សាកលវិទ្យាល័យត្រាវិញមានកិច្ចជំនួបពិភាក្សាការងារជាមួយលោកសាស្រ្តាចារ្យ Harry Futselaar, សាកលវិទ្យាល័យវិទ្យាសាស្រ្តអនុវត្ត Saxion, ប្រទេសហូឡង់
- សេចក្ដីលម្អិត
- ជំពូក៖ ព័ត៌មាន
- ចេញផ្សាយនា 25 វិច្ឆិកា 2022
- ចុចដង៖ 234
TVU – សប្តាហ៍កន្លងមកនេះ លោកបណ្ឌិត Nguyen Minh Hoa សាកលវិទ្យាធិការនៃសាកលវិទ្យាល័យត្រាវិញមានកិច្ចជំនួបពិភាក្សាការងារជាមួយលោកសាស្រ្តាចារ្យ Harry Futselaar អ្នកជំនាញផ្នែកបច្ចេកវិទ្យាចម្រោះទឹកស្អាត និងជានាយកនៃកម្មវិធីបច្ចេកវិទ្យាចម្រោះទឹកស្អាតអន្តរជាតិនៃសាកលវិទ្យាល័យវិទ្យាសាស្រ្តអនុវត្ត Saxion ប្រទេសហូឡង់ដែលបានអញ្ជើញមកសាកលវិទ្យាល័យត្រាវិញ។
នេះជាសកម្មភាពមួយក្នុងចំណោមសកម្មភាពក្នុងក្របខ័ណ្ឌនៃកិច្ចសហប្រតិបត្តិការរវាងសាកលវិទ្យាល័យទាំងពីរលើវិស័យបរិស្ថាន បច្ចេកទេសបច្ចេកវិទ្យា សេដ្ឋកិច្ចរង្វង់ និងកសិកម្មស្អាត។ ក្នុងរយៈពេលធ្វើការចំនួន ០៤ថ្ងៃ (ចាប់ពីថ្ងៃទី ១៤ ខែវិច្ឆិកាដល់ថ្ងៃទី ១៨ ខែវិច្ឆិកា) ភាគីទាំងពីរបានពិភាក្សាយ៉ាងសកម្ម និងលើកឡើងនូវផែនការដើម្បីអនុវត្តនៅពេលខាងមុខ ដូចជាបង្កើតនិងណែនាំវិធីដំណើរការប្រព័ន្ធ MEXplorer។ ទន្ទឹមនឹងនេះ ផងដែរក៏មានកិច្ចជំនួបពិភាក្សាការងារជាមួយបណ្តាស្ថាប័ន អង្គភាពដែលពាក់ព័ន្ធនឹងវិស័យបច្ចេកវិទ្យានិងបរិស្ថាន។
លោកបណ្ឌិត Nguyen Minh Hoa សាកលវិទ្យាធិការនៃសាកលវិទ្យាល័យត្រាវិញបានថ្លែងអំណរគុណលោកសាស្រ្តាចារ្យ Harry Futselaar ដែលបានអញ្ជើញមកទស្សនកិច្ចនៅសាកលវិទ្យាល័យត្រាវិញ។ លោកសាកលវិទ្យាធិការក៏មានក្តីរំពឹង ភាគីទាំងពីរនឹងបន្តអនុវត្តបណ្តាខ្លឹមសារនៃកិច្ចសហប្រតិបត្តិការដែលទាក់ទងនឹងវិស័យអប់រំនិងបច្ចេកទេសបរិស្ថាន។
លោកបណ្ឌិត Nguyen Minh Hoa សាកលវិទ្យាធិការនៃសាកលវិទ្យាល័យត្រាវិញជួបពិភាក្សាការងារជាមួយលោកសាស្រ្តាចារ្យ Harry Futselaar សាកលវិទ្យាល័យវិទ្យាសាស្រ្តអនុវត្ត Saxion នៃប្រទេសហូឡង់
នាឱកាសនេះ លោកសាស្រ្តាចារ្យ Harry Futselaar បានជួបពិភាក្សាការងារផ្ទាល់ជាមួយបណ្តាស្ថាប័ន អង្គភាពចំណុះសាកលវិទ្យាល័យត្រាវិញ ក្នុងនោះរួមមាន៖ មជ្ឈមណ្ឌលស្រាវជ្រាវវិទ្យាសាស្រ្ត ផលិតនិងសេវាកម្ម (CSP); ថ្នាក់ដឹកនាំនៃសាលាអនុវត្តគរុកោសល្យ; វិទ្យាស្ថានវិទ្យាសាស្រ្ត បច្ចេកវិទ្យាបរិស្ថាន; ជួបសំណេះសំណាលជាមួយនិស្សិតនៃវិទ្យាស្ថានវិទ្យាសាស្រ្ត បច្ចេកវិទ្យាបរិស្ថាន
អំពីប្រធានបទ “សហគ្រាស សាលា និងឱកាសនៃការសាកល្បងចុះឈ្មោះធ្វើការនៅក្នុងនិងក្រៅប្រទេស”; ពិភាក្សាការងារជាមួយក្រុមហ៊ុនទទួលខុសត្រូវមានកំរិត បច្ចេកវិទ្យាបរិស្ថាន Que Minh (ខេត្តដុងថាប)ដើម្បីឈានទៅកដល់ការចុះហត្ថលេខាលើអនុស្សារណៈនៃកិច្ចសហប្រតិបត្តិការលើវិស័យបច្ចេកទេសបរិស្ថាន។
សាស្រ្តាចារ្យ Harry Futselaar សាកលវិទ្យាល័យវិទ្យាសាស្រ្តអនុវត្ត Saxion នៃប្រទេសហូឡង់ពិភាក្សាការងារជាមួយថ្នាក់ដឹកនាំសាលាគរុកោសល្យអនុវត្ត
ក្នុងកិច្ចជំនួបសំណេះសំណាលជាមួយនិស្សិត លោកសាស្រ្តាចារ្យ Harry Futselaar បានផ្តល់ព័ត៌មាននានា និងផ្តល់ព័ត៌មានអំពីបណ្តាកម្មវិធីបណ្តុះបណ្តាលនៅសាកលវិទ្យាល័យវិទ្យាសាស្រ្តអនុវត្ត Saxion នៃប្រទេស ហូឡង់ និងចែករំលែកអំពីវិធីសាស្រ្តពង្រឹងសមត្ថភាពនិស្សិតជំនាញបច្ចេកទេសបរិស្ថានតាមវិធី “insight (ការយល់ដឹង) – skills (បំណិន) – attitude (អាកប្បកិរិយា)”រួមជាមួយនឹងការអនុវត្តជោគជ័យបណ្តាគម្រោងនានាក្នុងរយៈពេលសិក្សាស្រាវជ្រាវ។
លោក Pham Kim Long ប្រធានវិទ្យាស្ថានវិទ្យាសាស្រ្តបច្ចេកវិទ្យាបរិស្ថានបានមានប្រសាសន៍ថា នេះជាឱកាសដើម្បីស្វែងយល់ ក៏ដូចជាផ្តល់នូវព័ត៌មានដែលមានប្រយោជន៍ដល់និស្សិតជំនាញបច្ចេកទេសបរិស្ថាន និងជំនាញគ្រប់គ្រងធនធាននិងបរិស្ថាន ជួយអោយនិស្សិតមានឱកាសបង្កើតទំនាក់ទំនង និងជួបជាមួយសហគ្រាស នាំមកនូវឱកាសការងារដ៏ល្អក្រោយពេលបញ្ចប់ការសិក្សា។
លោក Luong Nguyen Duy Thong ប្រធានក្រុមហ៊ុនទទួលខុសត្រូវមានកំរិត បច្ចេកវិទ្យាបរិស្ថាន Que Minh (ខេត្តដុងថាប) និងជាសមាជិកគណៈប្រតិបត្តិការសមាគមពាណិជ្ជករវ័យក្មេងវៀតណាមសង្ឍឹមថានិស្សិតសាកលវិទ្យាល័យត្រាវិញនឹងផ្លាស់ប្តូរផ្នត់គំនិត ខិតខំសិក្សាបទពិសោធន៍ដើម្បីអាចសម្របខ្លួននឹងមជ្ឈដ្ឋានការងារ និងចាប់ផ្តើមដំណើរបង្កើតធុរកិច្ចថ្មីក្នុងវិស័យបច្ចេកទេសបរិស្ថានចាប់ពីពេលនេះទៅ។
អត្ថបទដោយ៖ Hanh Nguyen – Minh Nhut
ប្រែសម្រួលដោយ៖ Se Has