ចុះហត្ថលេខាលើអនុស្សរណៈយោគយល់គ្នាលើកិច្ចសហប្រតិបត្តិការជាមួយសាកលវិទ្យាល័យវៀតណាម-អាល្លឺម៉ង់
- សេចក្ដីលម្អិត
- ជំពូក៖ ព័ត៌មាន
- ចេញផ្សាយនា 17 ឧសភា 2023
- ចុចដង៖ 235
(TVU) – នាព្រឹកថ្ងៃទី៦ ខែឧសភា គណៈប្រតិភូនៃសាកលវិទ្យាល័យវៀតណាម-អាល្លឺម៉ង់ (បិញយឿង) ដឹកនាំដោយលោកសាស្ត្រាចារ្យបណ្ឌិត Tomas Benz សាកលវិទ្យាធិការ បានអញ្ជើញទៅបំពេញទស្សនកិច្ចនិងចុះហត្ថលេខាលើអនុស្សរណៈយោគយល់គ្នាលើកិច្ចសហប្រតិបត្តិការជាមួយសាកលវិទ្យាល័យត្រាវិញ ក្នុងការជំរុញកិច្ចសហប្រតិបត្តិការក្នុងការបណ្តុះបណ្តាល និងស្រាវជ្រាវវិទ្យាសាស្ត្រ។ រួមជាមួយគណៈប្រតិភូមានលោកបណ្ឌិត Ha Thuc Vien សាកលវិទ្យាធិការរង និងតំណាងថ្នាក់ដឹកនាំអង្គភាពចំណុះសាកលវិទ្យាល័យវៀតណាម-អាល្លឺម៉ង់។
ទទួលនិងធ្វើការជាមួយគណៈប្រតិភូ មានលោកសាស្ត្រាចារ្យរងបណ្ឌិត Nguyen Minh Hoa សាកលវិទ្យាធិការនៃសាកលវិទ្យាល័យត្រាវិញ លោកសាស្ត្រាចារ្យរងបណ្ឌិត Diep Thanh Tung និងបណ្ឌិត Phan Quoc Nghia សាកលវិទ្យាធិការរងនៃសាកលវិទ្យាល័យ និងតំណាងថ្នាក់ដឹកនាំអង្គភាពចំណុះសាកលវិទ្យាល័យត្រាវិញ។
ថ្លែងសុន្ទរកថាស្វាគមន៍ លោកសាស្ត្រាចារ្យរងបណ្ឌិត Nguyen Minh Hoa សាកលវិទ្យាធិការនៃសាកលវិទ្យាល័យត្រាវិញបានសម្តែងនូវក្តីរំភើបរីករាយនៅពេលគណៈប្រតិភូសាកលវិទ្យាល័យវៀតណាម-អាល្លឺម៉ង់បានមកទស្សនា និងចុះហត្ថលេខាលើអនុស្សរណៈយោគយល់គ្នានៃកិច្ចសហប្រតិបត្តិការជាមួយសាកលវិទ្យាល័យត្រាវិញ។ ទន្ទឹមនឹងនោះ លោកក៏បានឧទ្ទេសនាមអំពីសមិទ្ធិផល និងការស្រាវជ្រាវឆ្នើម រួមជាមួយនឹងប្រព័ន្ធសម្ភារៈបរិក្ខាររបស់សាលា។
ថ្លែងកថាក្នុងកិច្ចជំនួបនេះ លោកសាស្ត្រាចារ្យ Tomas Benz សាកលវិទ្យាធិការនៃសាកលវិទ្យាល័យវៀតណាម-អាល្លឺម៉ង់ បានស្ងើចសរសើរចំពោះសម្ភារៈបរិក្ខារ និងគុណភាពនៃធនធានមនុស្ស ដែលសាកលវិទ្យាល័យត្រាវិញកំពុងបណ្តុះបណ្តាល។ ក្រៅពីនេះ លោកក៏សង្ឃឹមថា នាពេលខាងមុខនឹងមានឱកាសពង្រីកកិច្ចសហប្រតិបត្តិការជាមួយសាកលវិទ្យាល័យត្រាវិញលើវិស័យជាច្រើនទៀត។
ឆ្លងតាមរយៈការពិភាក្សាគ្នា ភាគីទាំងពីរបានឯកភាពលើខ្លឹមសារសហប្រតិបត្តិការមួយចំនួននាពេលខាងមុខរួមមាន៖ ផ្លាស់ប្តូរ និងចែករំលែកធនធានលើបណ្ណាល័យឌីជីថល; ចែករំលែកឧបករណ៍ស្រាវជ្រាវក្នុងវិស័យវិស្វកម្ម និងបច្ចេកវិទ្យា; ចែករំលែកចំណេះដឹង និងបទពិសោធន៍ក្នុងការកសាង និងអនុវត្តសូចនាករសមិទ្ធកម្មគន្លឹះ (KPI) ប្រកបដោយប្រសិទ្ធភាព។
ស្របឱកាសនេះដែរ គណៈប្រតិភូសាកលវិទ្យាល័យវៀតណាម-អាល្លឺម៉ង់បានទៅទស្សនា សម្ភារៈបរិក្ខារស្រាវជ្រាវ និងបរិយាកាសសិក្សារបស់និស្សិតនៅអង្គភាពនានានៃសាកលវិទ្យាល័យត្រាវិញ។
អត្ថបទដោយ៖ Hoang Nam – Thien Loc
ប្រែសម្រួលដោយ៖ Diem Phuc