សន្និសីទស្តីពីកម្មសិក្សាគរុកោសល្យសម្រាប់ឆ្នាំសិក្សា ២០២៣ - ២០២៤
- សេចក្ដីលម្អិត
- ជំពូក៖ ព័ត៌មាន
- ចេញផ្សាយនា 26 កុម្ភៈ 2024
- ចុចដង៖ 135
(TVU) - នាថ្ងៃទី២០ ខែកុម្ភៈ ឆ្នាំ២០២៤ មហាវិទ្យាល័យគរុកោសល្យ នៃមហាវិទ្យាល័យភាសា - វប្បធម៌ - វិចិត្រសិល្បៈខ្មែរណាមបូ និងមនុស្សសាស្ត្រ នៃសាកលវិទ្យាល័យត្រាវិញបានសហការជាមួយមន្ទីរអប់រំ និងបណ្តុះបណ្តាលខេត្តត្រាវិញចាត់តាំង "សន្និសីទកម្មសិក្សាគរុកោសល្យ សម្រាប់ឆ្នាំសិក្សា ២០២៣ - ២០២៤” នៅសាកលវិទ្យាល័យត្រាវិញ។
អញ្ជើញចូលរួមសន្និសីទនេះមានលោកស្រី បណ្ឌិត Thach Thi Dan សាកលវិទ្យាធិការរង នៃសាកលវិទ្យាល័យត្រាវិញ លោកស្រី Tang Thi Ngoc Mai អនុប្រធានមន្ទីរអប់រំ និងបណ្តុះបណ្តាលខេត្តត្រាវិញលោក Nguyen Thanh Tuan អនុប្រធានមន្ទីរអប់រំ និងបណ្តុះបណ្តាលខេត្តត្រាវិញ ព្រមទាំងតំណាងគណៈកម្មាធិការដឹកនាំកម្មសិក្សាគរុកោសល្យសម្រាប់ឆ្នាំសិក្សា ២០២៣ - ២០២៤ រួមជាមួយនឹងនិស្សិតចំនួន ៧៨៨រូប ដែលទៅធ្វើកម្មសិក្សាគរុកោសល្យឆ្នាំសិក្សា ២០២៣ - ២០២៤។
ថ្លែងសុន្ទរកថាបើកអង្គសន្និសីទ លោកស្រី បណ្ឌិត Thach Thi Dan សាកលវិទ្យាធិការរងនៃសាកលវិទ្យាល័យត្រាវិញមានប្រសាសន៍ថា៖ គ្រឹះស្ថានបណ្តុះបណ្តាលសាកលវិទ្យាល័យត្រាវិញតែងតែបង្កលក្ខណៈងាយស្រួលសម្រាប់និស្សិតចុះធ្វើកម្មសិក្សាគរុកោសល្យ ដើម្បីសម្រេចបានលទ្ធផលល្អបំផុត នេះជាសម្ពាយសម្រាប់និស្សិតផ្សារភ្ជាប់នឹងវិជ្ជាជីវៈ ការរួមបញ្ចូលរវាងទ្រឹស្តីជាមួយការអនុវត្តជាក់ស្ដែង។ ខ្ញុំសង្ឃឹមថាសន្និសិទនេះនឹងកត់ត្រានូវមតិយោបល់កែលម្អ ដើម្បីដកបទពិសោធន៍ និងដាក់ចេញនូវវិធានការសមស្រប និងអោយមានប្រសិទ្ធភាពថែមទៀតសម្រាប់កម្មសិក្សាគរុកោសល្យលើកក្រោយ។
លោកស្រី Lam Thi Bach Tuyet នាយករងមហាវិទ្យាល័យភាសា - វប្បធម៌ - វិចិត្រសិល្បៈខ្មែរណាមបូ និងមនុស្សសាស្ត្រក៏មានប្រសាសន៍ថា៖ ក្នុងឆ្នាំសិក្សា ២០២៣ - ២០២៤ ចំនួននិស្សិតចុះកម្មសិក្សាគរុកោសល្យ៧៨៨នាក់។ ក្នុងនោះ កម្មសិក្សាគរុកោសល្យលើកទី២ កម្មសិក្សាបញ្ចប់វគ្គសិក្សាជំនាញអប់រំបឋមសិក្សា និងអប់រំកុមារតូចមានចំនួន២០៦នាក់ នៅមូលដ្ឋានធ្វើកម្មសិក្សាគរុកោសល្យចំនួន១០អង្គភាព ហើយទទួលបានលទ្ធផលខ្ពស់គួរសម ដោយមិនមាននិស្សិតណាទទួលបានលទ្ធផលមធ្យម ខ្សោយ។
លោកស្រី Tang Thi Ngoc Mai អនុប្រធានមន្ទីរអប់រំ និងបណ្ដុះបណ្ដាលខេត្តត្រាវិញ មានមតិថា៖ គ្រូឧទ្ទេសនៃមហាវិទ្យាល័យគរុកោសល្យ នៃមហាវិទ្យាភាសា - វប្បធម៌ - វិចិត្រសិល្បៈខ្មែរណាមបូ និងមនុស្សសាស្ត្រ ត្រូវចុះទៅមូលដ្ឋានធ្វើកម្មសិក្សាគរុកោសល្យនីមួយៗ ដើម្បីចូលរួមធ្វើនិទស្សន៍ជាក់ស្តែងក្នុងសកម្មភាពបង្រៀនរបស់គ្រូណែនាំកម្មសិក្សា និងនិស្សិតធ្វើកម្មសិក្សា ដើម្បីផ្តល់មតិកែលម្អទាន់ពេល ដើម្បីលើកកម្ពស់ប្រសិទ្ធភាពការបង្ហាត់បង្រៀន។
ថ្លែងប្រសាសន៍ចង្អុលការអង្គសន្និសីទ លោក Nguyen Thanh Tuan អនុប្រធានមន្ទីរអប់រំ និងបណ្ដុះបណ្ដលាខេត្តត្រាវិញបានបញ្ជាក់ថា៖ ទោះបីការធ្វើកម្មសិក្សាពិតជាកិច្ចការតូចក៏ពិតមែន ប៉ុន្តែមានសារសំខាន់ក្នុងដំណើរការបណ្តុះបណ្តាលនិស្សិត តភ្ជាប់ទ្រឹស្តីជាមួយការអនុវត្តជាក់ស្តែង។ ទន្ទឹមនឹងនោះ លោកបានស្នើឱ្យសមាជិកគណៈកម្មាធិការដឹកនាំសហការអោយបានជិតស្និទ្ធជាមួយមូលដ្ឋានទទួលនិស្សិតធ្វើកម្មសិក្សាគរុកោសល្យ ដើម្បីបញ្ចប់ការធ្វើកម្មសិក្សាគរុកោសល្យប្រកបដោយជោគជ័យ បង្កើតឱ្យមានកិច្ចសហការគ្នាកាន់តែជិតស្និទ្ធរវាងគ្រឹះស្ថានបណ្តុះបណ្តាលជាមួយមូលដ្ឋានទទួលនិស្សិតធ្វើកម្មសិក្សាគរុកោសល្យ។
ក្នុងអង្គសន្និសីទ អ្នកតំណាងបានស្តាប់របាយការណ៍បូកសរុបការធ្វើកម្មសិក្សាគរុកោសល្យវគ្គខែកញ្ញា ឆ្នាំ២០២៣ និងវគ្គខែធ្នូ ឆ្នាំ២០២៣ ដើម្បីវាយតម្លៃលទ្ធផល ទទួលស្គាល់ និងដកបទពិសោធន៍ក្នុងការរៀបចំកម្មវិធីសម្រាប់ឆ្នាំសិក្សាថ្មី ស្តាប់មតិកែលម្អ អនុសាសន៍ មតិយោបល់ពីមូលដ្ឋានដែលទទួលនិស្សិតធ្វើកម្មសិក្សា តាមរយៈនោះ ដើម្បីដាក់ចេញវិធានការអោយបានសមស្រប សម្រាប់កែលម្អកិច្ចការកម្មសិក្សាគរុកោសល្យឱ្យកាន់តែមានប្រសិទ្ធភាពជាង។ តាមរយៈនោះ គណៈកម្មាធិការដឹកនាំបានតម្រែតម្រង់ទិស និងឡើងផែនការធ្វើកម្មសិក្សាសម្រាប់វគ្គខែកុម្ភៈ ឆ្នាំ២០២៤។
អត្ថបទដោយ៖ My An – Ba An
ប្រែសម្រួលដោយ៖ Van Thon