និស្សិតផ្នែកច្បាប់ - សាកលវិទ្យាល័យត្រាវិញផ្សព្វផ្សាយច្បាប់ដោយបើកអង្គសវនាការប្រឌិត
- សេចក្ដីលម្អិត
- ជំពូក៖ ព័ត៌មាន
- ចេញផ្សាយនា 25 សីហា 2018
- ចុចដង៖ 398
ថ្ងៃទី ៨ ៩ ១០ ខែសីហា និស្សិតផ្នែកច្បាប់នៃសាកលវិទ្យាល័យត្រាវិញបានរៀបចំឡើងអង្គសវនាការប្រឌិតនៅបណ្តាសាលាវិទ្យាល័យ មជ្ឈមណ្ឌលវប្បធម៌នាបណ្តាខេត្ត កៀង យ៉ាង, កា ម៉ាវ និង បាក លីវ បានទាក់ទាញអ្នកចូលរួមជាច្រើន។
មុខងារនីមួយៗក្នុងអង្គសវនាការនេះតាំងពីចៅក្រម ក្រុមប្រឹក្សាចៅក្រម តំណាងអយ្យការ លេខាធិការនៃសវនាការ មេធាវី ជនជាប់ចោទ ជនរងគ្រោះនិងជនជាសាក្សី គឺសុទ្ធតែជានិស្សិតផ្នែកច្បាប់នៃសាលា។
អង្គសវនាការនីមួយៗបានប្រព្រឹត្តឡើងក្នុងរយៈពេលជាងមួយម៉ោង។ អង្គហេតុនៃអង្គសវនាការបានលើកឡើងគឺយោងតាមឯកសារជាក់ស្តែងដើម្បីកាត់ទោសចំពោះបទល្មើសដោយចេតនាបង្ករបួស សម្តែងឡើងវិញនៃការកាត់ទោសបទល្មើស ដើម្បីឲ្យអ្នកទស្សនាយល់ដឹងអំពីបែបបទរបស់សវនាការ រាល់មូលហេតុ ឧប្បត្តិហេតុបណ្តាលឲ្យមានអំពើបំពានច្បាប់និងប៉ះពាល់ដល់ជីវិត សុខភាព ថវិកានិងងស្មារតីចំពោះអំពើបំពានច្បាប់។
តាមបណ្តាតំបន់ដែលរៀបចំឡើងនូវអង្គសវនាការប្រឌិតនេះបានទាក់ទាញប្រជាជនដែលជាសិស្សានុសិស្ស ប្រកបដោយការយកចិត្តទុកដាក់ចំពោះអង្គហេតុនីមួយៗ។ ទន្ទឹមនឹងនោះ ពួកគេក៏បានស្តាប់អំពីខ្លឹមសារ និងបណ្តាវាក្យខណ្ឌរបស់ច្បាប់ ដែលបានអនុវត្តលើបណ្តាបទល្មើសនីមួយៗ។
អ្នកស្រី ង្វៀន ធី ហាញ់ នៅទីក្រុង កា ម៉ាវ បានអោយដឹងថា៖ “នេះគឺជាលើកដំបូងដែលខ្ញុំមកចូលរួមសវនាការ ទោះបីជាអង្គសវនាការប្រឌិតមែន តែបានលើកឡើងនូវហេតុការណ៍កំពុងនិយមកើតឡើងក្នុងសង្គមបច្ចុប្បន្ន។
ឧបមាដូចសព្វថ្ងៃនេះ អំពីបញ្ហាហិង្សាក្នុងគ្រួសារកំពុងតែកើតឡើងកាន់តែច្រើន ជាពិសេសគឺបញ្ហាដែលប្តីផឹកស្រាមកផ្ទះវាយប្រពន្ធកូន បង្កឲ្យបាត់ភាពសម្រុះសម្រួលក្នុងគ្រួសារ និងប៉ះពាល់ដល់សន្ដិសុខនៅទីនោះ។
គាត់បន្ថែមថា ឆ្លងតាមសវនាការនេះនឹងជួយឲ្យអ្នកទាំងអស់គ្នាមានការយល់ដឹងបន្ថែមអំពីបទបញ្ញត្តិនៃច្បាប់ដើម្បីព្រមាន បង្ការ កាត់បន្ថយករណីកើតឡើងដូចខាងលើ”។
អង្គសវនាការប្រឌិតបានបញ្ចប់នៅសាលាវិទ្យាល័យ អាន បៀន ខេត្តកៀងយ៉ាង ទទួលបានការស្វាគមន៍ពីប្អូនៗសិស្សានុសិស្សដោយស្នូរទះដៃនៅពេលដែលតួអង្គនីមួយៗមានវត្តមានក្នុងសវនាការ។
ប្អូន ង្វៀន ធី អៀងញី សិស្សវិទ្យាល័យ អាង បៀង បានចែករំលែកថា៖ “ខ្ញុំនិងមិត្តភក្តីសប្បាយខ្លាំងណាស់ពេលដែលឮដំណឹងថាសវនាការប្រឌិតនឹងរៀបចំឡើងនៅវិទ្យាល័យខ្ញុំ ព្រោះនេះជាលើកដំបូងដែលប្អូនបានឃើញផ្ទាល់ភ្នែក។ ឆ្លងតាមអង្គសវនាការនេះ ប្អូនយល់ឃើញថាក្នុងជីវិតពេលខ្លះយើងត្រូវចេះទប់អារម្មណ៍ខ្លួនឯង កុំមកតែបញ្ហាបន្តិចបន្តួចបង្កឲ្យមានផលវិបាកយ៉ាងធ្ងន់ធ្ងរ។ ក្នុងនាមជាសិស្សមួយរួប ប្អូនក៏ផ្តាំខ្លួនឯងថាត្រូវតែព្យាយាមសិក្សាឲ្យបានល្អ គោរពច្បាប់និងជាអ្នកផ្សព្វផ្សាយមួយ ដើម្បីរួមចំណែកផ្សព្វផ្សាយច្បាប់ដល់អ្នកទាំងឡាយ។
លោកអនុបណ្ឌិត ផាន មិញ ហ្សើយ អនុប្រធានដេប៉ាតឺម៉ង់ច្បាប់នៃមហាវិទ្យាល័យសេដ្ឋកិច្ច ច្បាប់ចំណុះសាកលវិទ្យាល័យត្រាវិញ បានអោយដឹងថា៖ “សវនាការជាលក្ខណៈពិសេសរបស់និស្សិតផ្នែកច្បាប់នៃសាកលវិទ្យាល័យត្រាវិញ ផ្តល់ឱកាសដល់ពួកគេមានបទពិសោធជាក់ស្តែងនៅតុលាការ។ គម្រោងសវនាការនេះនឹងប្រព្រឹត្តឡើងតាមខេត្តចំនួន១៣ខេត្តក្នុងតំបន់វាលរាបទន្លេគឺវឡុង ប្រព្រឹត្តឡើងដើម្បីលើកកំពស់ការយល់ដឹងអំបីច្បាប់ដល់យុវជននិងប្រជាជន ជាពិសេសគឺសិស្សានុសិស្សនៃបណ្តាសាលាវិទ្យាល័យនិងប្រជាជនក្នុងតំបន់ក្រីក្រដែលគ្មានឱកាសបានចូលរួមអង្គសវនាការ។
គោលបំណងនៃសកម្មភាពនេះគឺដើម្បីរួមចំណែកផ្សព្វផ្សាយច្បាប់ ជួយឲ្យអ្នកទាំងអស់គ្នាយល់ដឹងនិងមានវិធីដោះស្រាយឲ្យបានសមស្រប ត្រឹមត្រូវតាមបទបញ្ញត្តិនៃច្បាប់នៅពេលដែលប្រឈមនឹងជម្លោះទាំងឡាយក្នុងជីវិត។
គម្រោងអង្គសវនាការបន្ទាប់នឹងចាត់តាំងនៅតាមបណ្តាខេត្តផ្សេងៗក្នុងតំបន់វាលរាបទន្លេគឺវឡុង។
ដា វី
