សិក្ខាសាលាស្តីពី៖ សិល្បៈនាដសាស្ត្រយូរកេរ្តិ៍-១០០ឆ្នាំកកើតនិងអភិវឌ្ឍ
- សេចក្ដីលម្អិត
- ជំពូក៖ ព័ត៌មាន
- ចេញផ្សាយនា 26 តុលា 2020
- ចុចដង៖ 536
នាព្រឹកថ្ងៃទី ២៥ ខែតុលានេះ មន្ទីរវប្បធម៌ កីឡានិងទេសចរណ៍ខេត្តត្រាវិញបានសហការជាមួយសាកលវិទ្យាល័យត្រាវិញរៀបចំសិក្ខាសាលាស្តីអំពី«សិល្បៈនាដសាស្ត្រយូរកេរ្តិ៍ - ១០០ ឆ្នាំកកើតនិងអភិវឌ្ឍ»។ សិក្ខាសាលានេះ ប្រព្រឹត្តិឡើងនៅសាកលវិទ្យាល័យត្រាវិញ និងបានទាក់ទាញស្ថាប័នគ្រប់គ្រង អ្នកជំនាញ អ្នកស្រាវជ្រាវ សិល្បករ សិល្បការនីចំនួនជាង ២០០នាក់ នៅបណ្តាខេត្តភូមិភាគខាងត្បូងនៃប្រទេសវៀតណាមអញ្ជើញចូលរួម។
សិក្ខាសាលាផ្តោតសំខាន់លើការពិគ្រោះយោបល់និងផ្តល់អនុសាសន៍ផ្សេងៗ រវាងអ្នកសិក្សាស្រាវជ្រាវ សិល្បករ សិល្បការនី និងអ្នកគ្រប់គ្រង ដើម្បីធ្វើឱ្យលេចធ្លោឡើងនូវទម្រង់សិល្បៈនាដសាស្ត្រយូរកេរ្តិ៍ (ល្ខោនបាសាក់) ដែលបានកកើតនិងអភិវឌ្ឍអស់រយៈពេល ១០០ឆ្នាំ។
ថ្លែងសុន្ទរកថាបើកនៃអង្គសិក្ខាសាលា លោក យឿង ហ្វាងស៊ុំ សមាជិកគណៈកម្មាធិការបក្សខេត្ត នាយកនៃមន្ទីរវប្បធម៌កីឡានិងទេសចរណ៍ខេត្តត្រាវិញបានគូសបញ្ជាក់ថា៖ សិល្បៈនាដសាស្ត្រយូរកេរ្តិ៍ជាទម្រង់សិល្បៈមួយដ៏ពិសេសដែលកើតឡើងពីស្នាដៃរបស់ជនរួមជាតិខ្មែរនៅតំបន់វាលរាបទន្លេគឺវឡុង និងបានរួមចំណែកយ៉ាងសកម្មនិងសំខាន់ក្នុងជីវភាពរស់នៅ និងបានជំនួយដល់ស្មារតី កម្លាំងចិត្តដល់ប្រជាជន ជំនះរាល់ការលំបាកក្នុងជីវិត។
មានរបាយការណ៍ជូនអង្គសិក្ខាសាលា លោកបណ្ឌិត ផាម ទៀតខាញ់ សាកលវិទ្យាធិការនៃសាកលវិទ្យាល័យត្រាវិញនិងជាប្រធាននៃគណៈកម្មាធិការរៀបចំសិក្ខាសាលាថ្លែងថា៖ សមិទ្ធផលនៃសិល្បៈនាដសាស្ត្រយូរកេរ្តិ៍ បានបង្កើតនូវកម្លាំងចលករ ជំរុញឱ្យក្រុមសិល្បៈ សិល្បករ សិល្បការនី ប្រជាជនខ្មែរស្រឡាញ់ចូលចិត្ត និងបន្តស្ថាបនា លើកកម្ពស់ រួមចំណែកក្នុងការសម្តែង អភិរក្សនូវទម្រង់សិល្បៈនេះឱ្យកាន់តែប្រសើរនិងបោះសាយសំឡេងជាងមុន។
អង្គសិក្ខាសាលាទទួលបានអត្ថបទស្រាវជ្រាវចំនួន ៤០ និងជ្រើសចេញនូវអត្ថបទចំនួន ៦ ដើម្បីធ្វើបទបង្ហាញចែកជូនទស្សនិកជននិងអង្គសិក្ខាសាលាទាំងមូល។ នៅក្នុងក្របខ័ណ្ឌនៃកម្មវិធីនេះ អ្នកចូលរួមក៏បានទស្សនានូវឈុតសម្តែងខ្លីអំពីសិល្បៈនាដសាស្ត្រយូរកេរ្តិ៍ និងការប្រគំតន្ត្រី របាំ ចំរៀងប្រជាប្រិយ ពោពេញដោយភាពប៉ិនប្រសប់របស់សិល្បករ សិល្បការនី គួរជាទីមោទកៈ។
បច្ចុប្បន្ន សិល្បៈនាដសាស្ត្រយូរកេរ្តិ៍ នៃជនរួមជាតិខ្មែរណាមបូត្រូវបានទទួលស្គាល់ដោយរដ្ឋមន្រ្តីក្រសួងវប្បធម៌កីឡានិងទេសចរណ៍ថាជាបេតិកភណ្ឌវប្បធម៌អរូបីថ្នាក់ជាតិ ដែលជាទម្រង់សិល្បៈនាដប្រជាប្រិយ (យោងតាមសេចក្តីសម្រេច លេខ 2684/QĐ-BVHTTDL ចុះថ្ងៃទី ២៥ ខែសីហាឆ្នាំ ២០១៤ របស់រដ្ឋមន្ត្រីក្រសួងវប្បធម៌កីឡានិងទេសចរណ៍) និងទទួលបានមេដាយមាសនៅមហោស្រពសិល្បៈនាដអាជីពនៅឃ្វីញ៉ឺន (ប៊ិញឌីញ)។ សិល្បៈនាដសាស្ត្រយូរកេរ្តិ៍ ថែមទាំងបានទទួលស្គាល់ថាជា «ទម្រង់សិល្បៈនាដសាស្ត្រជនជាតិក្នុងប្រព័ន្ធនាដសាស្ត្រប្រពៃណីរបស់វៀតណាម»ផងដែរ។
