ចុះហត្ថលេខាទទួលស្គាល់ផ្លាស់ប្ដូរក្រេឌីតកម្មវិធីបណ្តុះបណ្តាលរវាងសាកលវិទ្យាល័យត្រាវិញនឹងក្រុមហ៊ុនភាគហ៊ុនអប់រំតាមប្រព័ន្ធអនឡាញ FUNiX
- សេចក្ដីលម្អិត
- ជំពូក៖ ព័ត៌មាន
- ចេញផ្សាយនា 23 មីនា 2023
- ចុចដង៖ 284
កាលពីថ្ងៃទី ២៣ ខែ កុម្ភៈឆ្នាំ ២០២៣ នៅសាកលវិទ្យាល័យត្រាវិញបានប្រព្រឹត្តឡើងនូវពិធីចុះហត្ថលេខាសហការនិងទទួលស្គាល់ផ្លាស់ប្ដូរក្រេឌីតកម្មវិធីបណ្តុះបណ្តាលរវាងសាកលវិទ្យាល័យត្រាវិញនឹងក្រុមហ៊ុនភាគហ៊ុនអប់រំតាមប្រព័ន្ធអនឡាញ FUNiX និងកម្មវិធីបណ្តុះបណ្តាលពីចម្ងាយផ្នែកបច្ចេកវិទ្យាព័ត៌មានកម្រិតបរិញ្ញារបស់សាកលវិទ្យាល័យត្រាវិញ រួមបញ្ចូលទាំងសិក្ខាសាលាក្រោមប្រធានបទ អប់រំតាមបែបឌីជីថល ក្នុងបរិបទថ្មីនៅតំបន់វាលរាបទន្លេគឺវឡុង។
អញ្ជើញចូលរួមកម្មវិធីមានលោកបណ្ឌិត Nguyen Thanh Nam ជា Founder នាយកអង្គការអប់រំតាមប្រព័ន្ធអនឡាញ FUNiX ក៏ជាអតីតអគ្គនាយកសហព័ន្ធក្រុមហ៊ុន FPT; លោកស្រី Tan Anh សមជិកគណៈអភិវឌ្ឍធនធានមនុស្ស នៃមជ្ឈមណ្ឌលផ្លាស់ប្តូរនិងច្នៃប្រឌិតថ្នាក់ជាតិ (NIC) ចំណុះក្រសួងផែនការនិងវិនិយោគ; លោកស្រី Nguyen Thi Bich Thuy ប្រឹក្សាជាន់ខ្ពស់អំពីទំនាក់ទំនងភាពជាដៃគូ នៃការិយាល័យគ្រប់គ្រងនិងជម្រុញសេដ្ឋកិច្ច (OGEG) ចំណុះ USAID វៀតណាម; លោក Phan Vinh Quang ជាប្រធានក្រុមអ្នកជំនាញ USAID WISE; លោក Thach Ngoc Hung ជាប្រធានគម្រោងការនៃ VCG; លោក Quach Ngoc Xuan ជា CTO FUNiX ទទួលបន្ទុកចំពោះមជ្ឈមណ្ឌលបច្ចេកវិទ្យានិងអប់រំ នៃ FUNiX; លោក Tang Phu Khoa ជានាយក FPT Software កឹងធើ; លោក Nguyen Duc Vinh សមាជិកនៃមជ្ឈមណ្ឌលស្រាវជ្រាវ ប្រឹក្សានិងបណ្តុះបណ្តាលអំពីអភិវឌ្ឍមូលដ្ឋាន ចំណុះអង្គការ STG។
ផ្នែកខាងសាកលវិទ្យាល័យត្រាវិញ មានវត្តមានរបស់លោកសាស្ត្រាចារ្យរងបណ្ឌិត Nguyen Minh Hoa សាកលវិទ្យាធិការនៃសាកលវិទ្យាល័យត្រាវិញ; លោកសាស្ត្រាចារ្យរងបណ្ឌិត Diep Thanh Tung សាកលវិទ្យាធិការរងនៃសកលវិទ្យាល័យត្រាវិញ; លោកបណ្ឌិត Phan Quoc Nghia សាកលវិទ្យាធិការរងនៃសាកលវិទ្យាល័យត្រាវិញ; លោកសាស្ត្រាចារ្យរងបណ្ឌិត Nguyen Van Nguyen នាយកសាលាមហាវិទ្យាល័យសេដ្ឋកិច្ចនិងនីតិសាស្រ្ត នៃសាកលវិទ្យាល័យត្រាវិញ; លោកសាស្ត្រាចារ្យរងបណ្ឌិត Nguyen Thai Son ជាប្រធានវិទ្យាស្ថានអភិវឌ្ឍធនធានមនុស្ស; លោកបណ្ឌិត Vo Phuoc Hung ព្រឹទ្ធបុរសនៃមហាវិទ្យាល័យ វិស្វកម្ម និងបច្ចេកវិទ្យា រួមជាមួយនឹងតំណាងដែលមកពីបណ្តាអង្គភាព ការិយាល័យ ក៏ដូចជាតំណាងនិស្សិតក៏បានចូលរួមផងដែរ។
ថ្លែងសុន្ទរកថា លោកសាស្ត្រាចារ្យរងបណ្ឌិត Nguyen Minh Hoa សាកលវិទ្យាធិការនៃសាកលវិទ្យាល័យត្រាវិញបានថ្លែងអំណរគុណចំពោះភ្ញៀវកិត្តិយសទាំងឡាយដែលបានចូលរួមនិងធ្វើជាសាក្សីនៃកិច្ចចុះហត្ថលេខាសហការនិងទទួលស្គាល់ផ្លាស់ប្ដូរក្រេឌីតកម្មវិធីបណ្តុះបណ្តាលផ្នែកបច្ចេកវិទ្យាព័ត៌មាន។ ទន្ទឹមនឹងនោះ លោកក៏បានបញ្ជាក់ថា នៅពេលខាងមុខនេះ សាកលវិទ្យាល័យត្រាវិញ នឹងខិតខំពង្រឹងកិច្ចសហការមួយនេះកាន់តែបានស៊ីជម្រៅថែមទៀត។
លោកសាស្ត្រាចារ្យរងបណ្ឌិត Nguyen Minh Hoa សាកលវិទ្យាធិការនៃសាកលវិទ្យាល័យត្រាវិញរួមជាមួយនឹងលោកបណ្ឌិត Nguyen Thanh Nam ជា Founder នាយកអង្គការអប់រំតាមប្រព័ន្ធអនឡាញ FUNiX ក៏ជាអតីតអគ្គនាយកសហព័ន្ធក្រុមហ៊ុន FPT តំណាងអោយ FUNiX បានរួមគ្នាធ្វើជាអធិបតី នៃកិច្ចចុះហត្ថលេខា។ ខ្លឹមសារនៃកិច្ចព្រមព្រៀងនេះ គឺអំពីការទទួលស្គាល់ក្រេឌីតកម្មវិធីបណ្តុះបណ្តាលរបស់សាលាទាំងពី ហើយមានការអនុញ្ញាតប្តូរសាលាសិក្សាពី FUNiX មករៀននៅសាកលវិទ្យាល័យត្រាវិញ។
លោកស្រី Tan Anh តំណាងមជ្ឈមណ្ឌលផ្លាស់ប្តូរនិងច្នៃប្រឌិតថ្នាក់ជាតិ (NIC) (NIC) ចំណុះក្រសួងផែនការនិងវិនិយោគ បានវាយតម្លៃខ្ពស់នូវកិច្ចសហការរវាងសាកលវិទ្យាល័យត្រាវិញនិង FUNiX រួមចំណែកក្នុងការបណ្តុះបណ្តាលប្រភពធនធានមនុស្សខាងឌីជីថលសម្រាប់វាលរាបទន្លេគឺវឡុង ក៏ដូចជាទូទាំងប្រទេស។
ក៏ក្នុងឱកាសនេះដែរ ភាគីទាំងសងខាងបានរួមគ្នាចាត់តាំងសិក្ខាសាលាក្រោមប្រធានបទ អប់រំតាមបែបឌីជីថល ក្នុងបរិបទថ្មីនៅតំបន់វាលរាបទន្លេគឺវឡុង ដោយមានវាគ្មិនជាអ្នកដឹកនាំ អ្នកគ្រប់គ្រងមកពីក្រុមហ៊ុន អ្នកជំនាញខាងអប់រំ បច្ចេកវិទ្យា។ សិក្ខាសាលាបានលើកឡើងនូវបញ្ហាអំពីតម្រូវការ ស្ថានភាពនៃការអប់រំបណ្តុះបណ្តាលធនធានមនុស្សផ្នែកឌីជីថល ឱកាសនិងឧបស័គ្គចំពោះវិធីបណ្តុះបណ្តាលថ្មី។ ពិសេសជាងនេះទៅទៀត គឺឱកាសបានទទួលជំនួយពីអង្គការអន្តរជាតិសម្រាប់ការបណ្តុះបណ្តាលធនធានមនុស្សផ្នែកឌីជីថល និងការផ្លាស់ប្តូរមកប្រើឌីជីថលសម្រាប់តំបន់។
ក៏ក្នុងសិក្ខាសាលានេះដែរ លោកបណ្ឌិត Nguyen Thanh Nam បានឡើងចែករំលែកយោបល់ដោយប្រធានបទថា ទស្សនៈវិស័យមួយនៃការអប់រំឌីជីថលក្នុងបរិបទថ្មី។ អ្នកគ្រូ Phan Thi Phuong Nam ជាគ្រូបង្រៀនមកពីដេប៉ាតឺម៉ង់ បច្ចេកវិទ្យាព័ត៌មាន បានធ្វើបទបង្ហាញអំពី ករណីប្រើប្រាស់ឌីជីថលក្នុងការត្រួតពិនិត្យគុណភាពកម្មវិធីសិក្សាតាមស្តង់ដារអន្តរជាតិនៅសាកលវិទ្យាល័យត្រាវិញ។ លោក Quach Ngoc Xuan ជា CTO FUNiX បាន បកស្រាយអំពី ករណីប្រើប្រាស់ ChatGPT ដើម្បីជាជំនួយក្នុងការសិក្សានៅ FUNiX។
អត្ថបទដោយ៖ Hanh Nguyen – Huyen Thu
ប្រែសម្រួលដោយ៖ Omnara