បង្កើតសមាគមកសិករនិស្សិតដំបូងគេនៅសាកលវិទ្យាល័យត្រាវិញ
- សេចក្ដីលម្អិត
- ជំពូក៖ ព័ត៌មាន
- ចេញផ្សាយនា 17 សីហា 2020
- ចុចដង៖ 494
នាព្រឹកថ្ងៃទី ៣១ ខែកក្កដាឆ្នាំ ២០២០ នៅសាកលវិទ្យាល័យត្រាវិញ សមាគមកសិករវៀតណាមទទួលស្គាល់និងប្រគល់សេចក្តីសម្រេចបង្កើតសមាគមកសិករនិស្សិតសាកលវិទ្យាល័យត្រាវិញ។ អញ្ជើញចូលរួមមានលោកបណ្ឌិត ថាវ ស្វឹង ស៊ុង ប្រធានសមាគមកសិករវៀតណាម ព្រមទាំងថ្នាក់ដឹកនាំខេត្តត្រាវិញ និងសមាគមកសិករខេត្តត្រាវិញ។
នេះជាសមាគមកសិករនិស្សិតដំបូងគេបានបង្កើតឡើងនៅគ្រឹះស្ថានបណ្តុះបណ្តាល ហើយសមាជិកគឺជានិស្សិតនិងសាស្ត្រាចារ្យនៅសាកលវិទ្យាល័យត្រាវិញ។
លោកបណ្ឌិត ថាវ ស្វឹង ស៊ុង ថ្លែងក្នុងអង្គប្រជុំថា៖ ខ្ញុំមានសោមនស្សក្រៃលែងដែលគំរូសមាគមកសិករនិស្សិតបានបង្កើតនៅសាកលវិទ្យាល័យត្រាវិញ។ នេះជាគំរូថ្មី ទាក់ទាញនិស្សិត បញ្ញវន្តវ័យក្មេង ចូលរួមកសាងមាតុភូមិ ក្លាយជាធនធាន «កសិករបញ្ញវន្ត» សម័យបច្ចេកវិទ្យា ៤.០។
លោកសាស្ត្រាចារ្យបណ្ឌិត ផាម ទៀត ខាញ់ សាកលវិទ្យាធិការនៃសាកលវិទ្យាល័យត្រាវិញ មានប្រសាសន៍៖ គឺធ្វើយ៉ាងណាដើម្បីកម្លាំងយុវជន ជាពិសេសគឺនិស្សិតបញ្ចប់ការសិក្សាវិលត្រលប់មកជនបទ សិក្សានិងអនុវត្តចំណេះបច្ចេកវិទ្យាថ្មីលើកកម្ពស់លទ្ធភាពផលិត និងតម្លៃផលិតផលកសិកម្មក្នុងគោលដៅលើកកម្ពស់ជីវភាពកសិករ។ នេះប្រហែលជាកង្វល់របស់បក្ស និងរដ្ឋាភិបាលដែលទទួលខុសត្រូវចំពោះសង្គម។
គំនិតបង្កើតសមាគមកសិករក្នុងចំណោមនិស្សិតសាកលវិទ្យាល័យគឺជាគំនិតផ្តួចផ្តើមដ៏ប្រសើរមួយរបស់សមាគមកសិករវៀតណាម និងមាគមកសិករខេត្តត្រាវិញ ដើម្បីមួយជំហានៗយកកម្លាំងបញ្ញវន្តវ័យក្មេងចូលរួមកសាងមាតុភូមិ។
នាឱកាសនេះ សមាគមកសិករវៀតណាមបានបញ្ចូលសមាជិកថ្មីដែលជានិស្សិតសិក្សាមុខជំនាញកសិកម្មនិងមុខជំនាញចិញ្ចឹមសត្វចំនួន ៣៩នាក់ និងសាស្ត្រាចារ្យចំនួន ៥នាក់។
