បេក្ខនារីដែលកំព្រាឪពុកមានសុបិនចង់ក្លាយជាគ្រូបង្រៀន
- សេចក្ដីលម្អិត
- ជំពូក៖ ព័ត៌មាន
- ចេញផ្សាយនា 24 ធ្នូ 2020
- ចុចដង៖ 494
ប្អូន ង្វៀន ខាញ់បៅ ទ្វីវី ជានិស្សិតឆ្នាំទី ១ កំពុងសិក្សាមុខជំនាញគរុកោសល្យអក្សរសាស្ត្រនៃសាកលវិទ្យាល័យត្រាវិញ។ ប្អូនមានសុបិនចង់ក្លាយជាគ្រូបង្រៀនដើម្បីចម្លងភាពកក់ក្តៅមនោរម្មណ៍និងបំផុសគំនិតទៅដល់សិស្សានុសិស្សជំនាន់ក្រោយ។ នៅឆ្នាំនេះ ង្វៀន ខាញ់បៅ ទ្វីវី មានអាយុ ១៩ ឆ្នាំ (នៅឃុំឡុងហាវ ស្រុកកូវង៉ាង ខេត្តត្រាវិញ) បានប្រឡងជាប់ចូលរៀនផ្នែកអក្សរសាស្ត្រនៅសាកលវិទ្យាល័យត្រាវិញដោយទទួលបានពិន្ទុ ២៧.២៥ ហើយក្លាយជាបេក្ខជនមានពិន្ទុខ្ពស់ជាងគេនៅរដូវជំរើសនិស្សិតឆ្នាំ២០២០។
ប្អូន ទ្វីវី កំព្រាឪពុកតាំងពីនាងរៀនថ្នាក់ទី ១០ ហើយចាប់តាំងពីពេលនោះមក នាងរស់នៅដោយក្តីស្រឡាញ់ពីម្តាយនិងសាច់ញាតិរបស់នាង។ ម្តាយនិងកូនរស់នៅក្រោមដំបូលផ្ទះលំដាប់ទី៤ និងពឹងផ្អែកតែចំណូលពីហាងលក់គ្រឿងទេសតូចមួយនៅជនបទ។ «ឪពុកបានស្លាប់ទៅ ខ្ញុំពិតជាធ្លាក់ទឹកចិត្តខ្លាំងណាស់ ប៉ុន្តែម្តាយរបស់ខ្ញុំបានផ្តល់កម្លាំងចិត្តនិងក្តីស្រឡាញ់ យកចិត្តទុកដាក់ចំពោះខ្ញុំគ្រប់យ៉ាង។ ទោះយ៉ាងណាក៏ដោយខ្ញុំមិនធ្វេសប្រហែសទេ។ ខ្ញុំសន្យាថានឹងខិតខំរៀនសូត្រឱ្យបានល្អដើម្បីមោទនភាពចំពោះឪពុកហើយមិនឱ្យម្តាយខកចិត្តចំពោះខ្ញុំឡើយ។» ទ្វីវីក្ដុកក្ដួលប្រាប់ឱ្យដឹងដូច្នោះ។
ដោយមានស្រុកកំណើតនៅកោះដាច់ស្រយាល ដូច្នេះការធ្វើដំណើរពិបាកណាស់ ដំណើរឡើងចុះទៅដីគោកត្រូវឆ្លងកាត់សាឡាង។ ដូច្នេះការសិក្សារៀនសូត្រជួបការលំបាកជាច្រើន ពិសេសការស្វែងរកសិក្ខាឧបទេស សំភារៈសំរាប់ការស្រាវជ្រាវមិនងាយស្រួលទេ។ ទោះយ៉ាងណាក្នុងរយៈពេល ៣ ឆ្នាំនៃវិទ្យាល័យ ទ្វីវីតែងតែទទួលបានងារជាសិស្សពូកែហើយជាប់ចំណាត់ថ្នាក់លេខ១ ក្នុងថ្នាក់។ មិនត្រឹមតែប៉ុណ្ណឹងទេ ពេលដាក់ពាក្យចូលរៀនមុខជំនាញគរុកោសល្យនៃសាកលវិទ្យាល័យត្រាវិញនាងទទួលបានពិន្ទុ ២៧,២៥ ហើយក្លាយជាបេក្ខសិស្សឆ្នើមជាងគេរបស់សាលា។ លើសពីនេះទៀតទ្វីវីក៏មានកិត្តិយសផងដែរដែលបានទទួលអាហារូបករណ៍ «បំភ្លឺក្តីសុបិន» ដែលផ្តល់ជូនដោយកាសែតទៀនផុងដែលមានទឹកប្រាក់ ១០ លានដុង។ «ពេលលឺដំណឹងទទួលបានអាហារូបករណ៍ខ្ញុំរីករាយខ្លាំងណាស់ហើយប្រាប់ទៅម្តាយជាទីស្រឡាញ់ ព្រោះថាតាំងពីតូចមកខ្ញុំពុំដែលទទួលបានទឹកប្រាក់ធំយ៉ាងនេះ លើសពីនោះទៅទៀតខ្ញុំនៅមានឱកាសជួបសំណេះសំណាលជាមួយមិត្តភក្តិដែលមានពិន្ទុខ្ពស់ដូចគ្នាមកពីតំបន់នានាផងដែរ»។ ទ្វីវីប្រាប់ឱ្យដឹងដូច្នោះ។
តាមមតិរបស់ទ្វីវី សិស្សនិស្សិតនៅមានអារម្មណ៍ខ្លាចរអាអំពីមុខវិជ្ជាអក្សរសាស្ត្រ ពួកគេភាគច្រើនមិនចាប់អារម្មណ៍ទេ។ ទោះយ៉ាងណាក្តីចំពោះទ្វីវី(ជំនាន់ ១០x) តាំងពីតូច នាងបានចាប់អារម្មណ៍លើមុខវិជ្ជាអក្សរសិល្ប៍ព្រោះវាជួយបណ្តុះបណ្តាលបុគ្គលិកលក្ខណៈរបស់នាងជាមនុស្សរស់នៅដោយក្តីស្រឡាញ់និងការឱ្យអភ័យ អនុគ្រោះរវាងគ្នានឹងគ្នា។ ទន្ទឹមនឹងនោះអារម្មណ៍និងការយល់ដឹងពីជោគវាសនា អកុសលក្នុងជីវិត... ហេតុដូច្នេះ ក្តីសុបិនចង់ក្លាយជាគ្រូបង្រៀនរបស់ទ្វីវីកាន់តែផុសផុរ លើសពីនោះទៅទៀត ទ្វីវីក៏បានបង្ហើបពីមូលហេតុដែលនាងប្រាថ្នាចង់ក្លាយជាគ្រូបង្រៀនគឺ «រូបភាពរបស់គ្រូស្អាតណាស់ពេលពាក់អាវវែងប្រពៃណីវៀតណាមនៅពេលកំពុងឈរបង្ហាត់បង្រៀនចម្លងភាពកក់ក្តៅមនោរម្មណ៍ដល់សិស្សានុសិស្សជំនាន់ក្រោយ។»