សាកលវិទ្យាល័យចំនួនបួន ទទួលស្គាល់លទ្ធផលប្រឡងវាយតម្លៃច្រកចូលតាមកុំព្យូទ័ររបស់គ្នាទៅវិញទៅមក
- សេចក្ដីលម្អិត
- ជំពូក៖ ព័ត៌មាន
- ចេញផ្សាយនា 29 មីនា 2024
- ចុចដង៖ 151
ប្រភព៖ កាសែត Giáo dục & Thời đại
GD&TĐ - នៅរសៀលថ្ងៃទី២០ ខែមីនា នៅសាកលវិទ្យាល័យក្រុងហូជីមិញ បានប្រព្រឹត្តឡើងពិធីចុះហត្ថលេខាអំពីការទទួលស្គាល់ និងប្រើប្រាស់លទ្ធផលប្រឡងវាយតម្លៃច្រកចូលមហាវិទ្យាល័យតាមកុំព្យូទ័រ (V-SAT)។
ថ្នាក់ដឹកនាំនៃសាកលវិទ្យាល័យទាំងបួន បានចុះហត្ថលេខាទទួលស្គាល់លទ្ធផលប្រឡងវាយតម្លៃសមត្ថភាពច្រកចូលតាមកុំព្យូទ័ររបស់គ្នាទៅវិញទៅមក។
ឆ្លងតាមរយៈនោះ សាកលវិទ្យាល័យចំនួន៤ រួមមាន៖ សាកលវិទ្យាល័យច្បាប់ក្រុងហូជីមិញ សាកលវិទ្យាល័យវ៉ាន់ឡាង សាកលវិទ្យាល័យក្រុងហូជីមិញ និងសាកលវិទ្យាល័យត្រាវិញ នឹងចាត់តាំងការប្រឡង V-SAT ដោយស្វ័យភាពក្នុងការប្រើប្រាស់លទ្ធផលប្រឡងជម្រើសនិស្សិតចូលរៀនមហាវិទ្យាល័យតាមសេចក្តីកំណត់របស់ក្រសួងអប់រំ និងបណ្តុះបណ្តាល។
តាមខ្លឹមសារដែលបានចុះហត្ថលេខា ក្នុងដំណើរពិនិត្យជម្រើស សាកលវិទ្យាល័យទាំង៤នេះ នឹងផ្តល់អាទិភាពទទួលស្គាល់ និងប្រើប្រាស់រួមនូវលទ្ធផលនៃការប្រឡង V-SAT អាស្រ័យអង្គភាពដទៃចាត់តាំងឡើង។
អង្គភាពនានាដែលចូលរួមចុះហត្ថលេខា ក៏មានការទទួលខុសត្រូវក្នុងកិច្ចសហការផ្តល់ព័ត៌មានបេក្ខជន លទ្ធផលប្រឡង និងគាំទ្រពិនិត្យបញ្ជាក់លទ្ធផលប្រឡងរបស់បេក្ខជន ដើម្បីគោលដៅជម្រើសនិស្សិតមហាវិទ្យាល័យតាមសេចក្តីកំណត់របស់ក្រសួងអប់រំ និងបណ្តុះបណ្តាល។ ទន្ទឹមនឹងនោះ ភាគីទាំងឡាយត្រូវទទួលខុសត្រូវក្នុងការរក្សាព័ត៌មានបេក្ខជនជាសម្ងាត់តាមសេចក្តីកំណត់ផងដែរ។
មជ្ឈមណ្ឌលគ្រប់គ្រងការប្រឡងនិងពិន្ទុថ្នាក់ជាតិ និងវាយតម្លៃគុណភាពអប់រំ (ក្រសួងអប់រំនិងបណ្តុះបណ្តាល) គឺជាអង្គភាពដែលទទួលខុសត្រូវក្នុងការផ្តល់កម្រងសំណួរប្រឡង និងកម្មវិធីចាត់តាំងការប្រឡងលើកុំព្យូទ័រ ដើម្បីធានាទិសដៅនៃការប្រឡង; សហការគាំទ្រសាកលវិទ្យាល័យក្នុងការចាត់តាំងការប្រឡង; បង្កើតរបាយការណ៍វិភាគលទ្ធផលប្រឡង និងផ្គត់ផ្គង់ដល់សាកលវិទ្យាល័យ; អនុវត្តនូវភារកិច្ច និងទទួលខុសត្រូវតាមកិច្ចសន្យាដែលបានចុះហត្ថលេខាជាមួយសាកលវិទ្យាល័យក្នុងកិច្ចសហការចាត់តាំងការប្រឡងមួយលើកៗ។
ទិដ្ឋភាពពិធីចុះហត្ថលេខាទទួលស្គាល់លទ្ធផលប្រឡងវាយតម្លៃសមត្ថភាពច្រកចូលតាមកុំព្យូទ័ររបស់សាកលវិទ្យាល័យទាំង៤។
ទន្ទឹមនឹងការទទួលស្គាល់ និងប្រើប្រាស់រួមលទ្ធផលប្រឡង V-SAT អង្គភាពនានានឹងផ្លាស់វេនគ្នាចាត់តាំងប្រជុំប្តូរវេន ដើម្បីបូកសរុប វាយតម្លៃលទ្ធផលអនុស្សរណៈនៃកិច្ចសហប្រតិបត្តិការក្នុងខែធ្នូរៀងរាល់ឆ្នាំ។
មុននោះ ក្នុងរដូវជម្រើសនិស្សិត ឆ្នាំ២០២៣ ពិធីចុះហត្ថលេខាលើកិច្ចសហប្រតិបត្តិការ ទទួលស្គាល់ និងប្រើប្រាស់លទ្ធផលសម័យប្រឡងវាយតម្លៃសមត្ថភាពតាមកុំព្យូទ័រ រវាងសាកលវិទ្យាល័យចំនួន៤ រួមមាន៖ សាកលវិទ្យាល័យធនាគារក្រុងហូជីមិញ សាកលវិទ្យាល័យក្រុងហូជីមិញ សាកលវិទ្យាល័យសៃហ្គន និងសាកលវិទ្យាល័យហិរញ្ញវត្ថុ - Marketing ក៏បានប្រព្រឹត្តឡើងផងដែរ។
នេះអាចចាត់ទុកថា ជាទ្រង់ទ្រាយចាត់តាំងការប្រឡង និងពិនិត្យជម្រើសដ៏ល្អមួយ ដើម្បីកាត់បន្ថយសម្ពាធដល់បេក្ខជន។
ប្រែសម្រួលដោយ៖ So Phune
