក្នុងក្រុមហ៊ុនមួយចំនួនដែលទាក់ទងនឹងបច្ចេកវិទ្យាចម្រោះទឹកនៅក្នុងប្រទេសហូឡង់តាមបែប CO.OP ដោយសិក្សា និងធ្វើការក្នុងរយៈពេល ៥ខែ។
ក្នុងកម្មវិធីសំណេះសំណាល សិស្សានុសិស្សបានស្ដាប់មិត្ត Tran Minh Nhut ជាអតីតនិស្សិតថ្នាក់បច្ចេកវិទ្យាបរិស្ថានជំនាន់ឆ្នាំ២០១៧ ចែករំលែកបទពិសោធន៍ក្នុងការសិក្សានិងស្រាវជ្រាវរបស់ខ្លួន នៅសាកលវិទ្យាល័យវិទ្យាសាស្ត្រអនុវត្ត Saxion អស់រយៈកាល០៥ខែមកនេះ។ Minh Nhut ជានិស្សិតបានទទួលអាហារូបករណ៍ពេញពីកម្មវិធីErasmus + សម្រាប់និស្សិតដែលមានស្នាដៃក្នុងការស្រាវជ្រាវវិទ្យាសាស្ត្របច្ចេកវិទ្យា។
Minh Nhut បានថ្លែងថា៖ «ក្នុងរយៈពេលពីរសប្តាហ៍ដំបូងនៅប្រទេសហូឡង់ ខ្ញុំមិនដឹងពឹងពាក់នរណានិងមានអារម្មណ៍ប្លែកណាស់ដោយភាពខុសគ្នានៃវប្បធម៌ បរិស្ថាន ជាពិសេសគឺភាសា។ រៀនភាសាអង់គ្លេសពីសៀវភៅ និងភាសាអង់គ្លេសប្រើប្រាស់ជាក់ស្ដែង ខុសគ្នាឆ្ងាយណាស់ មានបច្ចេកសព្ទអង់គ្លេសខ្លះដែលខ្ញុំមិនអាចយល់បាន វាធ្វើឱ្យខ្ញុំពិបាកខ្លាំងណាស់។ យ៉ាងណាក៏ដោយ Minh Nhut បានសង្កត់ធ្ងន់ថា៖ «ទោះបីជាមានការលំបាកយ៉ាងណាក៏ដោយ វានឹងជួយបង្កើតសម្ពាធគ្រប់គ្រាន់សម្រាប់យើងក្នុងការក្រេបយកនិងបំពេញចំណេះដឹង ចេះសម្របខ្លួន ប្រសិនបើអ្នកមានការប្តេជ្ញាចិត្តគ្រប់គ្រាន់ និងបង្វែរវាទៅជាសកម្មភាពជាដើម។ល។ អ្វីដែលអ្នកអាចធ្វើបានដោយខ្លួនឯងគឺ ជំនាញទន់ និងរៀនរស់នៅដោយខ្លួនឯង។ នៅឆ្ងាយពីស្រុកកំណើត អ្នកនឹងត្រូវរៀនពីរបៀបថែរក្សាខ្លួនអ្នក បង្កើតតម្លៃផ្ទាល់ខ្លួនរបស់អ្នកនៅបរទេស។ នេះនឹងជាឱកាសដ៏ល្អមួយសម្រាប់អ្នកក្នុងការលត់ដំ និងកែលម្អខ្លួនឲ្យកាន់តែមានភាពរីកចម្រើនទៅមុខទៀត។ ខ្ញុំបានសាកល្បងវា និងធ្វើបាន អ្នកក៏អាចធ្វើបានដែរ។ Let’s “try and do”!»
យោងតាមសាស្ត្រាចារ្យ Harry Futselaar៖ «រឿងដំបូងដែលអ្នកត្រូវការគឺអាកប្បកិរិយា ដើម្បីទៅសិក្សានៅបរទេស អ្នកត្រូវតែមានការតាំងចិត្តយ៉ាងមុតមាំក្នុងការសិក្សា និងបង្ហាញវាដោយសកម្មភាពជាក់ស្តែងដើម្បីបង្ហាញដល់ពួកយើងដូចជា៖ ឥឡូវនេះ អ្នកត្រូវតែរៀនបន្ថែមនិងកែលម្អភាសាបរទេស ដោយសារវាជាបរិយាកាសទំនាក់ទំនងភាសាអង់គ្លេស ១00% ប្រសិនបើអ្នកមិនពូកែភាសាអង់គ្លេសទេ វានឹងពិបាកសម្រាប់ពួកយើងក្នុងការទំនាក់ទំនង និងគាំទ្រអ្នកក្នុងការស្រាវជ្រាវ និងការអភិវឌ្ឍន៍ វាពិបាកណាស់ក្នុងការស្វែងរកឯកសារ។ល។»
យោងតាមលោកស្រី បណ្ឌិត Tran Thi Ngoc Bich - អនុប្រធាននៃវិទ្យាស្ថានវិទ្យាសាស្ត្រនិងបច្ចេកវិទ្យាបរិស្ថាន នាពេលខាងមុខ អ្នកត្រូវតែភ្ជាប់ទំនាក់ទំនងជាមួយគ្រូបង្រៀនក្នុងវិទ្យាស្ថាន ចូលរួមក្នុងគម្រោងស្រាវជ្រាវរបស់វិទ្យាស្ថាន ដើម្បីសម្របខ្លួនឯងអំពីបរិយាកាសការងារ។ អ្នកត្រូវបង្ហាញនូវសមត្ថភាពរបស់ខ្លួនក្នុងការស្រូបយក និងថាមពលវិជ្ជមាន ដើម្បីលោកគ្រូ អ្នកគ្រូ «ផ្ញើនូវទំនុកចិត្ត» ផ្តល់ឱកាសអភិវឌ្ឍន៍ដល់សិស្សដែលមានសក្តានុពលដែលសក្ដិសមនឹងទទួលបាន។
លោក Nguyen Thanh Tuu - អនុប្រធានវិទ្យាស្ថានវិទ្យាសាស្ត្រនិងបច្ចេកវិទ្យាបរិស្ថានបានឲ្យដឹងថា នាពេលខាងមុខ វិទ្យាស្ថានវិទ្យាសាស្ត្រនិងបច្ចេកវិទ្យាបរិស្ថាន- សាកលវិទ្យាល័យត្រាវិញ នឹងបន្តរៀបចំវគ្គបណ្តុះបណ្តាល «លើកកម្ពស់ការយល់ដឹងរបស់និស្សិតអំពីដំណោះស្រាយថាមពលកកើតឡើងវិញ និងការប្រើប្រាស់ថាមពលប្រកបដោយប្រសិទ្ធភាព ដើម្បីសម្របខ្លួនទៅនឹងការប្រែប្រួលអាកាសធាតុ» អប់រំនិស្សិតឱ្យលើកកម្ពស់ការយល់ដឹងអំពីការការពារបរិស្ថាន ពោលគឺការប្រើប្រាស់ធនធានទឹកប្រកបដោយប្រសិទ្ធភាព និងសមហេតុផល។ ការកែច្នៃទឹកក្នុងស្រុក; កសាងកសិកម្មបៃតង និយាយថាទេចំពោះថ្នាំបង្ការសត្វល្អិត និងថ្នាំសម្លាប់សត្វល្អិត ទាញយកប្រយោជន៍ពីសត្រូវធម្មជាតិ ដើម្បីរក្សាភាពបរិសុទ្ធនៃទឹកក្រោមដី។ល។
អត្ថបទដោយ៖ Chan Thanh Ngan – Phung Hoang Long
ប្រែសម្រួលដោយ៖ Thach Hoang Em
