បង្កើតសាលាមហាវិទ្យាល័យសេដ្ឋកិច្ច និងនីតិសាស្ត្រចំណុះសាកលវិទ្យាល័យត្រាវិញ
- សេចក្ដីលម្អិត
- ជំពូក៖ ព័ត៌មាន
- ចេញផ្សាយនា 28 វិច្ឆិកា 2022
- ចុចដង៖ 261
ក្នុងពិធីបើកបវេសនកាលឆ្នាំសិក្សាថ្មី២០២២ - ២០២៣ ក្រុមប្រឹក្សាភិបាលនៃសាកលវិទ្យាល័យត្រាវិញបានប្រកាសសេចក្តីសម្រេចរបស់ក្រុមប្រឹក្សាភិបាលសាលាស្តីពីការបង្កើតសាលាមហាវិទ្យាល័យសេដ្ឋកិច្ច និងនីតិសាស្ត្រ។
ចូលរួមជាមួយបរិយាកាសដ៏សប្បាយរីករាយរបស់គ្រូបង្រៀន និងសិស្សានុសិស្សទូទាំងប្រទេស នាថ្ងៃទី ២០ ខែវិច្ឆិកា សាកលវិទ្យាល័យត្រាវិញបានរៀបចំពិធីបើកបវេសនកាលឆ្នាំសិក្សាថ្មី ២០២២ - ២០២៣ និងអនុស្សវរីយ៍លើកទី ៤០ នៃទិវាគ្រូបង្រៀនវៀតណាម (ថ្ងៃទី២០ ខែវិច្ឆិកា ឆ្នាំ១៩៨២ - ថ្ងៃទី ២០ ខែវិច្ឆិកា ឆ្នាំ២០២២)។ ក្នុងបរិយាកាសដ៏ឱឡារិកនៃពិធីបើកបវេសនកាលឆ្នាំសិក្សាថ្មី ២០២២ - ២០២៣ សាកលវិទ្យាល័យត្រាវិញបានប្រកាសសេចក្តីសម្រេចរបស់ក្រុមប្រឹក្សាភិបាលសាលា ស្តីពីការបង្កើតសាលាមហាវិទ្យាល័យសេដ្ឋកិច្ច និងនីតិសាស្រ្ត។
ប្រកាសសេចក្តីសម្រេចស្តីពីការបង្កើតសាលាមហាវិទ្យាល័យសេដ្ឋកិច្ច និងនីតិសាស្ត្រចំណុះសាកលវិទ្យាល័យត្រាវិញរូបថត៖ Minh Đảm.
សាកលវិទ្យាល័យត្រាវិញ បច្ចុប្បន្ននេះមាននិស្សិតជាង ២០.០០០ នាក់មកពីខេត្តផ្សេងៗក្នុងតំបន់វាលរាបទន្លេគឺវឡុង ក៏ដូចជានិស្សិតទូទាំងប្រទេស និងមាននិស្សិតប្រទេសកម្ពុជាមកចូលរួមសិក្សាទៀតផង។ ដោយមានកម្មវិធីបណ្ដុះបណ្ដាលកម្រិតក្រោយបរិញ្ញាបត្រចំនួនជាង៣០ កម្រិតបរិញ្ញាបត្រចំនួនជិត៦០ និងកម្រិតឧត្តមសិក្សាចំនួន៣៣ ព្រមទាំងមានវគ្គបណ្តុះបណ្ដាលរយៈពេលខ្លីឯទៀត។
ក្នុងឆ្នាំសិក្សា ២០២១ - ២០២២ សមូហភាពនៃសាកលវិទ្យាល័យត្រាវិញបានខិតខំប្រឹងប្រែងយ៉ាងខ្លាំង នាពេលដែលសាលាទទួលបានកម្មវិធីបណ្តុះបណ្តាលចំនួន ១៣ដែលត្រូវបានវាយតម្លៃស្របតាមស្តង់ដារគុណភាពអប់រំអន្តរជាតិ។ ជាសាកលវិទ្យាល័យមួយនៅតំបន់វាលរាបទន្លេគឺវឡុង ដោយមានកម្មវិធីបណ្តុះបណ្តាលជាច្រើនដែលសម្រេចបានការទទួលស្គាល់គុណភាពអប់រំ ស្របតាមស្តង់ដារអន្តរជាតិដូចជា AUN-QA, FIBA និង ABET។
ជាច្រើនឆ្នាំបន្តបន្ទាប់គ្នា សាលាបានជាប់ចំណាត់ថ្នាក់១០០ ជាសាលាដែលមានឥទ្ធិពលវិជ្ជមាន និងការរួមចំណែកយ៉ាងសកម្មដល់សង្គម តាមការវាយតម្លៃនៃWURI Ranking ២០២២; ជាប់ចំណាត់ថ្នាក់២០០ ដែលជាសាកលវិទ្យាល័យបៃតង ស្និទ្ធស្នាល និង អភិវឌ្ឍប្រកបដោយចីរភាព និងទទួលបានពានរង្វាន់អង្គភាពដែលមានការបំប្លែងឌីជីថលល្អបំផុតក្នុងឆ្នាំ២០២២ ។
លោកបណ្ឌិត Nguyen Minh Hoa សាកលវិទ្យាធិការនៃសាកលវិទ្យាល័យត្រាវិញបានអបអរសាទរចំពោះនិស្សិតថ្មី ក៏ដូចជាអំពាវនាវដល់សមូហភាពសាលាត្រូវខិតខំបំពេញភារកិច្ចក្នុងឆ្នាំសិក្សាថ្មី។ រូបថត៖ Minh Dam។
លោកបណ្ឌិត Nguyen Minh Hoa អំពាវនាវបុគ្គលិកទាំងអស់ ព្រមទាំងសិស្សនិស្សិតទាំងឡាយ ប្រួតដៃគ្នាឆ្ពោះទៅទិសដៅរួម ដើម្បីអនុវត្តអោយបានជោគជ័យនូវភារកិច្ចចម្បងរបស់សាលាក្នុងឆ្នាំសិក្សាថ្មីរួមមានគឺ៖ ជម្រុញកិច្ចការវាយតម្លៃកម្មវិធីសិក្សាស្របតាមស្តង់ដារអន្តរជាតិ; អនុវត្តអោយបានសម្រេចទម្រង់សាកលវិទ្យាល័យអភិវឌ្ឍ; លើកកម្ពស់ចក្ខុវិស័យសហប្រតិបត្តិការនិងបណ្ដុះបណ្ដាលអន្តរជាតិ; ជម្រុញការស្រាវជ្រាវវិទ្យាសាស្ត្រ តាមទិសដៅអនុវត្តនិងបម្រើបម្រាស់សហគមន៍; បន្តការនិងបង្កើនមុខតំណែងតួនាទីក្នុងចំណាត់ថ្នាក់លើឆាកអន្តរជាតិ។
លោក Le Thanh Binh អនុប្រធានគណៈកម្មាធិការប្រជាជនខេត្តត្រាវិញ បានទទួលស្គាល់ និងស្ងើចសរសើរចំពោះស្នាដៃដ៏មានតម្លៃរបស់សាកលវិទ្យាល័យត្រាវិញ ក្នុងប៉ុន្មានឆ្នាំកន្លងមកនេះ។ តាមលោក Le Thanh Binh នាពេលខាងមុខ សាលាត្រូវយកចិត្តទុកដាក់ចំពោះការធ្វើផែនការ បណ្តុះបណ្តាល បំប៉ន និងជំរុញអភិវឌ្ឍកងជួរអ្នកគ្រប់គ្រង និងកងជួរគ្រូបង្រៀន ដើម្បីឆ្លើយតបនឹងតម្រូវការនៃការបង្រៀន ការស្រាវជ្រាវវិទ្យាសាស្ត្រ និងកិច្ចសហប្រតិបត្តិការអន្តរជាតិ។ បង្កើតឱកាសសម្រាប់លោកគ្រូ អ្នកគ្រូ និងសិស្សនិស្សិត ដើម្បីលើកកម្ពស់សមត្ថភាព និងចំណង់ចំណូលចិត្តរបស់ពួកគេ រួមចំណែកក្នុងការបង្កើនគុណភាពបណ្តុះបណ្តាល។
ក្នុងឱកាសនេះ ប្រធានគណៈកម្មាធិការប្រជាជនខេត្តត្រាវិញ បានប្រគល់ទង់ប្រឡងប្រណាំងដល់សមូហភាពរបស់សាលា “សម្រេចបានលទ្ធផលល្អឆ្នើមក្នុងការចលនាប្រឡងប្រណាំងឆ្នាំ ២០២១”; គណៈកម្មាធិការប្រជាជនខេត្តបានប្រគល់ប័ណ្ណសរសើរ "ទទួលបានពានរង្វាន់បម្លែងឌីជីថលវៀតណាមឆ្នាំ២០២២ លើប្រភេទសហគ្រាស និងអង្គភាពដែលបម្លែងឌី ជី ថលល្អបំផុត" និងប្រគល់ប័ណ្ណសរសើរចំនួន១៤០ ក្នុងនោះសម្រាប់សមូហភាពចំនួន 0២ និងឯកជនចំនួន១៣៨នាក់ "សម្រេចការងារឆ្នើមក្នុង២ឆ្នាំ (ឆ្នាំសិក្សា ២០២០ - ២០២១ និង ២០២១ - ២០២២)"។
ស្ថិតក្នុងបរិយាកាសនៃការទទួលឆ្នាំសិក្សាថ្មី លោកសាស្ត្រាចារ្យ បណ្ឌិត Nguyen Thien Nhan - អតីតសមាជិកអចិន្ត្រៃយ៍គណៈកម្មាធិការបក្ខមជ្ឈិម អតីតលេខាគណៈកម្មាធិការបក្ខទីក្រុងហូជីមិញ បានផ្តល់ជូនអាហារូបករណ៍ចំនួន២៤ចំណែក របស់គ្រួសារលោកសាស្ត្រាចារ្យ Nguyen Thien Thanh ដល់និស្សិតនៃសាកលវិទ្យាល័យត្រាវិញ សរុបជាទឹកប្រាក់ទាំងអស់ ៧២លានដុង។ អមដំណើរជាមួយសាលាក្នុងអំឡុងពេលកន្លងមក អ្នកឧបត្ថម្ភ អ្នកវិទ្យាសាស្ត្រក្នុងនិងក្រៅប្រទេស បានរួមចំណែក និងផ្តល់អាហារូបករណ៍ចំនួន១៦៥ចំណែក សរុបទឹកប្រាក់ជាង ១ ពាន់លានដុងដល់និស្សិតនៃសាលានារាត្រីថ្ងៃទី ១៩ ខែវិច្ឆិកា ឆ្នាំ២០២២។
ប្រភពពត៌មាន៖ https://nongnghiep.vn/thanh-lap-truong-kinh-te-luat-truc-thuoc-truong-dai-hoc-tra-vinh-d337763.html
អត្ថបទដោយ៖ Minh Đam
ប្រែសម្រួលដោយ៖ Diem Phuc