សាកលវិទ្យាល័យត្រាវិញយកចិត្តទុកដាក់បណ្ដុះបណ្ដាលស្របតាមនិន្នាការអភិវឌ្ឍតំបន់
- សេចក្ដីលម្អិត
- ជំពូក៖ ព័ត៌មាន
- ចេញផ្សាយនា 29 មេសា 2022
- ចុចដង៖ 343
VTV.vn – បណ្តាសាកលវិទ្យាល័យនៅវៀតណាមកំពុងបង្កើនការយកចិត្តទុកដាក់លើការផ្លាស់ប្តូរទិសដៅបណ្ដុះបណ្ដាល និងសកម្មភាពនានាទាក់ទងនឹងជំនាញទន់។
ដើម្បីឆ្លើយតបនឹងតម្រូវការបណ្តុះបណ្តាលធនធានមនុស្សប្រកបដោយគុណភាពសម្រាប់ការអភិវឌ្ឍន៍តំបន់វាលរាបទន្លេគឺវឡុង និងប្រទេសទាំងមូល សាកលវិទ្យាល័យទាំងឡាយបានផ្តោតការវិនិយោគទៅលើមុខជំនាញជាច្រើនតាមទិសដៅនៃការធ្វើពិពិធកម្ម ផ្សារភ្ជាប់បណ្តាញសហគមន៍ធុរកិច្ច និងតម្រូវការធនធានមនុស្សប្រកបដោយគុណភាព បម្រើដល់ការអភិវឌ្ឍន៍សេដ្ឋកិច្ច និងសង្គមក្នុងតំបន់ និងប្រទេសទាំងមូល។
ជាមួយនឹងបេសកកម្មបណ្តុះបណ្តាលធនធានមនុស្សសម្រាប់ខេត្ត និងតំបន់វាលរាបទន្លេគឺវឡុង ក្រៅពីការបណ្តុះបណ្តាលកម្រិតបរិញ្ញាបត្រចំនួន ៥១ មុខជំនាញ សាកលវិទ្យាល័យត្រាវិញមានបណ្តុះបណ្តាលកម្រិតបរិញ្ញាបត្រជាន់ខ្ពស់ចំនួន ២៧ មុខជំនាញ ថ្នាក់បណ្ឌិតចំនួន១០ មុខជំនាញ និងបណ្តុះបណ្តាលលក្ខណៈឯកទេសចំនួន ៥មុខជំនាញ ។
លោក Le Van Han ប្រធានគណៈកម្មាធិការប្រជាជនខេត្តត្រាវិញបានមានប្រសាសន៍ថា៖ «សាកលវិទ្យាល័យត្រាវិញពិតជាមានតួនាទីយ៉ាងសំខាន់ក្នុងការបង្កើតការផ្លាស់ប្តូរលើការលើកកម្ពស់កម្រិតបញ្ញារបស់ប្រជាជន លើកកម្ពស់គុណភាពធនធានមនុស្សសម្រាប់ខេត្តត្រាវិញ។»
កម្មវិធីសិក្សារបស់សាកលវិទ្យាល័យផ្តោតសំខាន់ទៅលើការកែលម្អគុណភាព។ មកដល់ពេលបច្ចុប្បន្ន សាកលវិទ្យាល័យត្រាវិញ គឺជាសាកលវិទ្យាល័យឈានមុខគេក្នុងតំបន់វាលរាបទន្លេគឺវឡុងដោយមានកម្មវិធីសិក្សាជាច្រើនទទួលបានការទទួលស្គាល់គុណភាពអប់រំលំដាប់អន្តរជាតិ។
ផ្សារភ្ជាប់ជាមួយអាជីវកម្មក្នុងការបណ្តុះបណ្តាលដើម្បីអោយខ្លឹមសារនៃកម្មវិធីសិក្សាផ្សារភ្ជាប់ទៅនឹងតម្រូវការអភិវឌ្ឍន៍ជាក់ស្តែងនៃអាជីវកម្ម និងសង្គម។ សាកលវិទ្យាល័យនានានៅប្រទេសវៀតណាមកំពុងផ្តោតការយកចិត្តទុកដាក់យ៉ាងខ្លាំងលើការផ្លាស់ប្តូរខ្លឹមសារបណ្តុះបណ្តាល និងសកម្មភាពជំនាញទន់។ នេះជាគោលបំណងដ៏សំខាន់មួយ ដើម្បីជួយយុវជនវៀតណាមជំនាន់ក្រោយ មានទំនុកចិត្តលើវិថីអាជីពផ្ទាល់ខ្លួន និងរួមចំណែកដល់ការអភិវឌ្ឍន៍ប្រកបដោយចីរភាព និងឆ្ពោះទៅមុខនៃប្រទេសរបស់យើងនាពេលខាងមុខ។
ប្រភពពត៌មាន:https://vtv.vn/giao-duc/dao-tao-theo-xu-the-phat-trien-vung-20220425092543932.htm
ប្រែសម្រួលដោយ៖ SeHa