ពិធីបិទការវាយតម្លៃកម្មវិធីសិក្សាផ្នែកឱសថសាស្ត្រ និងផ្នែកបច្ចេកទេសតេស្តវេជ្ជសាស្ត្រតាមស្តង់ដារ AUN-QA
- សេចក្ដីលម្អិត
- ជំពូក៖ ព័ត៌មាន
- ចេញផ្សាយនា 31 ឧសភា 2023
- ចុចដង៖ 237
នៅថ្ងៃទី២៥ ខែឧសភា នៅសាកលវិទ្យាល័យត្រាវិញបានប្រព្រឹត្តឡើងនូវកម្មវិធីបិទការវាយតម្លៃកម្មវិធីសិក្សាផ្នែកឱសថសាស្ត្រ និងផ្នែកបច្ចេកទេសតេស្តវេជ្ជសាស្ត្រតាមស្តង់ដារ AUN-QA។
ក្នុងរយៈពេលពីរថ្ងៃបំពេញការងារ ក្រុមវាយតម្លៃ បានធ្វើការពិនិត្យមើល និងផ្តោតលើការសិក្សាឯកសារភស្តុតាងរបស់សាកលវិទ្យាល័យ ព្រមទាំងបានពិភាក្សា និងសម្ភាសជាមួយថ្នាក់ដឹកនាំសាកលវិទ្យាល័យ ថ្នាក់ដឹកនាំមហាវិទ្យាល័យវេជ្ជសាស្ត្រ និងឱសថសាស្រ្ត អ្នកគ្រប់គ្រង និងក្រុមអ្នកសរសេររបាយការណ៍ ក៏ដូចជាគ្រូបង្រៀន និស្សិត អតីតនិស្សិតនៃកម្មវិធីសិក្សាចំនួនពីរផ្នែក ឱសថសាស្ត្រ និងបច្ចេកទេសតេស្តវេជ្ជសាស្ត្រ និងធ្វើការសម្ភាសជាមួយនិយោជក។ល។ ក្រុមការងារក៏បានធ្វើការពិនិត្យអំពីហេដ្ឋារចនាសម្ព័ន្ធនិងសម្ភារៈឧបទេសរបស់សាកលវិទ្យាល័យ និងមហាវិទ្យាល័យ តាំងពីថ្នាក់រៀន តំបន់អនុវត្តពិសោធន៍...។
ក្នុងពិធីបិទនៃការវាយតម្លៃនេះ លោកសាស្ត្រាចារ្យ Shahrir Abdullah ប្រធានគណៈកម្មាធិការវាយតម្លៃ បានកោតសរសើរចំពោះគុណសម្បត្តិ និងលទ្ធផលនានាដែលកម្មវិធីសិក្សាសម្រេចបាន ទាំងខ្លឹមសារ វិធីសាស្រ្តក្នុងការបង្ហាត់បង្រៀន និងរៀន បុគ្គលិកគ្រូបង្រៀន និងសេវាកម្មគាំទ្រ ជំនួយដល់និស្សិត សម្ភារៈឧបទេសផ្សេងៗ។
ទន្ទឹមនឹងនោះ លោកសាស្ត្រាចារ្យក៏បានផ្តល់អនុសាសន៍ដើម្បីជួយសាកលវិទ្យាល័យត្រាវិញរៀបចំផែនការកែលម្អកម្មវិធីសិក្សាឱ្យកាន់តែសមស្របថែមទៀតនាពេលខាងមុខ។ លោកសាស្ត្រាចារ្យ Shahrir Abdullah សង្ឃឹមថាការវាយតម្លៃនេះនឹងរួមចំណែកដល់ការជួយដល់សាកលវិទ្យាល័យត្រាវិញ និងផ្នែកសិក្សាទាំងពីរនឹងអនុវត្តសកម្មភាពបង្រៀន និងរៀនឱ្យកាន់តែប្រសើរឡើង ដែលនាំមកនូវតម្លៃ និងបទពិសោធន៍កាន់តែច្រើនសម្រាប់អ្នកសិក្សា។
លោកបណ្ឌិត Do Nhat Phuong ព្រឹទ្ធបុរសរងនៃមហាវិទ្យាល័យវេជ្ជសាស្ត្រ និងឱសថសាស្រ្តនៃសាកលវិទ្យាល័យត្រាវិញបានថ្លែងអំណរគុណដល់ក្រុមអ្នកជំនាញនៃ AUN-QA បានផ្ដល់ជាមតិយោបល់ និងអនុសាសន៍ដែលនេះនឹងជាមូលដ្ឋានសម្រាប់សាកលវិទ្យាល័យត្រាវិញ និងមហាវិទ្យាល័យវេជ្ជសាស្ត្រ និងឱសថសាស្រ្តដើម្បីកំណត់បាននូវគុណសម្បត្តិ និងគុណវិបត្តិរបស់ខ្លួន ហើយបន្ទាប់មករៀបចំផែនការកែលម្អ និងបន្តកែលម្អគុណភាពនៃកម្មវិធីសិក្សា។
សាកលវិទ្យាល័យត្រាវិញទទួលស្គាល់ និងទទួលយកនូវមតិយោបល់ និងសំណូមពររបស់ក្រុមវាយតម្លៃ ហើយនឹងបន្តរៀបចំផែនការ និងលើកឡើងនូវដំណោះស្រាយ ដើម្បីលើកកម្ពស់គុណភាពនៃកម្មវិធីសិក្សា ជំរុញនិងពង្រីកនូវគុណសម្បត្តិ និងជំនះនូវរាល់គុណវិបត្តិដើម្បីឆ្ពោះទៅការបម្រើតម្រូវការរបស់អ្នកសិក្សាកាន់តែប្រសើរ និងបញ្ជាក់ពីគុណភាពនៃកម្មវិធីសិក្សារបស់សាកលវិទ្យាល័យត្រាវិញក្នុងដំណើរឆ្ពោះទៅការធ្វើសមាហរណកម្មគុណភាពអប់រំក្នុងតំបន់ និងអន្តរជាតិ។
រូបភាពនានានៃការវាយតម្លៃកម្មវិធីសិក្សាផ្នែកឱសថសាស្ត្រ និងផ្នែកបច្ចេកទេសតេស្តវេជ្ជសាស្ត្រតាមស្តង់ដារ AUN-QA
អត្ថបទដោយ៖ Hanh Nguyen – Quang Vinh
ប្រែសម្រួលដោយ៖ Se Ha