សាកលវិទ្យាល័យទី ៩ ដែលទទួលបានចំណាត់ថ្នាក់ស្តង់ដារគុណភាពថ្មី
- សេចក្ដីលម្អិត
- ជំពូក៖ ព័ត៌មាន
- ចេញផ្សាយនា 22 វិច្ឆិកា 2019
- ចុចដង៖ 717
មជ្ឈមណ្ឌលត្រួតពិនិត្យគុណភាពអប់រំចំណុះសាកលវិទ្យាល័យជាតិទីក្រុងហូជីមិញទើបប្រកាសសេចក្តីសម្រេច និងប្រគល់ប័ណ្ណបញ្ជាក់ទទួលស្គាល់គុណភាពអប់រំឱ្យសាកលវិទ្យាល័យត្រាវិញ។ ដូច្នេះ នេះគឺជាសាកលវិទ្យាល័យទី៩ ទទួលស្គាល់គុណភាពអប់រំតាមកម្រិតស្តង់ដារថ្មីនៃក្រសួងអប់រំនិងបណ្តុះបណ្តាល។
មុននោះ គឺចាប់ពីថ្ងៃទី២៦ ដល់ថ្ងៃទី៣១ ខែកក្កដា ឆ្នាំ២០១៩ សាកលវិទ្យាល័យត្រាវិញបានទទួលការវាយតម្លៃគុណភាពអប់រំតាមស្តង់ដារថ្មីនៃសារាចរលេខ 12/2017/TT-BGDĐT នៃក្រសួងអប់រំនិងបណ្តុះបណ្តាលដោយមជ្ឈមណ្ឌលត្រួតពិនិត្យគុណភាពនៃសាកលវិទ្យាល័យជាតិទីក្រុងហូជីមិញ។
ដើម្បីត្រៀមលក្ខណៈសម្រាប់ការវាយតម្លៃនោះ តាំងពីខែមិថុនា ឆ្នាំ២៩១៨ សាកលវិទ្យាល័យត្រាវិញបានបង្កើតក្រុមឯកទេសទទួលបន្ទុកអនុវត្តនូវកិច្ចការនេះ និងរៀបចំឯកសារ មានសកម្មភាពវាយតម្លៃទូទៅផ្ទៃក្នុងទៅតាមក្របខ័ណ្ឌស្តង់ដារថ្មី រួមមានវិស័យសំខាន់ៗ៤ សំណុំស្តង់ដារ ២៥ និងលក្ខណៈវិនិច្ឆ័យ ១១១ ចំណុច។
គណៈកម្មការវាយតម្លៃខាងក្រៅ គឺមជ្ឈមណ្ឌលត្រួតពិនិត្យគុណភាពអប់រំនៃសាកលវិទ្យាល័យជាតិទីក្រុងហូជីមិញបានចូលមកធ្វើការវាយតម្លៃទៅតាមកម្រិតស្តង់ដារថ្មីលើចំណុចទាំង៤ រួមមាន៖ ធានាគុណភាពអំពីយុទ្ធសាស្ត្រ ធានាគុណភាពអំពីប្រព័ន្ធ ធានាគុណភាពអំពីអនុវត្តតួនាទី(បណ្តុះបណ្តាល ស្រាវជ្រាវវិទ្យាសាស្ត្រ បម្រើសហគមន៍) និងលទ្ធផលអនុវត្ត។
គណៈកម្មការវាយតម្លៃបានធ្វើការសម្ភាសចំពោះក្រុមអ្នកជំនាញដែលពាក់ព័ន្ធនៅក្នុងនិងក្រៅសាលាចំនួន១០ ក្រុម រួមមានថ្នាក់ដឹកនាំសាលា ក្រុមប្រឹក្សាភិបាល ក្រុមគ្រប់គ្រងផ្នែករដ្ឋបាល សហជីព បុគ្គលិក សាស្ត្រាចារ្យ និស្សិត សិក្ខាកម្ម អតីតនិស្សិត និយោជក។ ទន្ទឹមគ្នានោះដែរ គឺធ្វើការសង្កេតមើលវាយតម្លៃសកម្មភាពបង្រៀននិងរៀន សកម្មភាពក្រៅម៉ោង ត្រួតមើលបណ្ណាល័យ បន្ទប់ពិសោធន៍ អនុវត្តដ្ឋាន និងស្តង់ដារសម្ភារឧបទេសសម្រាប់ការបណ្តុះបណ្តាល ការស្រាវជ្រាវវិទ្យាសាស្ត្រ សិល្បៈនិងវប្បធម៌ ទីលត់ដំកាយសម្បទា។ល។
លទ្ធផលវាយតម្លៃ គឺសាលាទទួលបានពិន្ទុចំពោះវិស័យទាំង៤ នៅក្នុងចំណាត់ថ្នាក់មធ្យមចាប់ពីកម្រិត ៤.០/៧.០ ពិន្ទុឡើងទៅ។ ពិស្តារគឺវិស័យធានាគុណភាពអំពីយុទ្ធសាស្ត្រ ៤.១ពិន្ទុ អំពីប្រព័ន្ធ៤.១៧ពិន្ទុ អំពីការអនុវត្តតួនាទី ៤.១៥ពិន្ទុ និងលទ្ធផលអនុវត្ត ៤.០ពិន្ទុ។
សាស្ត្រាចារ្យ បណ្ឌិត ឡេ ង៉ុក គ្វីញ ឡាម នាយិការងនៃមជ្ឈមណ្ឌលត្រួតពិនិត្យគុណភាពអប់រំចំណុះសាកលវិទ្យាល័យជាតិទីក្រុងហូជីមិញ វាយតម្លៃខ្ពស់នៃការខិតខំប្រឹងប្រែងរបស់សាកលវិទ្យាល័យត្រាវិញក្នុងកិច្ចការរៀបចំឯកសារ និងសកម្មភាពវាយតម្លៃ ក្នុងស្មារតីសហការដើម្បីធ្វើការងារនេះក្នុងរយៈពេលកន្លងមក។ ប្រការនេះចង់សរបញ្ជាក់ថា សាកលវិទ្យាល័យត្រាវិញប្តេជ្ញាចិត្តនិងតម្លាភាពគុណភាពចំពោះភាគីដែលពាក់ព័ន្ធបង្កើតឱ្យមានទំនុកចិត្តសម្រាប់អ្នកសិក្សានិងនិយោជក។
សាស្ត្រាចារ្យបណ្ឌិត ផាម ទៀត ខាញ់ សាកលវិទ្យាធិការនៃសាកលវិទ្យាល័យត្រាវិញថ្លែងឱ្យដឹងថា៖ សាកលវិទ្យាល័យត្រាវិញតែងតែខិតខំជំរុញអភិវឌ្ឍនូវគុណភាពបណ្តុះបណ្តាលជាប្រចាំ ឈានទៅសមាហរណកម្មបន្តិចម្តងៗ ក្នុងសកម្មភាពបណ្តុះបណ្តាលនិងសា្រវជ្រាវ។ ជាក់ស្តែងគឺសាកលវិទ្យាល័យបានអនុវត្តស្តង់ដារនិងទទួលស្គាល់គុណភាពតាមសារាចរលេខ 12/2017/TT-BGDĐT ចុះថ្ងៃទី ១៩ ខែឧសភា ឆ្នាំ២០១៧ របស់ក្រសួងអប់រំនិងបណ្តុះបណ្តាល។
ទន្ទឹមនឹងនោះ សាកលវិទ្យាល័យត្រាវិញបាននិងកំពុងធ្វើបមាណីយកម្មនៃកម្មវិធីសិក្សាតាមគុណភាពបណ្តុះបណ្តាលខ្នាតអន្តរជាតិ។ បច្ចុប្បន្ន សាកលវិទ្យាល័យត្រាវិញមានកម្មវិធី៦ទទួលស្គាល់គុណភាពអន្តរជាតិ។ ខែឧសភា ឆ្នាំ២០១៩ អង្គការ FIBAA(Foundation for International Business Administration Accreditation) ទទួលស្គាល់គុណភាពកម្មវិធីបណ្តុះបណ្តាល ៤ រួមមាន៖ ឯកទេសគណនេយ្យ គ្រប់គ្រងពាណិជ្ជកម្ម សេដ្ឋកិច្ច ហិរញ្ញវត្ថុនិងធនាគារ តាមកម្រិតស្តង់ដារអឺរ៉ុប។ ខែតុលា ឆ្នាំ២០១៩ កន្លងទៅថ្មីៗនេះ មានកម្មវិធីសិក្សា២ ទៀតគឺឯកទេសវារីវប្បកម្ម និងបសុពេទ្យក៏បានទទួលស្គាល់គុណភាពតាមស្តង់ដារអន្តរជាតិនៃស្តង់ដារ AUN-QA (Asean University Network-Quality Assurance)ផងដែរ។ នៅពេលខាងមុខទៀត សាកលវិទ្យាល័យត្រាវិញបន្តអនុវត្តទទួលស្គាល់ស្តង់ដា ABET សម្រាប់ក្រុមឯកទេសនៃបច្ចេកទេស បច្ចេកវិទ្យា និងបណ្តាកម្មវិធីដែលនៅសេសសល់មក។»
TVU ជាសាកលវិទ្យាល័យឈានមុខគេនៅក្នុងប្រទេសដែលចុះហត្ថលេខាលើសេចក្តីប្រកាស Talloires (ឆ្នាំ ២០១៣) ដោយប្តេជ្ញាកសាងសាកលវិទ្យាល័យបៃតងពេញលេញ។ ក្នុងឆ្នាំ ២០១៨ បានអង្គការ UI GreenMetric World University Rankings វាយតម្លៃនិងបានជាប់ចំណាត់ថ្នាក់ទី ២៥៦ ក្នុងចំណោមសាកលវិទ្យាល័យកំពូល ៣០០ នៅលើពិភពលោកដែលមានការអភិវឌ្ឍប្រកបដោយនិរន្តរភាពនិងមិនប៉ះពាល់ដល់បរិស្ថាន និងក៏ជាសាកលវិទ្យាល័យមួយក្នុងចំណោមសាកលវិទ្យាល័យចំនួន ២ នៅប្រទេសវៀតណាមដែលបានបញ្ចូលចំណាត់ថ្នាក់នេះ។ យោងតាមចំណាត់ថ្នាក់ Webometrics ឆ្នាំ ២០១៧ សាកលវិទ្យាល័យត្រាវិញជាប់ចំណាត់ថ្នាក់ទី ២ នៅតំបន់វាលរាបទន្លេគឺវឡុង និងទី១៤ នៅប្រទេសវៀតណាម។
TVU ក៏បានអនុវត្តប្រព័ន្ធគ្រប់គ្រងគុណភាពប្រកបដោយប្រសិទ្ធភាពដើម្បីឆ្លើយតបនឹងស្តង់ដារ ISO ៩០០១-២០០០ តាំងពីឆ្នាំ ២០០៦ រហូតមក ក៏បានឆ្លងកាត់ដំណាក់កាលវាយតម្លៃនៃISO ៩០០១-២០០៨, ISO ៩០០១-២០១៥ ។ បច្ចុប្បន្ននេះសាកលវិទ្យាល័យគឺជាសមាជិកនៃCDIO - អង្គការដែលលើកកម្ពស់ក្របខ័ណ្ឌអប់រំដើម្បីលើកកម្ពស់គុណភាពនៃការបណ្តុះបណ្តាលនៅក្នុងសាកលវិទ្យាល័យផ្នែកបច្ចេកទេសទូទាំងពិភពលោក។ លើសពីនេះទៅទៀត TVU ក៏ជាសមាជិកទី ១៥១ ដែលជាសមាជិកអន្តរជាតិតែមួយគត់នៃសមាគមមហាវិទ្យាល័យសហគមន៍កាណាដា (ACCC) ដែលបច្ចុប្បន្នគេហៅថាសមាគមនៃបណ្តាសាកលវិទ្យាល័យ និងមហាវិទ្យាល័យកាណាដា (CICan) ។
